Dagblaðið Vísir - DV - 24.06.2011, Blaðsíða 50

50 | Lífsstíll 24.–26. júní 2011 Helgarblað
U
m áramótin hóf göngu sína í annað
sinn verkefni sem Ferðafélag Íslands
kallar Eitt fjall á viku, eða 52 fjöll á
ári. Verkefnið fékk ákaflega góðar
móttökur árið 2010 og um þessi ára-
mót varð ekkert lát á. Frá áramótum
hafa ríflega 100 manns gengið á fjöll í
hverri viku og þjálfað líkama sinn og sál
til þess að gera heilbrigða útivist að lífs-
stíl sínum.
Umsjón með verkefninu hefur verið
í höndum Páls Ásgeirs Ásgeirssonar og
Rósu Sigrúnar Jónsdóttur, eiginkonu
hans. Hjónin Þórður Marelsson og Fríð-
ur Halldórsdóttir ásamt Hjalta Björns-
syni hafa einnig verið fastir fararstjórar í
göngum hópsins.
Í verkefni eins og þessu fá þátttak-
endur það aðhald sem skipulögð dag-
skrá á heilu ári veitir. Þeir fá að kynn-
ast eigin getu og upplifun í fjallgöngum
við alls konar aðstæður og þekkja bæði
sjálfa sig og íslenska náttúru betur eftir
þau nánu kynni. Af ferðafélögum sínum
og reynslu fararstjóra fræðast þátttak-
endur um búnað í gönguferðum, nesti,
þjálfun og afla sér gegnum reynslu
margvís legrar þekkingar sem nýtist vel í alhliða
útivist. Þannig má vel halda því fram að þátt-
taka í verkefni eins og þessu sé afbragðs leið til
þess að hefja þátttöku í fjallgöngum og útivist
eða endurvekja fjallagarpinn í sér sem ef til vill
hefur legið í dvala um hríð.
Síðast en ekki síst sannast í hópverkefnum
eins og þessum að maður er manns gaman.
Fátt bindur sálir manna betur saman en að
ganga saman á fjöll í öllum þeim margbrotnu
veðrum og vindum sem duttlungar náttúr-
unnar úthluta göngugörpum hverju sinni.
Hópurinn er ákaflega litríkur og skemmtileg-
ur þverskurður af samfélaginu og þarna koma
saman menn og konur með fjölbreytta reynslu
og sérþekkingu í sínu farteski. En á fjöllum eru
allir jafnir frammi fyrir verkefnum dagsins og
allir leggja sitt af mörkum til þess að gera hverja
gönguferð að ævintýri.
Fagnað í Þórsmörk
Um þarsíðustu helgi fór þessi stóri hópur
Ferðafélags Íslands í Þórsmörk til þess að safna
fjöllum. Ferðast var með langferðabifreiðum
til þess að upplifa þá einstöku stemningu sem
skapast þegar stór hópur er saman á ferð. Í
morgunljómann var lagt af stað og mátti sjá
bros eftirvæntingar og tilhlökkunar á hverjum
vanga. Ferðafélagið hefur haft bækistöð í Skag-
fjörðsskála í Langadal frá 1954 og þaðan hlykkj-
aðist langur ormur 100 göngumanna kl. 11.00 á
sunnudag og þræddi Slyppugil og Tindfjallagil
áleiðis inn á Rjúpnafell. Skógurinn á Þórsmörk
er sprunginn út og ilmar af sama þunga og
þegar Steinfinnur Reyrketilsson nam þar land
í boði Ásbjarnar bróður síns bónda á Einhyrn-
ingsflötum.
Hópurinn hrósaði sigri á Rjúpnafellinu og
naut frábærs útsýnis yfir lendur Þórsmerkur og
menn glöggvuðu sig á fjallatindum Fjallabaks
og Emstra sem lágu eins og útbreitt landakort
fyrir fótum göngumanna. Þaðan var svo haldið
til baka að austurenda Tindfjalla í Þórsmörk
sem alls ekki má rugla saman við hin tignar-
legu Tindfjöll sem standa föstum fótum norðan
Markarfljóts. Göngumenn rifu sig upp á tinda
þeirra og fóru sem hind væri eftir eggjum en
svo stystu leið niður á Stangarháls og ultu ölv-
aðir af birkiilm niður á Krossáraura við Stóra-
enda.
krossá Þrengir að
Nokkuð þrengdi að göngumönnum á leiðinni
út í Langadal á ný því Krossá liggur að þessu
sinni þétt við hlíðina og máttu menn þræða fá-
farna skógarstíga til að komast leiðar sinnar og
bæta við sig nokkrum hæðarmetrum.
Rétt um kvöldmat komu þreyttir en sælir
göngugarpar í Langadal eftir nærri 16 kílómetra
göngu um tvo tinda og náðu samtals 1.199
metra hækkun. Um kvöldið var svo sögustund á
kvöldvöku í skála og söngur fyrir svefninn.
goðalandið Heillar
Daginn eftir tóku menn saman sitt púss og
kvöddu Langadal. Rútur fluttu flokkinn yfir að
Básum þar sem Útivist hefur sínar bækistöðvar.
Þaðan var gengið á hinn snarbratta Útigöngu-
höfða sem gnæfir yfir kjarrivöxnum dalverp-
um Básanna. Uppi á höfðanum sást vel til hins
rjúkandi Goðahrauns sem rann úr Magna á
Móða á Fimmvörðuhálsi en hvel Eyjafjallajök-
uls til skiptis hvít af nýsnævi eða móleit af ösku
úr Grímsvötnum böðuðu sig í himinblámans
fagurtærri lind.
Af Útigönguhöfða stormuðu menn og konur
yfir á Réttarfellið og þræddu þar hina tæpu stíga
þess yfir fjallið og ofan að Álfakirkju þar sem
rúturnar biðu. Þetta er feiknalega skemmtileg
gönguleið sem hlykkjast eftir fjallseggjum með
frábæru útsýni yfir Hvannárgilið og hina fjöl-
breyttu höfða og hausa sem einkenna vindsorf-
ið móbergslandslagið á Goðalandi og á Þórs-
mörk.
minnst við Jónas á dímon
Síðasta verkefni helgarinnar og fimmta fjall-
gangan var að ganga á Stóru-Dímon á Markar-
fljótsaurum. Þótt fjallið láti ef til vill ekki mikið
yfir sér þá rís það 120 metra yfir umhverfið
og alls 178 metra yfir sjó. Fágætt útsýni er af
Dímoni yfir sögusvið Njálssögu og sjónarsvið
Jónasar Hallgrímssonar þegar hann yrkir sitt
frægasta kvæði Gunnarshólma. Uppi á Dímoni
kom Páll Ásgeir ferðafélögum sínum svolítið á
óvart með því að fara með Gunnarshólma utan
bókar. Þótti mörgum sem þarna væri fundinn
eini rétti staðurinn til þess að flytja kveðskap
þennan því af Dímoni sést til allra staða sem
nefndir eru í kvæðinu og er þar hinn eiginlegi
hólmi með talinn.
HálFnaður Hópur
Með þessum leiðangri náði 52 fjalla hópur
Ferðafélags Íslands þeim merka áfanga að verk-
efnið er hálfnað og rúmlega þó því Dímon telst
vera fjall númer 27 á árinu. Þrjú fjöll til viðbótar
verða lögð að fótum áður en hópurinn tekur
sér sumarfrí en hefst svo handa og fóta á ný um
miðjan ágúst. Verkefninu lýkur svo væntanlega
á gamlársdag með kakódrykkju og hamingju-
óskum. Svo kveðjast allir með tárum og nýtt ár
hefst.
páll ásgeir ásgeirsson
Útivist
52 fjöll á ári
n Áfanga í verkefni Ferðafélags Íslands fagnað í Þórsmörk
í jafnvægi Þórður Marelsson fararstjóri FÍ í góðu jafn-
vægi á tindi Rjúpnafells. Tindfjöll í baksýn.
í morgunsól Garpar Ferðafélags Íslands á leið að
Rjúpnafelli í morgunsól um hvítasunnu.
100 þátttakendur Tæplega 100
glaðir þátttakendur í 52 fjalla verk-
efni Ferðafélags Íslands hnappast
saman á Rjúpnafelli í Þórsmörk.
réttarfell Göngumaður á leið á Útigönguhöfða fyrir
ofan Bása. Réttarfell í baksýn.
egg tindfjalla Göngumenn
feta sig eftir eggjum Tindfjalla í
Þórsmörk við Stóraenda.