Tímarit hjúkrunarfræðinga - 01.02.2013, Blaðsíða 38

Tímarit hjúkrunarfræðinga – 1. tbl. 89. árg. 201334
haft jafn mikinn tíma aflögu til þess að
byggja starfsemina upp eins og þær
hefðu óskað. „Við fórum og hittum Elsu
og fleiri í félaginu og fengum ráðleggingar
hjá þeim. Svo þarf að senda tiltölulega
ítarlega tilkynningu til landlæknis. Þetta
er ferli sem er mjög gott að fara í gegnum
því að á Landspítala er hugsað fyrir
mann varðandi hvernig á að varðveita
gögn um sjúklinga og allt svoleiðis,“
segir Sólveig Helga. Þær hafa ekki gert
markaðsrannsókn en vita nokkurn veginn
hversu margir fara í kransæðavíkkun á ári.
Hins vegar getur hvaða hjartasjúklingur
sem er pantað tíma á móttökunni til
þess að láta fylgjast með sér. Spurningin
er því hvort þessi göngudeild gæti á
endanum sinnt fleirum en bara þeim
sem hafa farið í kransæðavíkkun. Þær
hafa hins vegar ekki hugsað sér að
taka við sjúklingum með annars konar
hjartasjúkdóma. „Göngudeild fyrir
hjartabilaða á Landspítala hefur til dæmis
gengið vel og það er frábært starf sem
þar fer fram. Við erum alls ekki að hugsa
um að seilast inn í þann hóp heldur viljum
við frekar efla samvinnuna,“ segir Hildur
Rut.
Framtíðin
Margt er eftir að gera til þess að móttakan
verki eins og þær Sólveig Helga og
Hildur Rut vilja hafa hana. „Fólk segir að
maður eigi að vera þolinmóður og það
tekur auðvitað tíma að byggja þetta upp.
Við sjáum samt aukningu frá mánuði
til mánaðar. Þetta kemur allt hægt og
rólega,“ segir Sólveig Helga. „Maður er
stundum svolítið einn að vinna og ég væri
til í að sjá meiri þverfaglega samvinnu. Ég
held að það væri betra fyrir sjúklinginn.
Svo vitum við ekki hvað gerist. Eftir að
við fórum út í þetta er eins og það opnist
alltaf fleiri og fleiri dyr, þetta vindur upp á
sig. Þetta er ótrúlega skemmtileg vinna
og gefandi starf. Hér eigum við samtal
við sjúklinginn en hjúkrunin hefur breyst
svo mikið á hjartadeild. Þar vinnum við
oft mjög verkhæfða hjúkrun og hlaupum
á milli rúma með lyf en hér fáum við tíma
til þess að setjast niður og tala við fólk
og hlusta,“ segir Hildur Rut. „Ég vona að
eftir tíu ár verðum við komnar í fullt starf
við þetta,“ bætir Sólveig Helga við.
Heilbrigðismál – kosningamál?
Í undanfara alþingiskosninga, sem fara fram í lok apríl, mun Félag
íslenskra hjúkrunarfræðinga leita svara frambjóðenda við nokkrum
spurningum um heilbrigðismál. Fjölda hjúkrunarfræðinga finnst sem
heilbrigðismál mæti afgangi í störfum Alþingis og ákvörðunum þess
auk þess sem áhugi alþingismanna fyrir stöðu heilbrigðiskerfisins og
þjónustu þess virðist hverfandi.
Skorið hefur verið kröftuglega niður í heilbrigðiskerfinu og þykir flestum
hjúkrunarfræðingum nóg um. Ekki er seinna vænna að velta fyrir sér
hvort íslenska ríkið hafi burði til að reka öflugt heilbrigðiskerfi með
óþreyttu og vel menntuðu starfsfólki. Sé svo þarf nú þegar að hefja
endurreisn þess.
Fréttapunktur