Vera - 01.12.1983, Síða 9

Ungar stúlkur, sem nú eru að komast á kynþroskaaldur vita
ekki hvernig ástandið var og hvernig konum var mismunað
áður en lög um kynfræðslu og fóstureyðingar voru sett árið
1975. Það er í okkar verkahring að upplýsa þær um það en ekki
misviturra siðgæðispostula. Þess vegna höfum við myndað
MOT
VÆGI
gegn þeim, sem vilja hverfa aftur til ólöglegra fóstureyðinga.
Eins og alþjóö mun kunnugt hefur þaö veriö árviss atburður nú
um nokkurn tíma að fram komi á alþingi frumvarp um að skerða til
muna rétt kvenna til fóstureyðinga. Gagnvart slíkum tillöguflutningi
þurfa konur að vera á varðbergi og mynda mótvægi gegn þeim sem
vilja hverfa aftur til ólöglegra fóstureyðinga.
Og konur hafa myndað slíkt mótvægi. Á sl. vori tóku sig saman
nokkrar konur úr öllum stjórnmálahreyfingum og settu á laggirnar
samstarfshóp til að vinna að aukinni kynfræðslu og gegn þrengingu
á réttinum til fóstureyðinga. Þessi hópur er enn starfandi og fylgist
náið með öllu sem gerist.
Tillögur að fræðsluherferð
í sumar sendi hópurinn bréf til heilbrigðisráðherra og mennta-
málaráðherra, þar sem lagt var til að gert verði sérstakt átak í
fræðslu um kynferðismál. I bréfinu bendir hópurinn á þá þversögn
sem fram er komin í umræðum um þessi mál hér á landi, ,,þ.e. að
rætt er um þörf á endurskoðun laganna frá 1975, þegar þessi lög
hafa enn ekki verið framkvæmd að fullu. Undirstöðuþáttur löggjaf-
arinnar, fræðslumálin, hefur að mestu verið sniðgenginn öll þessi
ár.“ Bendir hópurinn á, að samkvæmt lögunum ber yfirmönnum
mennta- og heilbrigðismála skylda til að sinna fræðslu og fyrir-
byggjandi starfi í kynferðismálum, m.a. í skólum landsins. Hafi
fjárskortur háð þá sé það vissulega mikill ábyrgðarhluti sem úr verði
að bæta.
Bréfi þessu fylgdu tillögur hópsins um hvernig standa mætti að
fræðsluherferð um kynferðismál t.d. meðal unglinga, en margt
bendir til þess að þeir hafi takmarkaða þekkingu á kynferðismál-
um og getnaðarvörnum. Tillögur þessar eru margvíslegar og verða
aðeins nefndar hér þær helstu.
1) Gerð verði fræðsluþáttaröð fyrir sjónvarp í 3-4 hlutum sem
fjalli um æxlun, getnaðarvarnir, kynlíf, kynsjúkdóma, rétt til fóstur-
eyðinga og foreldraábyrgð. Gert er ráð fyrir að þessir þættir verði
jafnframt notaöir í skólunum.
2) Landlæknir láti gera 2-3 sjónvarpsauglýsingar sem hvetji
unglinga til að nota getnaðarvarnir.
3) Landlæknir láti hanna 2—3 veggspjöld sem hafa sama markmið
og auglýsingarnar. Þessi spjöld verði m.a. hengd upp á öllum
samkomustöðum unglinga.
4) Gerður verði upplýsingabæklingur sem beinist að unglingum
15-19 ára.
5) Aðgangur unglinga að getnaðarvörnum verði bættur.
Landlæknir fékk bréf samstarfshópsins til umsagnar og fagnaði
hann þeim ábendingum og tillögum sem hópurinn setti fram. Lagði
hann til að hópurinn fengi aðild að samstarfsnefnd milli landlækn-
isembættisins, menntamálaráðuneytisins og fleiri aðila um heil-
brigðisfræðslu. Hefur hópurinn þegar tilnefnt einn fulltrúa í þessa
nefnd, en þegar þetta er skrifað hefur hún enn ekki tekið til starfa.
Fjármagnið verði þrefaldað
Samstarfshópurinn lét hins vegar ekki staðar numið við bréfa-
skriftir heldur fylgdi hann þeim eftir, með því að ganga á fund
menntamálaráðherra og heilbrigðisráðherra, til að gera þeim grein
fyrir sjónarmiðum hópsins. Jafnframt var farið á fund fjárveitinga-
nefndar Alþingis og farið fram á, að það fjármagn sem ætlað er á
fjárlögum m.a. til kynfræðslu yrði þrefaldað. Benti hópurinn fjárveit-
inganefndarmönnum á að þetta væri nauðsynlegt, ef það væri á
annað borð ætlun manna að framfylgja þeim lögum sem Alþingi
hefur sett.
Samstarfshópurinn mun eflaust hafa í mörg horn að líta á næst-
unni. Eitt af verkefnum hópsins er m.a. að láta til sín heyra í þeirri
undarlegu umræðu, sem fram fer á síðum dagblaðanna um fóstur-
eyðingar. Ungar stúlkur sem nú eru að komast á kynþroskaaldur
vita ekki hvernig ástandið var og hvernig konum var mismunað
áður en lögin voru sett 1975. Það er í okkar verkahring að upplýsa
þær um það, en ekki misviturra siðgæðispostula. Þær konur sem
hafa áhuga á þessum málum og vilja leggja okkur lið eru að
sjálfsögðu velkomnar í okkar hóp. Auðveldasta leiðin til að komast í
samband við okkur er að hringja í einhverja af eftirtöldum: Ásdísi
Rafnar s. 20180, Elínu G. Ólafsdóttur s. 32243, Svövu Guðmunds-
dóttur s. 38975 eða Vilhelmínu Haraldsdóttur s. 39182.
-isg.
VEISTU ...
að við krefjumst þess að yfirvöld
sinni lagalegri skyldu sinni!