Kjarninn - 07.11.2013, Síða 4
01/01 kjarninn Leiðari
V
igdís Hauksdóttir, þingmaður Framsóknar-
flokksins og formaður fjárlaganefndar
Alþingis, vill hegna íslenskum námsmönnum
sem ekki snúa aftur til baka til landsins að
námi loknu, með því að láta þá borga markaðs-
vexti af námslánum sínum. Óþarfi er að fjölyrða um af-
leiðingar slíkrar firru á hag íslenskra námsmanna erlendis,
en vangaveltur Vigdísar eru enn einn sorglegi vitnis-
burðurinn um þjóðrembu Framsóknarflokksins.
Rök Vigdísar um að velta skuli við öllum steinum vegna
fjárskorts íslenska ríkisins eru áhugaverð, sérstaklega í
ljósi þess að stjórnvöld afþökkuðu pent tugmilljarða króna
skatttekjur frá ferðaþjónustunni og útgerðinni með lækkun
veiðileyfagjaldsins og afnámi virðisaukaskattshækkunar á
gistinætur. Þetta er sami þingmaðurinn og lofaði rausnar-
legri tugmilljarða króna innspýtingu inn til Landspítalans
í aðdraganda alþingiskosninga, sem síðan kom auðvitað á
daginn að voru orðin tóm.
Vangaveltur Vigdísar byggjast ekki síst á þeim þanka-
gangi sem Framsóknarflokkurinn vill fóðra hjá almenningi,
að hinn stóri ljóti heimur vilji klekkja á Íslendingum. Hann
muni gleypa okkur í einum munnbita um leið og við göngum
inn í Evrópusambandið, og svo vilji hann líka stela mennta-
fólkinu af okkur, sem við kostuðum til náms með blóði,
svita og tárum. Og menntafólkinu beri að refsa fyrir að velja
útlendinga fram yfir samlanda sína.
Framsóknarflokkurinn sigraði í alþingiskosningunum
með því að lofa peningum frá kröfuhöfum föllnu bankanna
til handa skuldugum. Eins og flestir vita eru samningar við
kröfuhafana algjör lykilforsenda fyrir afnámi gjaldeyris-
haftanna, sem halda lífi í andvana íslenskri krónu, og
skuldaleiðréttingu Framsóknarflokksins. Sigmundur Davíð
Gunnlaugsson forsætisráðherra, sem ekki tekur mark á
útlenskum skammstöfunum, hefur talað í þá veruna að
Íslendingar muni aldrei beygja sig undir ljótu karlana í út-
löndum sem keyptu kröfur á föllnu bankana. Hart verði tekið
á þessum hrægömmum. Þannig hefur hann stillt upp ljóta
útlenska bisnessfólkinu andspænis íslensku þjóðinni, og það
hefur tekist.
Til marks um taktleysi stjórnarleiðtoganna í þessum efn-
um sagði forsætisráðherra í nýlegu viðtali að hann ætti von
á því að samningaviðræður við kröfuhafanna tækju langan
tíma. Skömmu áður sagðist Bjarni Benediktsson fjármála-
ráðherra vonast til að hægt yrði að sjá til lands varðandi
afnám haftanna í apríl. Forsætisráðherra vísaði á bug ásök-
unum um óeiningu og sagði þá Bjarna fullkomlega sammála
um að afnám haftanna gætu tekið stuttan og langan tíma.
Engin áhöld væru um það í ríkisstjórninni.
En landinn er farinn að ókyrrast. Framsóknarflokkurinn
hefur nefnilega nagað í væntingar þeirra sem kusu hann
til valda undanfarnar vikur og mánuði. Á meðan þegir
samstarfs flokkurinn þunnu hljóði og er varla til svara um
boðaðar aðgerðir, hann er kannski bara að vona að fólk
gleymi? Það er farið að örla á óþreyju og pirringi hjá land-
anum, jafnvel örvæntingu um að skuldaniðurfærslan verði
hvorki fugl né fiskur. Raunsæi getur nefnilega alveg eyðilagt
fyrir manni daginn.
Svo er auðvitað slatti farinn í fýlu. Fylgi Framsóknar-
flokksins hefur minnkað um nærri tíu prósentustig frá
kosningunum samkvæmt nýlegum þjóðarpúlsi Capacent.
Flokkurinn hefur bent á fjölmiðla sem helsta orsakavaldinn,
þeir séu beinlínis vondir við Framsóknarflokkinn. Meira
að segja hefur því verið hótað að skera niður fjárframlög til
ríkismiðilsins girði hann sig ekki í brók. Ætli ráðaleysi ríkis-
stjórnarinnar í boðuðum skuldaaðgerðum, þjóðrembu og
gaspri Vigdísar Hauksdóttur sé þó ekki helst um minnkandi
fylgi Framsóknarflokksins og ríkisstjórnarinnar að kenna.
Heimurinn vill ekkert klekkja á okkur, þó að Framsóknar-
flokkurinn vilji telja okkur trú um það. Tökum á vanda-
málum okkar, forgangsröðum og byggjum upp að nýju, þá er
ekkert að óttast.
Hinn stóri
ljóti heimur
Leiðari
Ægir Þór Eysteinsson
aegir@kjarninn.is
Deildu með
umheiminum
Laugavegi 71, 101 reykjavík
Sími 551-0708
kjarninn@kjarninn.is
www.kjarninn.is
Ritstjóri: Þórður Snær Júlíusson
Framkvæmdastjórar: Gísli Jóhann
eysteinsson og Hjalti Harðarson
Kjarninn miðlar ehf.
gefa Kjarnann út.