Fréttablaðið - 27.11.2010, Qupperneq 86

Hjálparstarf kirkjunnar8
Barnung eru þau orðin fullorðin.
Barnung sjá þau systkinum
farborða, vinna 12 tíma vinnudag
og sum sjá varla nokkurn tímann
bjartan dag. Þau eru munaðarlaus
eða í þrælkun, hafa flosnað úr
skóla eða aldrei komið þar inn.
Í Úganda fá munaðarlaus börn nýtt
og öruggt húsnæði, vatnstank,
eldaskála með sparhlóðum og
nauðsynlegasta innbú. Þeim er
kennd jarðrækt til framfærslu og
mörg fá stuðning í skóla.
Samstarfsaðilar Hjálparstarfs
kirkjunnar á Indlandi reka forskóla
á Indlandi til að kynna þræl-
bundnum foreldrum hvað felst
í menntun og venja börnin á
skólagöngu. Þar fá þau kennslu,
mat, bólusetningar, leik og athygli.
Haft er uppi á þrælabörnum og
þeim komið í kvöldskóla. Þar fá
þau fræðslu um réttindi sín, þar
styrkist sjálfsmynd þeirra og þar
öðlast þau nýja færni. Þau fá að
vera glöð og hafa loksins eitthvað
til að gleðjast yfir. Foreldrar fá
umfangsmikinn stuðning til að
standa sig í foreldrahlutverkinu og
sjá fjölskyldunni farborða án launa
barnanna þótt lítil séu. Börn og
foreldrar læra að spara fyrir
útgjöldum í stað lána sem binda
í ánauð. Mótframlag frá verkefninu
eflir móð. Þegar kvöldskólanum
lýkur eftir sex mánuði er skuld
barnanna greidd og þau skráð
í almenna skóla. Öllum er fylgt vel
eftir svo enginn heltist úr lestinni.
Ungmenni sækja háskóla samstarf-
s-aðila okkar þar sem kennsla er
sérsniðin að þörfum fátækra,
undirokaðs hóps sem þarfnast
einskis fremur en sjálfstyrkingar.
Þar læra ungmennin ensku,
tölvunotkun, umbrot, vélritun og
annað hagnýtt. Samvinna við
fyrirtæki skapar atvinnu. Allir
foreldrar eru fræddir um hættur
þess að gifta stúlkur of snemma.
Frætt er um kynþroskaaldurinn,
lög um heimanmund sem oft sligar
fjölskyldur eru kynnt. Einnig
styrkir vegna giftinga og til stúlkna
sem bíða með giftingu og ljúka
námi. Er þá aðeins fátt talið í starfi
með börnum.
Dæmi um það sem gert er í
verkefnum Hjálparstarfsins:
Indland
- Fræðsla og þrýstingur á
samfélagið að fara að lögum um
barnavernd og skólaskyldu, gegn
barnaþrælkun
- Heimavistarskólar: menntun,
næring, heilsugæsla og verndað
umhverfi
- Barnaþing berjast fyrir
mannréttindum,
framtíðarleiðtogar þjálfaðir
- Sumarnámskeið og skemmtiferðir
fyrir þrælabörn
Úganda
- Ný og tryggari hús byggð fyrir
munaðarlaus börn
- Vatnstankur við húsið sparar
litlum herðum vatnsburð
- Ráðgjafi veitir munaðarlausum
umhyggju og leiðsögn
- Þeim yngri hjálpað í almenna
skóla
- Saumanám og smíði, bíla- og
hjólaviðgerðir í boði fyrir eldri
- Allir læra um jarðrækt,
undirstöðuframfærsluna
Börn í hörðum skóla lífsins
Drengur á Indlandi (Kristján Ingi Einarsson)
Drengur á Indlandi vinnur við
vefstól (Kristján Ingi Einarsson)
Jólaaðstoð
Á miðvikudaginn opnar fyrir
umsóknir um jólaaðstoð, sem er
í samstarfi við Hjálpræðisherinn,
Mæðrastyrksnefnd Reykjavíkur og
Rauða krossinn í Reykjavík, fyrir
þá sem þess þurfa með. Úti á landi
eru prestar með umsóknarblöð og
ræða við umsækjendur. Umsóknir
þeirra eru svo sendar til
Hjálparstarfsins sem deilir út aðstoð
síðar í desember. Einnig taka
félagsráðgjafar á stofnunum við
umsóknum.
Tryggja að allir fái sem jafnast
Gert er ráð fyrir miklum fjölda
umsækjenda því það hefur verið
mikið að gera í allt haust og
umfang aðstoðarinnar hefur aukist.
Þess vegna hefur samstarf um
sérstaka jólaaðstoð verið treyst enn
frekar með sameiginlegri skráningu
allra þeirra sem sækja um, við
Hjálpræðisherinn, Mæðrastyrks-
nefndir, Rauðakrossdeildir,
fríkirkjuna Kefas og Hjálparstarf
kirkjunnar. Það skiptir miklu máli
og hjálpar okkur að gæta jafnræðis
og sjá til þess að allir sem þurfa
fái aðstoð. Fólki er frjálst að sækja
um hjá hverjum þessara samtaka
sem er. Umsóknardagar hjá
Hjálparstarfinu verða 1., 2., 7., 8.
og 9. desember. Við bjóðum þá
sem þurfa aðstoð velkomna. Síðasti
umsóknardagur er 9. desember.
Úthlutun á vegum Hjálparstarfsins,
Mæðrastyrksnefndar Reykjavíkur
og Rauða krossins í Reykjavík sem
verður síðar í desember fer svo
fram í Skútuvogi 3 í Reykjavík,
gengið inn frá Barkarvogi.
Umsækjendur utan af landi fá
senda aðstoð.
Hátíðamatur og gjafir
Það sem fólki býðst fyrir jólin er
að fá hátíðamat, kjötmeti, meðlæti,
gos og ýmislegt annað, s.s. smjör,
brauð, ávexti o.fl. Fjöldi sjálfboða-
liða tekur þátt í úthlutuninni.
Sjálfboðaliðar að störfum