Læknablaðið - 15.12.1989, Page 24

396
LÆKNABLAÐIÐ
t
JÓN INGIMARSSON
FÆDDUR 27. OKTÓBER 1923
DÁINN 2. SEPTEMBER 1989
Jón Ingimarsson skrifstofustjóri heilbrigðis- og
tryggingamálaráðuneytisins lést 2. september
síðastliðinn langt um aldur fram. Hér verður í
stuttu málí rakinn starfsferill hans og lífshlaup.
Jón fæddist að Mosfelli í Grímsnesi 27.
október 1923. Faðir hans, Ingimar Jónsson,
var þá prestur þar, en hann varð síðar
skólastjóri í Reykjavík. Móðir Jóns var
Elínborg Lárusdóttir, húsfreyja og rithöfundur.
Jón ólst upp í Reykjavík og lauk stúdentsprófi
frá stærðfræðideild Menntaskólans í Reykjavík
vorið 1943. Jón hugðist nema læknisfræði
en varð að hverfa frá námi vegna berkla, og
þegar dráttur varð á háskólanáminu innritaðist
hann í lögfræðideild og lauk lögfræðiprófi
frá Lagadeild Háskóla íslands í janúar 1953.
Hann starfaði fyrst eftir lögfræðiprófið við
sjálfstæð málflutningsstörf í Reykjavík og
lauk prófi héraðsdómslögmanns 1954, en
tók við starfi hjá Tryggingastofnun ríkisins
sem aðallögfræðingur stofnunarinnar 1954 og
gegndi því starfi til 1963.
Leiðir okkar Jóns lágu saman, þegar ég hóf
störf hjá Tryggingastofnun ríkisins 1960,
og sérstaklega urðu kynni okkar náin, þegar
við tókum, fyrir Islands hönd, sæti í nefnd
Norðurlandaþjóða, sem átti að reyna að
samræma örorkumat í slysatryggingum. Við
sátum saman í þeirri nefnd á árabilinu 1960 til
1964 og var einn læknir og einn lögfræðingur
frá hverri þjóð í nefndinni.
Jón fór til framhaldsnáms í Noregi í
tryggingafræðum 1961-62 og stóð því vel að
vígi að starfa að þessum málum þá.
Nefndarálit þessarar nefndar kom út sem bók
f árslok 1963 og var lögð fram á 6. Norræna
almannatryggingamóti í Kaupmannahöfn 1964.
Jón breytti um starf 1964 og tók þá við að
nýju að reka lögfræðiskrifstofu í Reykjavík, en
annaðist jafnframt ýmis konar viðskiptastörf
og fasteignasölu.
Þessa starfsemi rak hann fram á árið 1970.
Það ár lágu leiðir okkar Jóns saman að nýju.
Með nýjum stjómarráðslögum 1969 var nýtt
ráðuneyti heilbrigðis- og tryggingamála,
stofnað frá 1. janúar 1970. Þegar ég hafði
verið skipaður ráðuneytisstjóri í því ráðuneyti,
leitaði ég til Jóns í samráði við þáverandi
heilbrigðisráðherra um að hann kæmi til starfa
í hinu nýja ráðuneyti sem skrifstofustjóri, þar
sem enginn þeirra lögfræðinga sem að þessum
málaflokkum unnu í dómsmálaráðuneyti
og félagsmálaráðuneyti komu til starfa í
ráðuneytinu.
Það varð úr, að Jón tók að sér þetta starf og
frá 1. september 1970, eða rétt 19 ár, þegar
hann lést, höfðum við unnið saman að þessum
tveimur málaflokkum.
Þegar ég leitaði til Jóns um að koma til
starfa var það vegna þess, að ég vissi, að
mikilvægt var að fá til starfa í ráðuneytinu
sem skrifstofustjóra mann, sem hefði annars
vegar yfirgripsmikla reynslu og þekkingu
í lögfræði og hins vegar samstarfsmann,
sem ég vissi að auðvelt væri að vinna með í
uppbyggingu ráðuneytisins.
Það gekk eftir, sem ég hafði haldið og öll
þessi ár hefur samvinna okkar Jóns verið eins
góð og best verður á kosið og aldrei borið
nokkum skugga á góða samvinnu.