Húnavaka - 01.05.1961, Síða 55

HÚNAVAKA
53
Skátahreyfingin.
Upphaf skátahreyfingarinnar er það, að enskur herforingi úr Búa-
stríðinu, fór með nokkra Lundúnadrengi í útilegu á óbyggða ey, árið
1907. Tilgangurinn var að leyfa þessum stórborgardrengjum að komast
út í náttúruna og læra að bjarga sér á eigin spýtur. Herforinginn, sem
hét Baden Powell, var þá nýkominn frá Afríku og þótti að vonum lífið
hafa breytzt frá frjálsu útilífi Afríkubúa í tilbreytingarlaust götulíf stór-
borgarinnar.
Þessi tilraun bar svo góðan árangur, að haldið var áfram á sömu
braut. Baden Powell setti hreyfingu þessari reglur og skipulagði starfið.
Þessi hreyfing fór eins og eldur í sinu um flest öll þjóðlönd, og nú
starfa skátafélög í flestum þeim löndum, sem félagafrelsi er í.
Hreyfing þessi náði einnig til stúlkna, en þær starfa yfirleitt í sérfélög-
um. Aðeins örfá lönd leyfa samfélög stúlkna og pilta og var Island meðal
fyrstu landa, sem slíkt leyfði.
Árið 1938 var drcngjaskátafélag stofnað hér á Blönduósi, að áeggjan
Karls Helgasonar póst- og símstöðvarstjóra. Nokkrum árum síðar var
stofnað skátafélag stúlkna. Þessi félög störfuðu hvort um sig um áratug.
Aftur var stofnað skátafélag drengja 1958 og árið eftir gengu stúlkur
í félagið og starfar þetta félag vel eins og stendur.
I stuttu máli er tilgangur skátastarfsins að gefa unglingum tækifæri til
þess að fullnægja athafnaþörf sinni í hollu umhverfi, þar sem áherzla er
lögð á orðheldni, hjálpsemi og virðingu fyrir guðstrú og þjóðlegum verð-
mætum.
Skátar starfa saman í flokkum 5-8 saman og eru þeir heild út af fyrir
sig. Hver og einn hefir ákveðið starf að inna af höndum og enginn verð-
ur utanveltu. Skátar taka mörg próf, sem eiga það öll sameiginlegt að
gera þá hæfari í lífsbaráttunni og um leið gerir þeim auðveldara að
standa við kjörorð sitt, sem er „Vertu viðbúinn" hverju sem að höndum
kann að bera.
En þótt margt sé starfað í skátafélögunum, þá er þó fyrst og fremst
glaðværð og fjör, sem mótar skátastarfið, en jafnframt umburðarlyndi.
Allir skátar eru tengdir bræðraböndum sameiginlegra hugsjóna, án
tillits til skoðana, stétta, litar eða trúar. Skátafélögin stuðla þess vegna
að því að ná hinu þráða markmiði mannkynsins:
Friði á jörð.
Jón Isberg