Náttúrufræðingurinn - 1934, Page 72

182
NÁTTÚRUFR.
og fjórði hópurinn, og svo áfram, og spannst þannig eins og lopi
úr fugla-flókanum í loftinu, þar til allar veiðibjöllurnar voru lagð-
ar á stað í sömu áttina. En í kíkinum sá eg hvernig þær, sem á
eftir voru, greikkuðu flugið, og virtist mér þær allar vera komnar
í nokkuð þéttan hnapp, áður en þær hurfu sjónum mínum.
Það, sem hér hafði skeð, var þetta: Þegar veiðibjöllurnar
voru flognar upp, voru þær með öllu óráðnar í hvað gera skyldi,
hvort þær ættu að setjast aftur, eða halda burt, og þá í hvaða átt.
Hver veiðibjalla var aðeins staðráðin í því einu, að halda hópinn.
í fyrra skiptið tókst engri veiðibjöllu, um langan tíma, að fá aðrar
til þess að fylgja sér, þó hún legði af stað í einhverja átt, og
sneri því við inn í hópinn aftur, þegar hún sá, að engin fylgdi henni.
Eg hefi all oft rekið mig á það í náttúrufræðisritum, að
sumir álíta, að það eigi sér stað hugsanaflutningur hjá félags-
lyndum fuglum, sem allir breyta stefnu, og fljúga í sömu átt. En
óþarfi virðist að grípa til slíkra skýringa, sem í sjálfu sér eru
ólíklegar, þar sem hitt virðist næg skýring, að fuglar hermi bara
hver eftir öðrum, eins og mér virðist bersýnilegt að hafi verið
um veiðibjöllurnar.
Ólafur Friðriksson.
Bréfdúfur villast.
Þó að bréfdúfur séu heimsfrægar fyrir ratvísi, þá getur þeim
þó brugðist bogalistin, og er ekki ótítt, að hingað komi ein og ein,
við og við, einkum í dimmviðri. Þannig skrifar Valdimar Snævarr,
skólastjóri á Norðfirði, mér það, að einn af nemendum hans,
sem var í sveit síðastliðið sumar, hafi tjáð sér, að villt bréfdúfa
hafi kvöld eitt í blindþoku komið heim að bænum, og verið aðfram
komin af þreytu. Dúfan náðist, og á fæti hennar var hringur með
merkinu: T. H. U. TD 87. Dúfa þessi dvaldi á bænum nokkra daga,
en þá var þokusúld og dimmviðri, en þegar létti og bjart varð í
lofti, hélt hún leiðar sinnar.
Eg hefi haft fregnir af annari dúfu, sem settist á eitthvert
milliferðaskipanna síðastliðið vor. Líklegt er, að dúfur þessar hafi
villzt frá brezkum herskipum, sem voru að flotaæfingum í Norður-
sjónum, því eins og kunnugt er, eru bréfdúfur mikið notaðar til
hernaðar. Á. F.