19. júní - 19.06.2002, Side 15

Flutt við opnun afmælissýningar Bandalags kvenna í Reykjavík
í Ráðhúsi Reykjavíkur 1. júní 2002.
skorar á, segir til, safnar
klappar gömul fjöll
svo þau Ijúkast upp
þér dettur alltaf heilt í hug
og mig langar til að sníða þér skósítt pils
sauma í það alla söguna
alla fallegu dagana
og gleymdu nöfnin
vangasvip hverrar konu
ekki fyrir þig, því ég veit þú manst allt
nei, mest fyrir okkur hin
sem sveiflumst í nafnlausum köðlum
og sýnist allt ganga
sjálfkrafa upp
við höldum okkur fast
við getum líka orðið sterk
og hjálpað
ef þú þarft á að halda
þú ert fjallkonan
þú ert freyjan
sem brýtur mér leið um borgir
smáa, stóra og nýtekna hringi
handa mér
ef ég þarf á að halda
það klingir ekki hátt í hælunum
og oft ferðu um í rökkri
en að morgni hafa stígar verið lagðir
og ef einhver spyr
segjast fáeinir kettir hafa séð þig fara hjá
aðrir ekki
ég dreg að mér ilm af liljum
þar sem þú hefur farið um stéttir
með fléttur
þú ert sumargjöfin mín
og hvötin
en stundum finnst mér samt
þú tala of lengi
bylta of mörgum bollum og skeiðum
það er þegar ég man ekki
í svipinn
að í hlátri og dúkuðum borðum
býr galdur
um það vitna allar þínar bækur
gleymdu að ég hafi nokkurn tíma efast
mundu að ég var að vakna af draumi
þar sem kona í skósíðu pilsi
var komin undir nírætt
að morgni
og greinar svignuðu af krönsum og orðum
sem við nánari skoðun
voru ávextir til gjafa
en konan þáði ekkert sjálf
ég er fugl á grein
ég er tár og mjöll
vertu hjá mér enn
ég verð hjá þér.
Sigurbjörg Þrastardóttir
15