Morgunblaðið - 29.11.2007, Qupperneq 20

20 FIMMTUDAGUR 29. NÓVEMBER 2007 MORGUNBLAÐIÐ
AUSTURLAND
Eftir Steinþór Guðbjartsson
steinthor@mbl.is
FÉLAGAR í Rótarýklúbbi Akra-
ness eru rúmlega hálfnaðir við að
setja þrep í Selbrekku í Akrafjalli
og er stefnt að því að ljúka verkinu á
næsta ári, að sögn Steinars Al-
marssonar, forseta klúbbsins.
Þróunarverkefni til 10 ára
Alþjóðahreyfing Rótarý hélt upp
á aldarafmæli sitt 2005. Steinar Al-
marsson segir, að af því tilefni hafi
Rótarýklúbbur Akraness ákveðið
árið áður að ráðast í 10 ára þróun-
arverkefni í Akrafjalli og byrja á því
að byggja brú yfir Berjadalsá í
Berjadal. Brúin hafi verið reist í
nokkrum vinnuferðum og hún hafi
verið formlega vígð 20. apríl 2005. Í
vor sem leið hafi áin í klakaböndum
verið farin að ýta við brúnni og því
hafi hún verið hækkuð um hálfan
metra.
Steinar segir að í framhaldi af
brúargerðinni hafi verið ákveðið að
auðvelda göngufólki leiðina að
brúnni með því að setja þrep í Sel-
brekkuna upp að Berjadalnum.
Gera megi ráð fyrir að þau verði um
150 og er búið að koma 87 þeirra
fyrir en vinna liggur niðri yfir vetr-
armánuðina. „Okkur tókst ekki að
ljúka verkinu fyrir 60 ára afmælið
en vonandi tekst það á næsta ári,
þótt hafa beri í huga að þetta er
hluti af 10 ára þróunarverkefninu,“
segir Steinar.
Meðfram stígnum í Selbrekkunni
hafa félagarnir sett upp skilti með
hæðarpunktum yfir sjávarmáli og
GPS-staðsetningu og á miðri leið að
brúnni hafa þeir komið fyrir hvíldar-
bekk. Sætisbakið vantar, en á því á
að standa Rótarýklúbbur Akraness
60 ára. Steinar segir að stefnt sé að
því að koma merktu sætisbakinu fyr-
ir á næsta ári.
Rótarýklúbbur Akraness hefur
komið að mörgum málum í gegnum
tíðina. Steinar segir að félagsmenn
hafi til dæmis stundað skógrækt og
verið í miklum tengslum við Tónlist-
arskólann á Akranesi og fjölbrauta-
skólann. Í byrjun hafi menn hins
vegar haft einna mestar áhyggjur af
versnandi kunnáttu barna í íslensku
og því ákveðið að veita verðlaun fyrir
besta árangur í móðurmálinu í
grunnskólanum og hafi það verið
gert í þrjá áratugi.
Stígagerð á Akrafjalli hálfnuð
Framhald af brúarsmíði og hluti þróunarverkefnis Rótarýklúbbs Akraness
Berjadalsá Steinar Almarsson, Gunnar Gunnarsson og Jóhann Ársælsson
á brúnni yfir Berjadalsá í Berjadal. Akranes í baksýn.
Í HNOTSKURN
» Rótarýklúbbur Akraness varstofnaður 29. nóvember 1947
og á því 60 ára afmæli í dag.
» Þetta var fimmti Rótarý-klúbburinn á Íslandi og voru
stofnfélagar 18.
» Fyrsta stórverkefni fé-lagsmanna var aðstoð við
gerð skrúðgarðsins á Akranesi
1951.
» Sérstök afmælishátíð verðurá Akranesi annað kvöld.
Þrepin Steinar Almarsson geng-
ur á stígnum í Selbrekkunni.
LANDIÐ
Eftir Steinunni Ásmundsdóttur
steinunn@mbl.is
Fjarðabyggð | Sveitarfélagið
Fjarðabyggð hefur verið í mikilli
mótun undanfarin ár og undirgeng-
ist langt sameiningarferli. Nú eru
Stöðvarfjörður, Fáskrúðsfjörður,
Reyðarfjörður, Eskifjörður, Norð-
fjörður og Mjóifjörður innan sveitar-
félagsins. Tæplega fimm þúsund
manns hafa fasta búsetu í Fjarða-
byggð.
Bæjarstjórn stendur í umfangs-
mikilli vinnu við gerð aðalskipulags
til 2020 þar sem samfélagið allt, inn-
viðir þess og stjórnsýsla eru skoðuð
af gaumgæfni, með það að markmiði
að greina hvert skal stefnt og með
hvaða hætti. Helga Jónsdóttir bæj-
arstjóri Fjarðabyggðar segir nú
blasa við að móta samfélag sem sé að
jafna sig eftir feiknaháan öldufald.
„Við erum að fara inn í það skeið sem
stefnt var að; að vera með fleiri og
styrkari stoðir í atvinnulífinu og
fleira fólk, en jafnframt að halda í
kosti samfélags sem ekki er í kapp-
hlaupi við tímann heldur nýtur til-
verunnar,“ segir Helga.
Hún telur mikil tækifæri fylgja að-
alskipulagsvinnu. „Nú erum við t.d.
að velta fyrir okkur hver íbúaþróun-
in verður í raun og veru. Hér hefur
undanfarið verið byggt geysilega
mikið upp, með það í huga að þjóna
fleiri fólki en við höfum haft áður.
Verkefnið er að hámarka lífsgæðin í
samfélaginu. Ég hef raunar aldrei
séð Fjarðabyggð fyrir mér sem sam-
félag með mjög mörgum þúsundum
manna. Mikilvægara er að fólk sem
hér býr hafi tilfinningu fyrir að hafa
valið sér stað sem það vill vera á.
Stað sem er öðruvísi en höfuðborg-
arsvæðið og Akureyri um margt, en
þar sem öllum grundvallarþörfum
góðs mannlífs er vel fullnægt.“
Helga segir þurfa sýn á framtíðina
og ekki megi streitast við að gera allt
í einu. Ákveðnum þáttum hafi verið
bráðnauðsynlegt að sinna strax, eins
og endurbótum leik- og grunnskóla,
uppbyggingu íþrótta- og tómstunda-
mannvirkja, nýrri höfn, vatnsveitu
og fleiru. Nú þurfi að staldra við og
hugleiða hvernig megi gera eitt sam-
hent samfélag úr fjörðunum og efla
samhygð og samvinnu með þéttbýlis-
kjörnunum sem til skamms tíma hafi
staðið sem sjálfstæðar einingar.
„Peningar eru takmörkuð auðlind og
því skiptir meginmáli að greina hvað
gera þarf til að staðarkostir á hverj-
um stað njóti sín innan heildarinnar
og í hvaða skrefum geti orðið sátt um
að gera slíkt. Ég er þeirrar trúar að
séu hlutir vel undirbúnir, greindir til
hlítar, um þá fjallað og sýnt fram á
augljósan ávinning með einhverjum
hætti, takist að skapa um þá sam-
stöðu.“
Í Fjarðabyggð er unnið undir slag-
orðinu „Þú ert á góðum stað“. Sam-
félagið á að vera fjölskylduvænt,
gott, traust og öruggt. Helga segir
þetta hreint ekki orðin innantóm því
mikil vinna sé lögð í að skilgreina út í
hörgul hvaða ábyrgð þetta leggi
sveitarfélaginu á herðar og hvað
þurfi til að standa undir slíkri yfir-
lýsingu. Hún segir sjávarútveg í
Fjarðabyggð geysilega öflugan en
sérstaða sveitarfélagsins sé nú sú að
komin er festa í atvinnulífið með
miklum fjölda starfa, þar sem fólk
geti treyst að vinnan haldi.
Akkeri í atvinnulífinu
„Með þeim 400 sem starfa í ál-
verinu og 2-300 til viðbótar hjá þjón-
ustuaðilum álversins skapast vænt-
anlega eftirspurn eftir ýmiss konar
þjónustu annarri. Þarna er komið
nokkuð sem nánast engin sveitar-
félög á landsbyggðinni búa við; akk-
eri sem gefur okkur mikla sóknar-
möguleika því stærðin er svo mikil.
Hér er deigla og hér verður sköpun.
Ég heyri að áberandi sé í ýmsu sjálf-
boðaliða-, æsku- og íþróttastarfi að
nýir íbúar gefi kost á sér og séu virk-
ir. Þetta skiptir geysilega miklu máli.
Sjálfsagt þarf ákveðinn frumkvöð-
ulshugsunarhátt til að flytja sig milli
landsvæða og jafnvel landa og gera
eitthvað nýtt. Okkar nýju íbúar að-
laga sig hratt. Mér virðist að íbúar
sem fyrir voru hafi tekið breyting-
unum mjög fagnandi. Ég hef ekki
fundið annað en fólk telji það að setja
niður þennan nýja atvinnurekstur og
allt sem því fylgir mjög eftirsóknar-
vert og íbúar eigi að leggja allt fram
sem þeir geta til að sú ákvörðun
reynist farsæl.“
Samgöngur eru ofarlega á baugi í
Fjarðabyggð og Norðfjarðargöng
eru á vegaáætlun og verða opnuð
2012, sem er mikill áfangi í sam-
tvinnun þéttbýlisstaðanna í sveitar-
félaginu. Fáskrúðsfjarðargöng hafa
reynst afar mikil lyftistöng í sam-
göngum. „Fyrir þetta landsvæði
skipta samgöngur gríðarlegu máli og
ef styrkur þess á að nýtast þjóðar-
heildinni er engin spurning um arð-
semi jarðganga á Miðausturlandi.
Ég hygg að það muni verða mjög
skýr krafa, ekki bara frá okkur held-
ur hagsmunaaðilum sem annast
þjónustu og flutninga þegar Mjóeyr-
arhöfn kemst í gagnið, að samgöngu-
leiðir verði greiðari á landi. Sveitar-
félögin á svæðinu eru einhuga um að
þessi mál verði skoðuð í heildarsam-
hengi fyrir landshlutann. Heilborun
er til athugunar hjá okkur, Vega-
gerðinni og samgönguyfirvöldum og
spennandi að sjá hvað kemur út úr
því.“
Þarfnast líka vaxtarbrodda
Helga segir sveitarfélagið hafa
axlað sitt hlutverk í kjölfar stjórn-
valdsákvarðana um álver og virkjun
af heilindum og myndarskap. Til
þess að sú ákvörðun geti orðið til
heilla fyrir framtíðarsamfélagið
verði ríkið að fylgja málum eftir alla
leið. Þorskaflaskerðing upp á tvö til
þrjú þúsund tonn komi sér alveg
jafnilla fyrir fólk í Fjarðabyggð og
annars staðar á landinu. Því miður
verði fólk í sjávarútvegi bæði fyrir
tekjuskerðingu og atvinnumissi og
höfnin og sveitarfélagið tapi miklum
tekjum. Það sé líkt og ríkisvaldið
telji mótvægisaðgerða síður þörf í
Fjarðabyggð en öðrum sjávar-
plássum. Slíkt sé mikil skammsýni
því óvíða blasi við jafnmiklir mögu-
leikar til að mótvægisaðgerðirnar
geti skilað því sem að er stefnt.
Sveitarfélagið sé hins vegar búið að
binda alla fjármuni sem það getur í
nýjum verkefnum. Samfélagið
eystra þurfi jafnt og önnur svæði á
því að halda að stuðningur sé veittur
við vaxtarbrodda í t.a.m. þorskeldi,
ferðaþjónustu, hafrannsóknum,
fjölgun starfa fyrir konur, þekking-
arsköpun og fleiru.
Helga segir fjárhagsstöðu
Fjarðabyggðar til lengri framtíðar
sterka. Mikið sé af nýjum innviðum
og búið að standa í mikilli fjárfest-
ingu. Því sé hlutfall skulda hátt og
nauðsynlegt að geyma allar frekari
fjárfestingar umfram það sem
brýna nauðsyn beri til. Stórfram-
kvæmdir eru að baki í bili. Hún segir
nú þurfa að standa vörð um góðan
rekstur og umhverfis- og ásýndar-
mál.
„Við erum sem samfélag búin að
leggja línurnar til framtíðar, við
vinnum saman og erum búin að
skipuleggja út frá því að hver staður
fyrir sig beri í sér tiltekna kosti. Um
þessar mundir er gaman að fylgjast
með þróun mannlífsins í Fjarða-
byggð og sjá hvernig draumar og
væntingar ganga eftir.“
Lífsgæði í samfélaginu efst á baugi
Morgunblaðið/Steinunn Ásmundsdóttir
Sterk framtíðarsýn Helga Jónsdóttir, bæjarstjóri Fjarðabyggðar.
Í Neskaupstað Það er ekki síst
unga fólkið sem sér ný tækifæri.
Sveitarfélagið
Fjarðabyggð er
óðum að taka á
sig nýja mynd