Tímarit hjúkrunarfræðinga - 01.12.2009, Blaðsíða 28

Tímarit hjúkrunarfræ›inga – 6. tbl. 85. árg. 200924
Leiðsögumaðurinn. Síðustu árin hefur Ásta farið víða um landið með sveppaáhugafólk og segir hún
ferðirnar hafa verið sér mjög lærdómsríkar.
árum sem ég fór fyrst að leggja mig eftir
því að tína sveppi og þekkja tegundirnar,“
segir Ása um íslensku sveppina. Þeir
finnast einkum og helst í skóglendi, til að
mynda þjóðskógunum svonefndu sem
öllum eru opnir. Margir fara til dæmis
í sveppaferðir í Heiðmörkina þar sem
meðal annars má finna furusvepp en á
Austurlandi og nyrðra er lerkisveppur hvað
algengastur. Á þessu er samt engin algild
regla enda finnast sveppir líka sunnan­ og
vestanlands, svo sem í skóglendinu við
Mógilsá í Kollafjarðarbotni, í Borgarfirði
og fyrir austan fjall svo nokkrir staðir séu
nefndir.
Á ferð um landið
Í ferðaþjónustunni spretta sífellt upp ný
svið þar sem fólk leggur land undir fót til að
rækja áhugamál sín. Fuglaskoðunarferðir
njóta sífellt meiri vinsælda rétt eins og
leiðangrar þar sem fólk smakkar bjór,
kynnir sér jarðfræði, gengur á fjöll og
þannig mætti áfram telja. Þessu hefur
Ása kynnst en hún var nokkrum sinnum
í sumar og haust leiðsögumaður hópa
sem áhuga höfðu á að skoða og tína
sveppi sér til matar.
„Undanfarið hefur verið talsvert að gera hjá
mér sem leiðsögumaður sveppa áhuga­
fólks. Í ágúst fór ég afar skemmtilega
fimm daga ferð um Vesturland og
Vestfirði með hóp Svía sem allir hafa lengi
stundað sveppatínslu og lærði ég ekki
síður af þeim. Þá fór ég fyrir skipulagðri
gönguferð um sveppaslóðir í Heiðmörk
nú í september sem Skógræktarfélag
Reykjavíkur stóð fyrir og heppnaðist hún
vel og var fjölmenn.“
Fleiri bækur bíða
Ása Margrét Ásgrímsdóttir er svæfingar­
hjúkrunarfræðingur og hefur starfað
lengi sem slík. Fyrst var hún á Landa­
kots spítala allt þar til honum var breytt
í öldrunar stofnun. Um tíu ára skeið
eða allt fram til síðustu áramóta vann
hún á St. Jósefsspítala í Hafnarfirði
við svæfingarhjúkrun en hefur einnig
meðal annars unnið á gjörgæsludeild
Landspítalans í Fossvogi.
„Í fyrra var ég komin á þann tímapunkt í
lífinu að mig langaði til að snúa mér að
öðrum viðfangsefnum. Hafði líka svigrúm
til þess og ákvað að nýta mér það. Þá var
efst á blaði að ljúka við bókina góðu auk
þess sem fjölmörg önnur viðfangsefni
bíða. Ég er að vísu ekki alveg hætt
störfum sem hjúkrunarfræðingur því ég
vinn við svæfingar hjá barnatannlækni
nokkra daga í mánuði. Það er ekki
útilokað að ég skrifi fleiri bækur um
íslenska sveppi, til dæmis hvernig megi
úr þeim lita garn, auk þess sem ég hef
áhuga á að skrifa matreiðslubók þar sem
sveppir koma við sögu. Hvort af þessu
verður mun tíminn leiða í ljós.“
Fréttapunktur
Félag íslenskra hjúkrunarfræðinga styrkir ár hvert verðugt verkefni í stað þess að senda
jólakort til vina og velunnara. Í ár styrkir félagið Rauða kross Íslands um 200.000 kr. með
þeim tilmælum að styrkurinn verði nýttur fyrir bágstödd börn hér á landi.
Jólastyrkur FÍH 2009 veittur Rauða krossi Íslands