Almanak Hins íslenska þjóðvinafélags - 01.01.1982, Blaðsíða 149

dagheimilum við Fálkabakka og Hálsasel í Breiðholti.
Skóladagheimili tóku til starfa í Blöndubakka í Breiðholti og
í Austurbæjarskólanum. Barnavinafélagið Sumargjöf hóf
byggingu barnaheimilis í Skólavörðuholti í stað Grænu-
borgar. í Árbæjarhverfi og Breiðholtshverfi var unnið að
félagsheimilum. Hafnar voru framkvæmdir við að breyta
Tónabæ í æskulýðsmiðstöð. Hafin var bygging skátamið-
stöðvar við Snorrabraut. Unnið var að húsi Bandalags há-
skólamanna við Lágmúla. Ýmsar framkvæmdir voru á
íþróttasvæðum Reykjavíkur, t. d. í Laugardal. Félagsheimili
íþróttafélagsins Þróttar við Sæviðarsund var formlega tekið í
notkun 4. júní, og er þar einnig æskulýðsmiðstöð. Nefnist
það Þróttheimar. Lokið var að mestu gerð útisundlaugar í
Breiðholti. Hafin var bygging þjónustumiðstöðvar fyrir
skíðafólk í Bláfjöllum. — Unnið var að Þjóðarbókhlöðunni á
Melunum og Borgarleikhúsinu í Kringlumýri. Hafin var
bygging húss Listasafns ríkisins við Fríkirkjuveg. Umbætur
voru gerðar á Ráðherrabústaðnum við Tjarnagötu. Unnið
var áfram að byggingu stórhýsis Framkvæmdastofnunar
ríkisins við Rauðarárstíg. Mörg iðnaðar-, verzlunar- og
skrifstofuhús voru í smíðum víðs vegar un bæinn. Unnið var
að þjónustumiðstöðinni á Ægisgarði. Hafin var bygging
frystigeymslu Bæjarútgerðar Reykjavíkur á Ægisgarði.
Fiskmjölsgeymslur voru reistar í Örfirisey. Unnið var að
lokaframkvæmdun við nýja verzlunarhúsið á Lækjartorgi,
og eru þar veitingastaðir, verzlanir og skrifstofur auk húsa-
kynna fyrir Strætisvagna Reykjavíkur. Unnið var áfram að
byggingu „Húss verzlunarinnar“ í Kringlumýri. Lokið var að
mestu skemmu Tollvörugeymslunnar í Laugarnesi. Hafin
var bygging stórhýsis prentsmiðjunnar Odda við Höfða-
bakka. Hafin var bygging húss Rafmagnsveitu Reykjavíkur
við Suðurlandsbraut. Stórhýsi Osta- og smjörsölunnar við
Bitruháls var tekið í notkun. Hafin var bygging húss öl-
gerðarinnar Egils Skallagrímssonar við Vesturlandsveg.
Unnið var að háhýsi í Mjóddinni vestan Breiðholts, og verða
þar bæði skrifstofur og íbúðir. Unnið var að ýmsum fram-
kvæmdum í Bernhöftstorfunni, og var þar m. a. opnaður
(147)