Læknablaðið - 15.10.1988, Síða 38

332
LÆKNABLAÐIÐ
Þá telur stjórnin ótækt, að sérstakir læknar verði
ráðnir til starfa á göngudeildum sjúkrahúsa.
Göngudeildarstörf eiga, m.a. af faglegum
ástæðum, að vera í höndum þeirra lækna, sem að
öðru leyti starfa á sjúkrahúsinu og hafa að öllu
jöfnu haft með viðkomandi sjúkling að gera.
Tengsl sjúkrahúsa og heilsugæslustöðva
í markmiði 24 og í Fylgiskjali I vegna M 24 er
m.a. fjallað um tengsl milli sjúkrahúsa og
heilsugæslustöðva. Er rætt um bein tengsl og að
sérfræðingar og göngudeildir sjúkrahúsa í
Reykjavík og á Akureyri verði tengd ákveðnum
heilsugæsluumdæmum. Ennfremur að »komið
verði upp sérstöku kerfi farandsérfræðinga í þeim
sérgreinum, þar sem það er álitlegt«.
Stjórn Læknafélags íslands bendir á, að náin og
bein tengsl myndast milli heilsugæslustöðva og
sjúkrahúsa, sem eru innan seilingar, hvort sem
þau eru innan eða utan tiltekins
heilsugæsluumdæmis. Stjórnin telur hæpið að
fastsetja þessi tengsl með valdboði, þar sem þau
ákvarðast fyrst og fremst af þeirri
sérfræðiþjónustu, sem sjúkrahús hefur á
boðstólum. Stjórnin leggur eindregið til, að
samskiptatengsl fái að þróast án opinberrra
afskipta. Þá telur stjórnin hugmyndina um
farandsérfræðinga ekki fýsilega nema á mjög
sérhæfðum sviðum og því aðeins, að aðrir kostir
bjóðist ekki.
Meðferðaráætlanir
í markmiði 19 og í Fylgiskjali I vegna M 19 er
m.a. rætt um meðferðaráætlanir. Stjórn félagsins
er ekki fullljóst, hvað þarna er átt við og telur
fráleitt að setja fastar reglur um áfanga í
meðferð, sem segðu fyrir um úrræði, sem lækni
væri heimilt eða skylt að nota við tiltekin
sjúkdómstilvik, hvort sem um væri að ræða
rannsókn, ráðgjöf, lyfjaávísun,
handlæknisaðgerð eða annað. Stjórnin telur slíkt
fyrirkomulag stuðla að því að færa
ákvörðunartöku frá lækni yfir á ópersónulegt
ríkisvald og þar með fyrirgera faglegri ábyrgð
hans. Aftur á móti væri ávinningur í því, að
heilbrigðisyfirvöld gæfu út og kynntu
samræmdar leiðbeiningar um tiltekin
meðferðarkerfi, enda væri þá tryggt, að þær
væru endurskoðaðar í samræmi við þekkingu
hvers tíma.
Stofnun forvarna- og heilbrigðisfræðslu
{ markmiði 5 segir: »Komið verði á fót stofnun
forvarna- og heilbrigðisfræðslu.« Stjórn félagsins
telur þann kost vænlegri að fela þessi verkefni
landlækni, jafnvel með stofnun sérstakrar deildar
við hans embætti.
Líkamsrækt og þjálfun
Upphafssetning í kafla 4.5. hljóðar þannig:
»Samstaða er um að líkamsrækt og líkamleg
þjálfun sé undirstaða heilbrigði.« Stjórn
Læknafélags íslands telur, að hér sé ofsagt.
Setningin væri betur orðuð þannig: »Samstaða er
um, að líkamsrækt og líkamleg þjálfun sé ein af
undirstöðum heilbrigði.
Fíkniefni
í 4. kafla áætlunarinnar er m.a. fjallað um
skaðsemi tóbaksnotkunar og skaðleg áhrif
áfengis. Hins vegar er hvergi í áætluninni að finna
umfjöllun um önnur fíkniefni og skaðsemi þeirra.
Stjórnin telur fulla þörf á því, að i íslenskri
heilbrigðisáætlun sé einnig fjallað um þá vá, sem
að íslendingum stefnir nú með hinum
»nýtískulegri« fíkniefnum.
Um markmið 12
Stjórn félagsins telur, að í stað upphafsorðanna:
»í heilsugæslunni...« eigi að standa:
»í heilbrigðiseftirlitinu...«.
Jónandi geislar
Stjórn Læknafélags íslands fagnar því, sem segir
í markmiði 13, að »leggja skal áherslu á, að fólk
verði fyrir minni jónandi geislun en nú er». Til
þessa hefur nánast verið ógerlegt að fá fjármagn
til endurnýjunar röntgentækja. Kunnugt er, að
núverandi búnaður er kominn mjög til ára sinna
og úr sér genginn og uppfyllir ekki lengur kröfur
tímans um geislavörn. Vonandi verður þessi
áherslupunktur í markmiði 13 til þess, að
röntgentækjabúnaður hér á landi verði
endurnýjaður hið fyrsta.
í Fylgiskjali I með íslenskri heilbrigðisáætlun
vegna M 13 segir í lið 2: »Reglur verði settar um
notkun röntgengreiningar og leitað leiða til
minnkandi geislunar við rannsóknir.«
Stjórnin telur, að ekki verði settar aðrar reglur
um röntgengreiningu en þær, sem sérfræðingar í
læknisfræði, ekki síst sérfræðingar í
geislagreiningu, setja sér í starfi í samræmi við
bestu þekkingu á hverjum tíma.
Læknar á Hl-stöðvum
Stjórn félagsins fagnar áformum, sem fram koma