Morgunblaðið - 21.04.2006, Side 26

26 FÖSTUDAGUR 21. APRÍL 2006 MORGUNBLAÐIÐ
UMRÆÐAN
Á ESSO STÖÐINNI
Svöng?
ÞÆR ERU skondnar kosningahugleiðingar Stef-
áns Jóns Hafstein í Morgunblaðinu þessa dagana. Á
mánudag í dymbilviku birtist eftir hann einhvers
konar minningargrein um R-listann.
Þar er nú ýmislegt tínt til sem dæmi
um árangur af valdatíð R-listans, s.s.
fækkun umferðarslysa; minnkandi
vímuefnaneysla; árangur gegn einelti
og fjörug ferðaþjónusta.
Ég minnist ekki að Stefáni Jóni
hafi hingað til verið mikið niðri fyrir
um þessi mál. Var afstaða hans metn-
aðarfyllri en afstaða sjálfstæðismanna? Siðferð-
isstyrkur hans meiri eða baráttan markvissari? Ef
svo var, þá hvar, hvenær og hvernig?
Væri kannski nær að hreykja sér minna og við-
urkenna að öll þessi þróun er fyrst og fremst
áhugamál og eljuverk fjölda einstaklinga, sérfræð-
inga, stofnana og félaga, án nokkurs teljandi frum-
kvæðis frá Stefáni Jóni og R-listanum?
Fækkun umferðarslysa
Baráttan fyrir fækkun umferðarslysa í Reykjavík á
sér langa sögu sem margir hafa komið að, ekki síst
lögreglan, Umferðarstofa og tryggingafélögin með
mikilvægu forvarnarstarfi. Hér skiptir einnig máli
hægari umferð í íbúðarhverfum sem hófst löngu
fyrir borgarstjórnardaga Stefáns Jóns. Hraðahindr-
anir og fyrstu 30 km hverfagötur sáu dagsins ljós í
valdatíð sjálfstæðismanna og fyrir tilstilli Katrínar
Fjeldsted.
Þá ber að þakka umferðarverkfræðingum borg-
arinnar, s.s. Gunnari H. Gunnarssyni, deildarverk-
fræðingi og flokksfélaga Stefáns Jóns. Hann bauð
sig reyndar fram í prófkjöri Samfylkingarinnar í
febrúar og hreppti 17. sætið. Það er því ekki að sjá
að þeir njóti eldanna hjá Samfylkingunni sem fyrst-
ir kveikja þá.
Vímuefnaneysla unglinga
Sömu sögu er að segja um afrek Stefáns Jóns og R-
listans í vímuefnamálum. Áhugamenn gegn vímu-
efnaneyslu, SÁÁ, Jafningjafræðsla, löggæsluaðilar,
kennarar og foreldrar koma þar víst ekkert við
sögu.
Eineltið
Og svo er það eineltið. Þar er hann mættur, enn og
aftur, málsvari lítilmagnans. Auðvitað er ekkert
minnst á baráttu, greinaskrif og umræður Regn-
bogabarna, mikils fjölda foreldra, kennara og fag-
aðila um þessa vá, – að ekki sé talað um það frum-
kvæði menntamálaráðuneytisins sem kennt er við
Olweusaráætlunina.
Árið 2004 greindi ráðuneytið frá mjög víðtækri
könnum sem framkvæmd var árið 2003 og náði yfir
8.400 grunnskólanema í 45 skólum landsins. Sam-
kvæmt henni hafði einelti minnkað um 31% í 4.–7.
bekk og um 39% í 8.–10. bekk. En þessi áætlun og
könnunin sem henni fylgdi koma Stefáni Jóni lík-
lega ekkert við, eða hvað?
Ó svala borg
Loks er það afrek Stefáns Jóns og R-listans að
breyta Reykjavík úr „útnára í norðri“ í „svalasta
ferðamannastað í Evrópu“, eins og hann sjálfur
orðar það. Gæti nú hugsast að afnám bjórbanns
1989, samkeppni, einkaframtak og faglegur metn-
aður íslenskra matreiðslumanna og mikils fjölda
annarra sem starfað hafa við íslenska ferðaþjónustu
hafi eitthvað með þessa þróun að gera?
Það er gaman að vera góður með sig. Ég sakna
þess eins að Stefán Jón þakki sjálfum sér og
„styrkri stjórn“ R-listans góða veðrið og vorkom-
una.
Veðráttan, vorið og Stefán Jón
Eftir Mörtu Guðjónsdóttur
Höfundur skipar 10. sætið á framboðslista
sjálfstæðismanna í Reykjavík.
Í HLÍÐUM Úlfarsfells stendur til að reisa hverfi fyrir
rúmlega 20 þúsund íbúa. Það er mikil ákvörðun, sem
hefur farið heldur hljótt miðað við umfangið. Hverfið
verður álíka stórt og Grafarvogurinn
eða Breiðholtið, örlítið minna en Kópa-
vogur.
Byggð í Úlfarsfelli
Hlíðar Úlfarsfells eru fallegar, og þeir
sem þar munu búa verða vonandi ham-
ingjusamir, enda á það að vera mark-
mið borgaryfirvalda á hverjum tíma að
búa fólki umhverfi sem eykur lífsgæði þess og lífsham-
ingju. En að skella tæpum Kópavogi í þessar hlíðar
hljómar óneitanlega nokkuð bratt. Til stendur að reisa
á svæðinu 6–7 skólahverfi, en í hverju slíku eru á bilinu
900–1000 íbúðir. Í hverfum af þessum toga er reiknað
með 3–4 manneskjum í hverri íbúð, þannig verður
fjöldinn í hverfinu miðað við lægstu forsendur 16.200
íbúar, en miðað við hæstu 28.000. Gefum okkur því
meðaltalið, sem er rúmlega 22 þúsund íbúar.
Mannfjöldi í Reykjavík
Hagstofa Íslands segir fyrir um þróun mannfjölda.
Samkvæmt þeirri spá verða Íslendingar orðnir 353
þúsund árið 2045. Reykvíkingar eru rúm 38% af heild-
arfjölda Íslendinga. Ef okkur Reykvíkingum tekst að
halda núverandi stöðu okkar verðum við því um 135
þúsund árið 2045. Með öðrum orðum, á næstu 40 árum
mun íbúum Reykjavíkur fjölga um 21 þúsund, að öllu
óbreyttu.
Hvar eiga 21.000 Reykvíkingar að búa?
Reykjavík á að bjóða upp á fjölbreytileika. Þeir sem
vilja búa þétt eiga að geta gert það, en þeir sem kjósa
rýmri byggð eiga að fá hana. Fjöldi spennandi þétting-
arsvæða hefur verið í undirbúningi síðustu ár, Mýr-
argötuskipulagið, Vatnsmýrin og 101 Skuggi, svo
dæmi séu tekin. Þá eru ótaldir spennandi búsetukostir
á borð við Geldinganes, Elliðaárvoga og Örfirisey. Ef
við ætlum að byggja þessa staði er ljóst að lítil skyn-
semi er í að reisa rúmlega 20 þúsund manna byggð í
Úlfarsfelli. Slík byggð myndi rúma alla „nýja“ Reyk-
víkinga næstu 40 árin, samkvæmt spám, og því vandséð
hvaða þörf væri fyrir öll hin hverfin.
Sátt um stefnu
Úlfarsfellið er fallegt byggingarland og þar eigum við
sannarlega að reisa glæsilegt hverfi. Við eigum að
standa við þær skuldbindingar sem við höfum gefið
lóðaeigendum, íþróttafélögum og öðrum. En við þurf-
um ekki að reisa jafn viðamikla byggð þar og nú er fyr-
irhuguð. Miklu skynsamlegra er að minnka hverfið,
leyfa þeim sem þar vilja búa að hafa rýmra um sig og
útivistarsvæðin veglegri. Með því stuðlum við að skyn-
samlegri byggð í allri borginni, léttum á fyrirséðum
umferðarvanda í Ártúnsbrekku og síðast en ekki síst
verða einhverjir eftir til að búa í nýju húsunum sem
verða annars staðar en í Úlfarsfelli. Og að lokum: Lát-
um þetta mál ekki verða efni í þrætubók í komandi
kosningum. Náum frekar sátt um skynsamlegustu
stefnuna fyrir alla borgarbúa.
Úlfarsfell og þétting byggðar
Eftir Gísla Martein Baldursson
Höfundur er frambjóðandi Sjálfstæðisflokksins.
Í AÐDRAGANDA sveitarstjórnarkosninga verður mönnum tíðrætt
um aðkomu sveitarfélaganna að atvinnulífinu. Sú tíð er að mestu liðin
að sveitarfélögin séu beinir þátttakendur í atvinnurekstri. Nú skiptir
mestu að sveitarfélögin geti boðið íbúum og fyr-
irtækjum öfluga og samkeppnishæfa grunnþjónustu. Sú
er raunin á Akureyri: Heilbrigður og traustur rekstur á
„bæjarkassanum“, hófleg gjöld fyrir þjónustu sveitarfé-
lagsins og almenn ánægja með þjónustu bæjarins. Þann-
ig standa málin eftir tvö farsæl kjörtímabil undir
styrkri forystu Sjálfstæðisflokksins í bæjarstjórn Ak-
ureyrar.
Hátæknifyrirtæki á heimsvísu
Á Akureyri er öflugt og fjölbreytt atvinnulíf. Hér eru ein stærstu sjáv-
arútvegsfyrirtæki landsins. Þetta eru hátæknifyrirtæki á heimsvísu;
fyrirtæki sem sannarlega kunna og geta brugðist við breyttum ytri að-
stæðum á hverjum tíma. Það er mikilvægt að þau njóti sannmælis og
eins hitt að bæjaryfirvöld standi áfram vörð um þær leikreglur sem
sjávarútveginum hafa verið settar, þannig að fyrirtækin geti áfram
mótað sér sterka framtíðarsýn. Það er Akureyringum og Eyfirðingum
öllum nauðsynlegt að sjávarútvegurinn, þessi sterka eimreið atvinnu-
lífsins við Eyjafjörð, búi ekki við óvissu og óstöðuga pólitíska stefnu í
þessum efnum.
Málmiðnaðurinn á sér sterkar rætur á Akureyri. Þar búum við að
mikilli verkþekkingu og reynslu; þekkingu sem mun skila fyrirtækj-
unum áfram í hörðu samkeppnisumhverfi. Það er mikilvægt að þessum
fyrirtækjum auðnist að koma á auknu samstarfi sín á milli og tryggja
sér þannig enn sterkari stöðu í framtíðinni.
Stækkandi
markaðssvæði
Íbúum Akureyrar fjölgar, sem sér stað í miklum umsvifum í bygginga-
iðnaði. En byggingaverktakar á Akureyri hafa líka leitað eftir og
fengið verkefni utan bæjarfélagsins. Hið sama gildir um fjölmörg önn-
ur fyrirtæki á Akureyri, í ýmsum greinum atvinnulífsins. Þau eru í sí-
auknum mæli farin að horfa á landið allt sem sinn markað og horfa
sum hver líka út fyrir landsteinana í leit að vænlegum mörkuðum.
Undangengin misseri hefur oft verið minnst á þann mikla vaxt-
arbrodd sem fólginn er í nýjum fyrirtækjum í „hátækni- og þekking-
ariðnaði“. Því er gjarnan haldið fram að slík fyrirtæki sé helst að
finna á höfuðborgarsvæðinu. Sú fullyrðing er einfaldlega röng. Á Ak-
ureyri, og raunar um land allt, má finna bæði ný og rótgróin fyrirtæki
sem teljast til þessa hóps fyrirtækja. Því má heldur ekki gleyma að
„hátækni og þekkingu“ er beitt í flestum greinum atvinnulífsins nú til
dags.
Aukna opinbera stjórnsýslu í Eyjafjörð!
Undangengin ár hafa haldist í hendur einkavæðing í ríkisrekstri og
mikill vöxtur í opinberri stjórnsýslu. Þessi umsvif hafa ekki nema að
litlum hluta skilað sér inn í eyfirskt atvinnulíf. Við það verður ekki
unað.
Við Eyfirðingar höfum alla burði til að taka að okkur stóraukin
verkefni á sviði opinberrar stjórnsýslu. Í mínum huga er nærtækast í
þessum efnum að efla enn frekar starfsemi Fjórðungssjúkrahússins á
Akureyri. Það er hagsmunamál allra landsmanna.
Öflugt atvinnulíf
á Akureyri
Eftir Ólaf Jónsson:
Höfundur skipar 7. sætið á D-lista Sjálfstæðisflokks
í bæjarstjórnarkosningunum á Akureyri.
AKUREYRARBÆR vill laða til sín fjölskyldufólk og
efla lífsgæði bæjarbúa með því að leggja áherslu á að
veita fjölskyldum góð búsetuskilyrði og faglega þjón-
ustu. Gæði í leik- og grunnskólastarfi
svo og heilbrigðis- og félagsþjónustu,
fjölbreytta íþrótta- og tómstunda-
starfsemi og öflugt lista- og menningar-
líf.
Fjölskyldustefna
Til að fylgja eftir þeim áherslum að
gera allar aðstæður sem bestar fyrir
börn og uppalendur þeirra hefur Akureyrarbær sett
sér fjölskyldustefnu. Í fjölskyldustefnunni eru settar
fram meginforsendur þar sem dregið er fram mik-
ilvægt hlutverk fjölskyldunnar varðandi þroska og ör-
yggi barna. Þar er einnig lögð áhersla á sameiginlegan
rétt sem og skyldur og ábyrgð karla og kvenna varð-
andi uppeldi barna sinna. Að leiðarljósi stefnunnar er
meðal annars að skilyrði barna og ungmenna til að
njóta æskunnar og búa sig undir framtíðina verði sem
best.
Í stefnunni eru greindir þeir þættir í verkefnum bæj-
arins sem snerta barnafjölskyldur og skilgreint hvern-
ig samtengja má þjónustu mismunandi deilda og stofn-
ana við fjölskyldur. Einnig er getið um leiðir til að auka
áhrif fjölskyldna á þjónustuna. Öllum deildum bæjarins
er ætlað að taka mið af fjölskyldustefnunni við gerð
starfsáætlana og gert er ráð fyrir að ábyrgðaraðilar
geti kallað til samvinnu um úrlausn verkefna t.d. milli
deilda.
Árangursmat
Til að meta markvisst hvaða áhrif ákvarðanir muni
hafa á hagi barnafjölskyldna hefur verið útbúinn gát-
listi. Til að auðvelda eftirfylgni á notkun listans hjá
nefndum og deildum skal geta notkunar í fund-
argerðum auk árlegrar úttektar. Þá er stefnt að því að
taka í notkun sem fyrst svokallaða fjölskylduvog, tæki
sem Rannsóknastofnun Háskólans á Akureyri er með í
þróun fyrir félagsmálaráðuneytið, en fjölskylduvoginni
er ætlað að mæla velferð bæjarbúa.
Fjölskyldustefnu Akureyrarbæjar: Akureyri – Fjöl-
skyldubær til framtíðar! má nálgast á heimasíðu Ak-
ureyrarbæjar http://akureyri.is
Fjölskyldubærinn Akureyri
Eftir Elínu Margréti Hallgrímsdóttur
Höfundur skipar 3. sæti á D-lista Sjálfstæðisflokksins í
bæjarstjórnarkosningunum á Akureyri 27. maí nk.