Tímarit hjúkrunarfræðinga - 01.02.2013, Blaðsíða 32

Tímarit hjúkrunarfræðinga – 1. tbl. 89. árg. 201328
MÆLIR FACEBOOK MEÐ ÞÉR?
Aðalbjörg J. Finnbogadóttir og Hildur Helgadóttir, adalbjorg@hjukrun.is
Kjarni hjúkrunar er umhyggja fyrir skjólstæðingnum
og virðing fyrir lífi hans og mannhelgi. Hlutverk
hjúkrunarfræðings er að efla heilbrigði, bæta líðan
og lina þjáningar. Svo segir í siðareglum Félags
íslenskra hjúkrunarfræðinga og er það hlutverk
siða- og sáttanefndar að fylgja því eftir.
Siða- og sáttanefnd Félags íslenskra
hjúkrunarfræðinga var endurvakin á
liðnu ári. Stjórn félagsins var falið að
skipa fulltrúa í nefndina til eins árs
eða fram að aðalfundi 3. maí 2013 en
þá skal kosið í hana. Í nefndina voru
skipaðar Guðbjörg Svava Ragnarsdóttir,
Sigurveig Sigurjónsdóttir Mýrdal og
Þórgunnur Hjaltadóttir auk tveggja
varamanna sem eru Aðalbjörg J.
Finnbogadóttir og Hildur Helgadóttir.
Hlutverk siða- og sáttanefndar er að fjalla
um kvartanir og kærumál sem til hennar
er vísað. Stjórn FÍH, hjúkrunarfræðingar,
hjúkrunarfræðinemar og sjúklingar geta
vísað málum til nefndarinnar er varða
brot á siðareglum félagsins. Samkvæmt
reglum um nefndina skal hún setja sér
starfsreglur sem á að leggja fram á
næsta aðalfundi félagsins til samþykktar.
Starfsreglur þessar skulu kveða á um
hvernig háttað skuli málsmeðferð kæru
eða kvörtunar, reglur um trúnað, úrskurð
nefndarinnar og valdsvið. Nefndin hefur
þegar hafið störf.
Umræðan á samfélagsmiðlum
Með tilkomu samfélagsmiðla hafa orðið
grundvallarbreytingar á því hvernig
almenningur tjáir sig á opinberum
vettvangi. Í áramótaskaupi sjónvarpsins
um nýliðin áramót var með eftirminnilegum
hætti vakin athygli á því í hvaða farveg
umræðan á samfélagsmiðlunum getur
farið. Þótti mörgum nóg um orðbragðið,
viðhorfið og virðingarleysið. Enn verra
þótti flestum þegar í ljós kom að allt sem
þar var sagt var tekið orðrétt úr tilteknu
athugasemdakerfi á netinu.
Hjúkrunarfræðingar líkt og aðrir lands-
menn eru þátttakendur í umræðum