Fréttablaðið - 27.11.2010, Blaðsíða 100
68 27. nóvember 2010 LAUGARDAGUR
Einfalt
og girnilegt
Íslenska kokkalandsliðið hefur staðið í stór-
ræðum undanfarið. Í vikunni sem leið keppti
landsliðið á HM í matreiðslu og gekk afar vel.
Fyrir kalda borðið hlaut það silfurverðlaun,
fyrir heita matinn gull en þegar á heildina var
litið lenti liðið í sjöunda sæti. Landsliðið gaf
sömuleiðis nýverið út matreiðslubókina Einfalt
með kokkalandsliðinu og Fréttablaðið birtir
hér nokkrar uppskriftir úr henni, skreyttar ljós-
myndum Árna Torfasonar ljósmyndara.
Lykilatriði í matreiðslubók
kokkalandsliðsins er að í hvern
rétt þarf aðeins fjögur hráefni,
sem gerir matseldina skapandi
og innkaupin sáraeinföld.
Þar fyrir utan er gert ráð fyrir
að notandinn eigi nokkur
grunnhráefni; salt, pipar,
hveiti, sykur, olíu, kraft, smjör
og mjólk. Góð ráð til að
breyta og bæta réttina fylgja
svo flestum réttum. Matarrit-
stjórn var í höndum Bjarna
G. Kristinssonar og Fritz M.
Jörgenssonar en ljósmyndir
og umbrot á könnu Árna
Torfasonar.
■ AÐEINS FJÖGUR HRÁEFNI
BLÓMKÁLSSÚPA MEÐ
BLÓMKÁLSKURLI
1. 1½ blómkálshaus
2. 400 ml rjómi
3. 400 ml nýmjólk
4. safi úr hálfri sítrónu
Í eldhúsinu:
kraftur (t.d. kjúklingakraftur)
salt
Skerum heila blómkálshausinn í bita og setjum í pott
með mjólk og rjóma. Látum allt sjóða þar til kálið verður
mjúkt undir tönn. Maukum súpuna í blandara og setjum
maukið svo aftur út í pottinn til að þykkja súpuna. Notum
salt, kraft og sítrónusafa til að laða bragðið fram. Rífum
svo hálfa blómkálshausinn með grófu rifjárni og myndum
þannig kurlið sem við sáldrum yfir súpuna. Berum fram
með grófu brauði og smjöri.
REYKÝSUPLOKKFISKUR
MEÐ BLAÐLAUK
1. 600 g reykt ýsuflök (roð- og beinlaus)
2. 400 g kartöflur
3. 1 peli matreiðslurjómi
4. 1 blaðlaukur
Í eldhúsinu:
100 g smjör
salt og pipar
Sjóðum kartöflurnar. Skerum blaðlaukinn langsum og skolum
hann undir köldu vatni. Skerum laukinn svo í bita og ýsuna
í litla kubba. Setjum smjör í pott og eldum blaðlaukinn við
vægan hita í um fimm mínútur eða þar til hann er orðinn
mjúkur í gegn. Bætum svo fiski og rjóma út í pottinn. Þegar
fiskurinn er tilbúinn, eftir um 10 mínútur, tökum við kartöflurnar
heitar úr pottinum og stöppum þær saman við fiskinn. Bragð-
bætum með salti og pipar.
Í staðinn fyrir rjóma má nota sojarjóma, með honum verður
rétturinn léttari og enn hollari. Notaðu það grænmeti sem
þú átt til að bæta í réttinn með blaðlauknum, til dæmis
papriku, gulrót eða rófu.
STÖKKT FRANSKBRAUÐ
1. 600 g hveiti
2. 25 g pressuger (eða þurrger)
Í eldhúsinu:
250 ml vatn við stofuhita
1 tsk. salt
Leysum gerið upp í hluta af volga vatninu og hrærum svo hveiti og afganginum
af vatninu saman við. Hnoðum deigið í 5-10 mínútur, látum það svo hefast í
tvær klukkustundir. Bökum við 220 gráður í 10 mínútur, lækkum ofninn í 180
gráður og bökum áfram í 15-20 mínútur eða þar til brauðið er fallega brúnt og
stökkt.
Ef við gerum bollur úr deiginu bökum við það áfram í 7-10 mínútur í stað
15-20 mínútna.
LAMBASKANKAR
Í RAUÐVÍNSSÓSU
1. 4 lambaskankar (leggir)
2. 500 ml rauðvín
3. 2 laukar
4. 100 g grænmeti (t.d. gulrætur, rófur, sellerí
eða hvað sem er)
Í eldhúsinu:
olía
kraftur (t.d. kjötkraftur)
salt og pipar
Hitum ofninn í 165 gráður. Hitum olíuna í víðum
þykkbotna potti sem þolir að fara í bakarofn.
Kryddum skankana vel með salti og pipar og
brúnum þá á öllum hliðum. Skerum nú laukana
í sneiðar og dreifum þeim á milli skankanna.
Hellum rauðvíni yfir. Kryddum til með salti, pipar
og krafti, hitum allt upp að suðumarki, leggjum
þá lok yfir og setjum í ofninn. Látum réttinn malla
í 2,5 klukkutíma. Bætum grænmeti saman við og
steikjum í 15-20 mínútur í viðbót. Smökkum soðið
og bragðbætum með pipar og salti eftir þörfum.
Berum kjötið fram með lauk, grænmeti og soði.
Ofnbakaðar kartöflur eða kartöflustappa bragðbætt
með hvítlauk fara mjög vel með þessu.
Það er gott að nota ítalskt krydd í þennan
rétt, til dæmis lárviðarlauf, basil eða rósmarín.
Lambaskankar eru enn betri ef maður setur þá í
10% saltlög í tólf klukkutíma og svo ferskt vatn
í tólf klukkutíma áður en þeir eru eldaðir. – Þeir
verða bragðmeiri og mýkri fyrir vikið.
HINDBERJA- OG FERSKJUDÚETT
1. 500 g frosnar ferskjur
2. 100 g frosin hindber
3. 500 ml jógúrt eða skyr (helst hreint)
4. agave-síróp
Í eldhúsinu:
120 ml mjólk
Blöndum saman ferskjum, sírópi, 375 g af jógúrt og 100
ml af mjólk í blandara og hellum blöndunni í fjögur glös.
Setjum svo hindberin og afganginn af mjólk og jógúrt
(eða skyri) í blandarann og setjum hræruna í glösin ofan
á ferskjublönduna.