Fréttablaðið - 24.09.2009, Blaðsíða 56

40 24. september 2009 FIMMTUDAGUR
sport@frettabladid.is
FÓTBOLTI Valur Fannar Gíslason,
fyrirliði Fylkis, var í vikunni
dæmdur í tveggja leikja bann eftir
að hann fékk sína tíundu áminn-
ingu á tímabilinu, eins og reglur
KSÍ kveða á um. Hins vegar hefur
reglunum um viðurlög við agabrot-
um ekki verið breytt eftir að liðum
í efstu þremur deildunum hér á
landi var fjölgað í tólf.
„Það er auðvitað algjört rugl hjá
mér að fá svona mörg spjöld á einu
tímabili. En vissulega mætti skoða
það hvort eitthvað þurfi að breyta
þessu kerfi eftir að fjölgað var í
deildinni,“ sagði Valur Fannar.
Hann vildi ekkert segja um
hvort hann hefði átt þessi spjöld
skilið. Hann vildi þó meina að hann
væri ekki grófur leikmaður.
„Ég hef stundum fengið spjöld í
sumar fyrir sakir sem ég hef ekki
verið áminntur fyrir áður. Ég er
fastur fyrir en ekki grófur,“ sagði
hann.
Fylkismenn hafa verið sagðir
spila hvað ákveðnast í Pepsi-deild-
inni í sumar. „Leikmenn eru fylgn-
ir sér en það hefur aldrei verið
lagt upp með að vera grófur. Ólaf-
ur Þórðarson var sömuleiðis fylg-
inn sér og ákafur sem leikmaður
en fékk aldrei mörg spjöld á einu
tímabili,“ sagði Valur Fannar en
Ólafur er þjálfari Fylkis.
„Ólafur er einn heiðarlegasti
maður sem ég þekki enda fær
hann afar sjaldan spjöld fyrir að
mótmæla dómgæslu. Hann hvet-
ur okkur til að vera fasta fyrir en
aldrei grófa,“ bætti Valur Fannar
við.
Þórir Hákonarson, fram-
kvæmdastjóri KSÍ, sagði að það
hefði verið rætt innan veggja
KSÍ hvort breyta þyrfti viðurlög-
unum en það hefði þó ekki verið
tekið formlega fyrir. „Það hefur
komið til tals hvort eigi að breyta
viðurlögunum en það hefur í það
minnsta engu verið breytt enn,“
sagði Þórir. „Krafa frá félögunum
um að skoða þetta liggur heldur
ekki fyrir.“
Stjórn KSÍ myndi þurfa að sam-
þykkja slíka reglubreytingu en
Þórir sagði sjálfsagt að skoða það.
„Sjálfur hef ég ekki myndað mér
skoðun á því hvort þurfi að breyta
þessum reglum en mér finnst í
góðu lagi að taka þessa umræðu
upp.“
Þrátt fyrir að sextán lið séu í
efstu deild bæði í Svíþjóð og Nor-
egi er refsiramminn þar strangari
en sá á Íslandi.
Í Noregi eru leikmenn dæmdir
í bann eftir þrjár áminningar og
sömuleiðis eftir fimm og svo sjö
gul spjöld. Leikmenn fá leikbann
fyrir hvert spjald eftir það.
Í Svíþjóð fá leikmenn sömuleiðis
leikbann fyrir fyrstu þrjár áminn-
ingarnar en svo aftur eftir sex og
svo níu.
Á Íslandi fá leikmenn fyrst leik-
bann eftir fjórar áminningar og
svo aftur eftir sex. Hins vegar
breytist kerfið eftir það og leik-
menn fá tveggja leikja bann fyrir
átta áminningar annars vegar og
tíu áminningar hins vegar, eins og
í tilfelli Vals Fannars. Eftir það fá
leikmenn tveggja leikja bann fyrir
hverja áminningu.
Ekki kemur þó til þess í tilfelli
Vals Fannars enda aðeins einn
leikur eftir á tímabilinu. Hann
þarf ekki að taka út leikbann í
fyrsta leik næsta tímabils, sam-
kvæmt reglum KSÍ.
Valur Fannar hefur fengið
átta áminningar í samtals átján
deildarleikjum í sumar auk þess
sem hann fékk að líta gula spjald-
ið í báðum bikarleikjum Fylkis.
Fylkir hefur ekki fengið flestar
áminningar allra liða í deildinni til
þessa. Þróttur hefur fengið flestar,
51 talsins. Grindavík hefur fengið
50 og Fylkir 49.
eirikur@frettabladid.is
Tel mig ekki vera grófan leikmann
Fylkismaðurinn Valur Fannar Gíslason hefur alls fengið tíu áminningar í sumar. Af þeim sökum var hann
dæmdur í tveggja leikja bann. Viðurlögum við agabrotum hefur ekki verið breytt síðan tímabilið var lengt.
Í BARÁTTU Valur Fannar Gíslason, fyrirliði Fylkis, í baráttu við leikmann FH í leik
liðanna í Kaplakrika í sumar. Liðin mætast í lokaumferðinni um helgina en þá verður
Valur Fannar í banni. FRÉTTABLAÐIÐ/ARNÞÓR
FÓTBOLTI Ólafur Ingi Skúlason
mun að öllum líkindum spila með
sænska úrvalsdeildarfélaginu
Helsingborg á nýjan leik í kvöld
en hann hefur verið frá vegna
meiðsla.
„Þetta fór betur en á horfðist
í fyrstu þar sem við héldum að
þetta væri mun verri tognun en
hún reyndist,“ sagði Ólafur Ingi.
„En ég er byrjaður að æfa aftur
og verð í leikmannahópnum á
morgun [í dag]. Ég byrja væntan-
lega ekki en ef allt gengur vel
fæ ég væntanlega tækifærið á
sunnudaginn.“
Ólafur Ingi byrjaði að spila í
júlí síðastliðnum á ný eftir átta
mánaða fjarveru vegna kross-
bandsslita. „Það hefur verið
mikið álag á líkamanum síðan
ég byrjaði aftur og ég hef spilað
mikið af leikjum. Líkaminn hefur
því verið orðinn þreyttur, sem
var ef til vill ekkert skrítið.“ - esá
Ólafur Ingi Skúlason:
Spilar væntan-
lega í kvöld
ÓLAFUR INGI Hér í landsleik Íslands og
Georgíu á dögunum. FRÉTTABLAÐIÐ/ANTON
> Sex íslenskir dómarar á einum leik
Sex íslenskir dómarar verða við störf á einum og sama
leiknum þegar Ajax frá Hollandi og Anderlecht frá
Belgíu mætast í Evrópudeildinni í knattspyrnu.
Nýtt fyrirkomulag á dómgæslu verður prófað
í deildinni í vetur þar sem auk hefðbundinna
dómara verða tveir til viðbótar á endalínun-
um. Kristinn Jakobsson verður aðaldómari
leiksins en þeir Sigurður Óli Þorleifsson
og Ólafur Ingvar Guðfinnsson verða á
hliðarlínunni. Á endalínunni verða þeir
Magnús Þórisson og Þorvaldur Árnason.
Jóhannes Valgeirsson er fjórði dómari
leiksins.
Það verður sögulegur knattspyrnuleikur milli Fylkis og ÍR í Pepsi-deild
kvenna á sunnudaginn en þá munu þrjár konur skipa dómaratríó í
fyrsta sinn í efstu deild. Guðrún Fema Ólafsdóttir mun dæma leikinn
og aðstoðardómarar hennar verða þær Marína Ósk Þórólfsdóttir og
Birna Bergstað Þórmundsdóttir.
„Þetta er mjög stór áfangi að fara að dæma í efstu
deild,“ segir dómari leiksins, Guðrún Fema Ólafsdótt-
ir, sem er aðeins tvítug og á því framtíðina fyrir sér.
Þetta hefur verið viðburðaríkt sumar hjá henni. „Ég
var hækkuð upp í landsdómara í vor og fór síðan út í
sumar og dæmdi á Norðurlandamóti kvenna undir 17
ára í viku,“ segir Guðrún Fema og segir það hafa
verið mjög góða reynslu fyrir sig.
Guðrún Fema gæti verið að hefja fótbolta-
ferill sinn sem leikmaður en hún hefur meiri
áhuga á dómgæslunni. „Það fer ekki svaka-
lega vel saman að spila og dæma en ég
spilaði reyndar þrjá leiki í sumar. Ég varð
að velja og það eru meiri möguleikar fyrir
mig í dómarastarfinu,“ segir Guðrún. „Þetta var erfitt fyrst en svo þarf
maður að komast yfir ákveðinn hjalla og þá hættir maður að heyra
allt tuðið. Ég heyrði allt sem var sagt við mig fyrst en það þýðir ekki
lengur að spyrja mig hvað er sagt við mig eftir leik,“ segir Guðrún og
bætir við: „Ég held að það hafi samt verið erfiðast að yfirstíga það
að hætta heyra tuðið. Maður dæmir annars bara
eftir hjartanu, gerir það sem er rétt og dæmir ekki
ósanngjarnt eða neitt svoleiðis,“ segir Guðrún og
hún er ánægð með viðtökurnar.
„Það hafa allir tekið því vel að ég sé að
dæma, þjálfarar, stelpurnar og það er búið að
standa vel við bakið hjá okkur hjá KSÍ og þau
reyna að gera allt fyrir okkur,“ segir Guðrún
Fema og hún ætlar sér að ná langt.
„Ég vona að ég geti orðið alþjóðlegur
dómari en maður þarf að vera orðinn 25 ára.
Ég á enn þá eftir nokkur ár í það en ég stefni
á að vinna mig upp og geta orðið alþjóðlegur
dómari.“
GUÐRÚN FEMA ÓLAFSDÓTTIR: FYRSTA KONAN TIL AÐ DÆMA Í EFSTU DEILD Á SUNNUDAGINN
Það var erfiðast að hætta að heyra tuðið
FÓTBOLTI Það stefnir í æsispenn-
andi baráttu á milli risanna
Barcelona og Real Madrid um
spænska meistaratitilinn. Eftir 2-
0 sigur Real Madrid á Villarreal
í gær er ljóst að í fyrsta sinn í
sögunni eru þessir fornir fjendur
með fullt hús eftir fjóra leiki.
Real Madrid hefur ekki byrjað
jafnvel í átján ár en þetta er besta
byrjun Barcelona síðan 1997.
Cristiano Ronaldo skoraði fyrra
mark Real Madrid í gær. Með
því varð hann fyrsti leikmaður-
inn í sögu Real sem hefur skorað
í fyrstu fjórum deildarleikjum
sínum með félaginu. Svíinn
Zlatan Ibrahimovic setti sams-
konar félagsmet hjá Barcelona.
Real Madrid-menn fögnuðu líka
seinna markinu, sem Brasilíu-
maðurinn Kaka skoraði úr víta-
spyrnu því þetta var fyrsta mark-
ið sem hann skorar fyrir félagið
síðan hann kom frá Milan. - óój
Barcelona og Real Madrid:
Bæði með fullt
hús í fyrsta sinn
FÉLAGSMET Cristiano Ronaldo hjá Real
Madrid. NORDICPHOTOS/AFP
FÓTBOLTI Landsliðsfyrirliðinn
Hermann Hreiðarsson er enn að
vinna sig út úr meiðslum sem
hann varð fyrir á landsliðsæfingu
fyrir Noregsleikinn á dögunum
og hefur ekki enn spilað leik með
Portsmouth í ensku úrvalsdeild-
inni á tímabilinu.
„Þetta er bara eins og var reikn-
að með, að þetta tæki þessar fjór-
ar vikur að gróa. Það eru komn-
ar þrjár vikur síðan þetta gerðist
á Íslandi. Ég byrjaði aðeins að
skokka í dag,“ segir Hermann,
sem viðurkennir að hann sé
orðinn óþolinmóður.
„Maður er orðinn hungrað-
ur að komast í smá fótbolta því
maður er búinn að gera allt annað.
Maður er búinn að gera allt nema
það sem maður er að æfa,“ segir
Hermann.
Portsmouth er búið að tapa
fyrstu sex leikjum sínum í ensku
úrvalsdeildinni en vann Carlisle
í enska deildabikarnum á þriðju-
daginn. „Það er búið að vera ömur-
legt að geta ekki verið með. Við
þurfum á öllum að halda því við
erum ekki með það sterkan hóp
að það munar um alla. Auðvitað
myndi maður vilja vera þarna og
hjálpa til,“ segir Hermann.
„Ég er búinn að sjá flesta þessa
leiki, við töpuðum á móti Arsen-
al sannfærandi en hinir leikirn-
ir hefðu getað farið allavega,“
segir Hermann en liðið er búið
að tapa fjórum af sex leikjum á
sigurmarki, þar af tveimur þeirra
á marki á 89. og 90. mínútu.
„Okkur var spáð falli fyrir
mótið þannig að við erum ekki að
valda neinum vonbrigðum. Þetta
er alveg nógu góður mannskapur
til þess að halda sér uppi. Þetta
er gríðarlega erfið deild og það
hafa sterk lið farið niður eins og
Newcastle, Leeds og West Ham.
Það voru allt lið sem eyddu hell-
ings pening og voru með gríðar-
lega sterkan hóp,“ segir Hermann
og bætir við:
„Það er ekkert lið hundrað pró-
sent öruggt með sætið sitt nema
þessir fimm til sex toppklúbb-
ar. Aðrir geta lent í basli og við
erum eitt af þeim liðum,“ segir
Hermann. Hermann býst ekki
við að spila sinn fyrsta leik fyrr
en eftir landsleikjahléið í október.
Portsmouth mætir þá Tottenham
á heimavelli.
„Við eigum Everton um helgina
og mætum síðan Wolves um aðra
helgi. Þótt ég sé að stefna á Wol-
ves-leikinn held ég að þeir hleypi
mér ekki í þann leik. Ég ætla samt
ekki að útiloka það alveg strax.
Eftir þann leik er tveggja vikna
frí vegna landsleikja og þá ætti ég
að vera hundrað prósent kominn
í gang þegar það er búið,“ segir
Hermann. - óój
Enn gætu verið nokkrar vikur í að landsliðsfyrirliðinn Hermann Hreiðarsson spili með Portsmouth:
Orðinn hungraður að komast í fótbolta
ORÐ Í EYRA Hermann Hreiðarsson er
mikill karakter á velli og Portsmouth-
liðið saknar hans. NORDICPHOTOS/AFP