Skírnir - 01.09.1994, Page 195

SKÍRNIR
STÆRÐFRÆÐI OG ALMENN MENNTUN
465
í öðru lagi má ef til vill réttlæta alla þessa stærðfræðikennslu
með því að sýna fram á að hún hafi ekki aðeins notagildi heldur
líka menntagildi því menn botni ekkert í umhverfi sínu nema þeir
kunni töluverða stærðfræði.
I þriðja lagi er því haldið fram að stærðfræði efli rökrétta
hugsun og mikil stærðfræðikennsla auki því líkurnar á að menn
hugsi skynsamlega um alls konar efni önnur en stærðfræði og
taki jafnvel að hegða sér viturlega.
I því sem á eftir fer ætla ég að skoða þessi þrenns konar rök og
sýna fram á að þótt þau séu ef til vill ekki alveg úr lausu lofti
gripin þá réttlæti þau ekki stærðfræðikennslu af því tagi sem
þorra framhaldsskólanema er boðið upp á.
4. Hagnýti og menntagildi
Það er samfélaginu nauðsynlegt að til sé allnokkur hópur manna
sem kann mikið í stærðfræði. Þótt flest fólk þurfi ekki að nota
mikla stærðfræði þá kann að vera gagnlegt að viðhalda mikilli al-
mennri kunnáttu í greininni til þess að auka líkur á að nógu
margir komist langt, verði sérfræðingar í stærðfræðilegum vísind-
um. Afburða tónlistarmenn eru líklegri til að koma fram þar sem
mikið er um söng og hljóðfæraleik meðal almennings heldur en
þar sem aldrei heyrist tónlist nema úr útvörpum og hljómflutn-
ingstækjum. Því skyldi ekki eitthvað svipað eiga við um stærð-
fræðina?
Það kann að vera töluvert til í þessum rökum. Ef meira væri
um að fólk ræddi um stærðfræði, skemmti sér við stærðfræði-
þrautir, bækur um stærðfræði væru til á flestum heimilum, sjón-
varpið sýndi fræðsluþætti um stærðfræði og svo framvegis þá
næðu sjálfsagt fleiri unglingar góðum árangri í greininni og fleiri
legðu stund á stærðfræðilegar vísindagreinar í háskóla. Ef stærð-
fræði væri, í vitund fólks, hluti almennrar menntunar á sama hátt
og saga eða landafræði þá gengi fleirum vel að læra hana.
Því miður virðist stærðfræðikennsla í framhaldsskólum ekki
hafa þessi áhrif. Hún hefur hingað til ekki dugað til þess að gera
aðra stærðfræði en einfaldasta reikning að hluta almennrar
menntunar. Hér gætu skólarnir ef til vill bætt úr. Ef þeir kenndu