Morgunblaðið - 13.03.2006, Síða 19

MORGUNBLAÐIÐ MÁNUDAGUR 13. MARS 2006 19
MENNING
A
ll
ta
f
ó
d
ýr
ir
APÓTEK OG HEILSUBÚÐIR
Góð heilsa - Gulli betri
Sólhattur
FRÁ
Fyrir heilsuna
FREYR Sigurjónsson flautuleikari
hlaut frábæra dóma fyrir einleik sinn
í konsert eftir W.A. Mozart fyrir
flautu og hörpu með sinfón-
íuhljómsveitinni í Bilbao á Spáni.
Tónleikarnir voru haldnir 2. og 3.
febrúar síðastliðinn og hörpuleikari
var Marion Desjacques, sem starfar
ásamt Frey með hljómsveitinni að
staðaldri.
Spænska blaðið DEIA segir í
dómnum um tónleikana að Freyr sýni
alltaf framúrskarandi tónlistartúlkun
og dagblaðið GARA segir að túlkun
einleikaranna hafi verið ástríðufull,
litrík og músíkölsk. Blaðið segir einn-
ig: „Það var unaður að hlusta á ljúfa
og lagvissa tóna flautunnar studda
yndislegri hljómfegurð hörpunnar,
og þessir hljómar sem bárust frá
munni og fingrum hinna tveggja ein-
leikara frá Íslandi og Frakklandi köll-
uðu fram kraftmikið og verðskuldað
lófaklapp áheyrenda.“
Freyr segir þessa dóma hafa verið
svakalega og hann hafi bæði verið
undrandi og ánægður við að lesa þá.
„Ég spilaði þennan Mozart-
konsert fyrst 1992 og aftur 1993, svo
spila ég hann núna 2006 og fæ þá
svona mikil viðbrögð. Áhrifin frá
áhorfendum á tónleikunum voru slík
að ég varð yfir mig hrifinn, virkilega
fallegt. Áhorfendur sjá alltaf sama
flautuleikara í hljómsveitinni og svo
bara eins og allt í einu gera þeir sér
grein fyrir því að hann stendur í
stykkinu,“ segir Freyr og er aug-
ljóslega ánægður með þessar góðu
viðtökur.
Tónverk frá Jóni Ásgeirssyni
Freyr var ráðinn fyrsti flautuleik-
ari Sinfóníuhljómsveitar Bilbao árið
1982, en þá hafði hann lokið einleik-
araprófi frá Royal Northern Collage
of Music í Manchester. Jafnhliða
starfi sínu í hljómsveitinni hefur
Freyr kennt við Tónlistarskólann í
Bilbao og leikið einleik með hljóm-
sveitum og kammerhópum víða í
Evrópu auk þess að leika með Út-
varps- og sjónvarpshljómsveitinni í
Madríd.
Fram undan hjá Frey eru fleiri
tónleikar og kennsla, auk þess sem
Jón Ásgeirsson samdi handa honum
tónverk fyrir þremur árum sem hann
er að vinna með.
„Jón gaf mér það loforð þegar ég
var lítill strákur að hann skyldi semja
handa mér tónverk. Ég lærði hjá hon-
um tónfræði og sonur hans er góður
vinur minn. Þetta er mjög fallegur
konsert, ég er búinn að gera prufu-
upptökur með góðum píanóleikara og
útsetningarnar hjá Jóni eru alveg
eins og ég vil hafa þær og spila.“
Freyr stefnir á að frumflytja konsert-
inn bæði á Íslandi og á Spáni um leið
og tækifæri gefst til. „Verkið er
klassískt samspil einleikara og hljóm-
sveitar. Í því er einn yndislegur kafli
sem ég hef svo mikla ánægju af að
spila. En þetta er verk sem byrjar ró-
lega og fer svo stigvaxandi.“
Á Íslandi í sumar
Í júlí geta Íslendingar notið hæfi-
leika Freys en þá mun hann spila í
Listasafni Sigurjóns Ólafssonar, föð-
ur síns. „Þá mun ég koma með selló-
og víóluleikara með mér frá Bilbao og
systir mín, Hlíf Sigurjónsdóttir, spil-
ar með á fiðlu. Áætlunin er að spila
m.a. kvartetta eftir Mozart.“
Freyr segir Mozart höfða sér-
staklega til sín og meðal annars megi
þakka það góðri tónlistarkennslu á
Íslandi. „Við erum með svo góðan
skóla á Íslandi sem kennir okkur að
spila Mozart eins og á að spila hann.
Á Spáni eru þau ekki vön að hlusta á
svona tónlist með ákveðnar áherslur.
Þessi góða Mozart-kennsla hefur
komið mér og mínum nemendum vel
hérna á Spáni,“ segir Freyr sem lauk
sínu fyrsta einleikaraprófi frá Tón-
listarskólanum í Reykjavík árið 1978.
Tónlist | Íslenskur flautuleikari fær góða dóma á Spáni
Framúrskarandi tónlistartúlkun
Freyr Sigurjónsson flautuleikari og Marion Desjacques hörpuleikari ásamt sinfóníuhljómsveitinni í Bilbao.
LISTAMENN á vegum Turpent-
ine-gallerísins í Ingólfsstræti tóku
þátt í scope-art-listastefnunni í
New York um helgina, en síðasti
dagur hennar er í dag. Þetta eru
þau Hildur Ásgeirsdóttir Jónsson,
Húbert Nói Jóhannesson, Georg
Guðni Hauksson og Sigurður Árni
Sigurðsson.
Öll sýna þau málverk, en Hú-
bert Nói sýnir að auki myndbands-
verk. Með þeim í för ytra er
Sveinn Þórhallsson galleristi í
Turpentine.
Morgunblaðið hafði samband við
listamennina á meðan á listastefn-
uni stóð og ræddi m.a. við Hildi
Ásgeirsdóttur Jónsson, sem sagði
allt hafa gengið gríðarlega vel. Að
hennar sögn hefur scope-art-
stefnan fengið mikla athygli í fjöl-
miðlum í New York. „Ég er búin
að sjá umfjöllun um hana í nokkr-
um blöðum, og finn að það er tals-
verður spenningur fyrir þessu.“
Sumir hafa augljóslega ekki haft
hemil á spenningnum, því að sögn
Sveins Þórhallssonar var búið að
selja þónokkur verk Íslendinganna
um leið og búið var að hengja þau
upp, áður en stefnan hófst. „Þetta
er orðið svona alls staðar – líka
heima. Áhugi á íslenskri myndlist
er ekki bara í orði.“
Spurður um ástæðu þessara
landvinninga Turpentine segir
Sveinn einfalda: „Ef maður vill
skapa sér nafn í þessari grein, þá
verður maður einfaldlega að vinna
markvisst að því. Þarna sýna 70
gallerí víðsvegar úr heiminum, og
það er búist við þúsundum gesta.
Hingað kemur fólk frá listasöfnum,
galleristar, listaverkasalar og alls
konar fólk annað til að skoða og
kaupa verk. Það er mikilvægt að
kynna sig vel á svona stað. Hingað
kemur líka fjölmiðlafólk alls staðar
úr heiminum, og í klukkutíma áður
en stefnan var formlega opnuð,
hafði fjölmiðlafólkið eitt aðgang að
henni, til að skoða, taka viðtöl og
kynna sér hvað um er að vera í
myndlistinni í dag. Þessi stefna
spannar vítt svið myndlistar, og
verkin hér eru fjölbreytt.“
Markmið scope-art er að skapa
alþjóðlegt umhverfi í miðlun sam-
tímalistar, þar sem viðskiptahættir
eru skýrir og augljósir, um leið og
boðið er upp á það besta í listinni.
Stefnur scope-art sækja listfræð-
ingar, sýningastjórar, listaverka-
salar, galleristar og listamenn og
er þess vænst að viðmót stefnanna
sé afslappað og þægilegt.
Þeim er ekki einungis ætlað að
vera vettvangur viðskipta, heldur
þykir forsvarsmönnum þeirra ekki
síður mikilvægt að skapa tengsl
milli fólks í greininni, fræða, upp-
lýsa og skemmta. scope-art vinnur
að því að listastefnur á þess veg-
um geti orðið allsherjarvettvangur
þar sem allir þeir sem stunda
myndlist og vinna við hana á ein-
hvern hátt – en líka allur áhuga-
samur almenningur, geti komið
saman, kynnst, átt endurfundi,
verslað, fræðst og upplifað.
Myndlist | Gallerí Turpentine sýnir verk íslenskra listamanna í New York
Verk seld fyrir opnun
Hildur Ásgeirsdóttir Jónsson ræðir við stefnugest við opnunina. Á MORGUN, þriðjudag, verður hald-
in fyrsta af fjórum ljóðaskemmt-
unum, Ljóðs manns æði, í Leik-
húskjallaranum. Að dagskránni
standa fræðsludeild Þjóðleikhússins
ásamt fjórum stuðningsmönnum
ljóðsins: Eysteini Þorvaldssyni, Ást-
ráði Eysteinssyni, Sigurbjörgu
Þrastardóttur og Hjalta Snæ Æg-
issyni.
Í tilkynningu segir að með dag-
skránni sé ætlunin að snúa við þeirri
þróun að ljóðið verði hornreka í þeirri
umfjöllun og athygli sem bókmenntir
fá á Íslandi.
Ljóðaskemmtanirnar eru þema-
tengdar og í umsjón Þórhalls Sig-
urðssonar, leikstjóra og deildarstjóra
fræðsludeildar.
Á fyrstu skemmtuninni, annað
kvöld, verður fjallað um „Útrás í ljóð-
um“, frá miðöldum til nútímans.
„Ljóðið í líkamlegri nálægð“ er yf-
irskrift 28. mars og rætt um líkama,
útlit, nautnir og sársauka í ljóðum.
Hinn 11. apríl verður dagskráin með
þemanu „Mér brennur í muna,“ og
vöngum velt um ljóðin sem minn-
ingamyndir. „Sótt og dauði“ er síðan
yfirskrift Ljóðs manns æðis 25. apríl,
en þá verður rætt um margboðað
andlát móðurmálsins, eins og segir í
tilkynningu.
Flytjendur verða bæði leikarar og
höfundar og einnig fengnir annars
staðar frá, en leitast er við að skapa
ljúfa stemningu og geta gestir notið
veitinga meðan á dagskránni stendur.
Skemmtanirnar hefjast kl. 21 og
húsið opnað kl. 20.30.
Bókmenntir |Ljóðs
manns æði á
þriðjudagskvöldum
Ljóð í Leik-
húskjallara
Eysteinn
Þorvaldsson
Hjalti Snær
Ægisson
Sigurbjörg
Þrastardóttir
Ástráður
Eysteinsson
JAPANSKI rithöfundurinn
Haruki Murakami hefur sak-
að fyrrverandi útgefanda
sinn, Akira Yasahura, um
stuld, en út-
gefandinn, og
ættingjar
hans að hon-
um látnum,
hafa að sögn
Murakamis
selt hand-
skrifuð bók-
arhandrit
hans á netinu
og í forn-
bókabúðum í
leyfisleysi. Meðal annars á
Yasahura að hafa selt þýð-
ingu rithöfundarins á bók
eftir F. Scott Fitzgerald á
yfir milljón jen, eða um sex-
hundruð þúsund krónur.
Til ársins 1988 handskrif-
aði Murakami öll verk sín og
má ráða af fréttum að hand-
ritin sem slík hafi verið í
vörslu útgefandans, sem lést
árið 2003. Handritin þykja
að vonum verðmætir safn-
gripir hjá aðdáendum
skáldsins og seljast dýru
verði.
Bókasafn útgefandans og
aðrar hans eigur voru að
honum látnum seldar forn-
bókabúð í Tókýó, að ósk
Yasahura sjálfs, þar á meðal
verk Murakamis, en Mura-
kami heldur því fram að
Yasahura hafi þegar verið
byrjaður að selja handritin
fyrir andlát sitt.
Murakami var gestur bók-
menntahátíðar á Íslandi árið
2003 og hlaut frægð í Japan
fyrir bók sína „Norwegian
Wood“ og er hvað þekkt-
astur á Vesturlöndum fyrir
bókina „Kafka á ströndinni“.
Bækur hans „Spútnikástin“,
„Eftir skjálftann“ og „Sunn-
an við mærin, vestur af sól“
hafa verið þýddar á íslensku.
Murakami
þjófkennir
útgefanda
sinn
Haruki
Murakami