Dagblaðið Vísir - DV - 28.03.2018, Page 32

Hlaup 28. mars 2018KYNNINGARBLAÐ
Arnar Pétursson er afar fjöl-hæfur íþróttamaður að upplagi. Hann var lengi að
slíta sig frá körfubolta til að helga sig
hlaupaíþróttinni og á hlaupaferlinum
hefur hann keppt í afar fjölbreytt-
um vegalengdum. Hann var frábær í
spretthlaupum og millivegalengdum en
í fyrsta maraþoninu sem hann keppti í
lenti hann í öðru sæti Íslendinga. Síðar
varð hann Íslandsmeistari í greininni.
„Það er dálítið skondið að árið 2014
var ég Íslandsmeistari í 1.500 metrum
innanhúss og á sama tíma varð ég líka
Íslandsmeistari í maraþoni í Reykja-
víkurmaraþoninu,“ segir Arnar en það
flækti enn frekar fyrir honum valið á
íþróttagrein að hann var góður í fót-
bolta á unga aldri, ekki bara körfubolta.
Arnar, sem er 27 ára í dag, byrj-
aði seint að æfa langhlaup þar sem
hann var í boltaíþróttunum fram eftir
unglingsárunum. Hann segir hins vegar
að það sé útbreiddur misskilningur á
Íslandi að það sé eitthvað hættulegt
fyrir unga krakka að æfa langhlaup,
þeir séu margir hverjir hvort eða er
að hlaupa langhlaup daglega í gegn-
um aðrar íþróttagreinar: „Það hefur
örugglega hjálpað mér á hlaupaferlin-
um að hafa áður æft mikið körfubolta
og fótbolta því þar hljóp ég auðvitað
mikið. Tólf ára krakkar sem eru stund-
um á tveimur íþróttaæfingum sama
daginn hlaupa kannski allt að 10 kíló-
metra þann dag. Það er engin ástæða
til að vera hræddur við að krakkar
hlaupi langt og það er fínt að byrja að
æfa langhlaup ungur, margir krakkar
hlaupa langhlaup óbeint í gegnum
aðrar íþróttagreinar.“
Mamma lét hann hlaupa til að róa
hann niður
Aðspurður segist Arnar hafa haft mikla
hreyfiþörf sem krakki og viðurkennir að
hafa stundum verið fyrirferðarmikill.
„Mamma segir oft söguna frá því ég
var lítill og rosalega orkumikill þannig
að hún þurfti að róa mig niður. Hún
sagði mér þá að hlaupa einn hring um
hverfið. Ég sagðist ekki nenna því en
þá sagði hún: Ég tek tímann. Um leið
og þau orð voru fallin var ég rokinn út.“
Það var því ljóst snemma að hugurinn
beindist að íþróttum og keppni.
Næringin mjög mikilvæg
Arnar hleypur á bilinu 120 til 200
kílómetra en álagið er mismikið. Hann
er í 200 kílómetrunum þegar hann er í
æfingabúðum fyrir mót en þess á milli
fer vegalengdin eitthvað niður. Hann
stundar einnig ýmsa aðra hreyfingu til
að byggja sig upp, til dæmis jóga og
styrktaræfingar.
Meiðsli eru hvimleiður fylgifiskur
íþrótta en Arnar er svo lánsamur að
hann hefur ekki meiðst í fimm ár. „Ég
held nákvæma æfingadagbók og pæli
í þessu frá a til ö. Þetta er mikil tækni
og jafnvægislist, að setja sig undir
mikið æfingaálag án þess að fara yfir
línuna sem skilur frá ofþjálfun. Það
er afskaplega auðvelt að leiðast út í
ofþjálfun og meiðast og maður þarf
að vera þarna akkúrat á mörkunum en
fara ekki yfir þau.“
Næringin skiptir miklu máli.
„Mataræðið er mjög mikilvægt. Ég
pæli mikið í góðri næringu og það er
mikilvægt að fá góða orku, ekki bara
kolvetni. Beint eftir æfingu vil ég fá
Hleðslu, hálfan lítra af vatni og helst
banana. Þá er ég kominn með áfyllingu
á kolvetnabirgðirnar (bananinn), vatn
til að skola öllu út í líkamsstarfsemina
og próteinið til að byggja upp.“
Einbeitir sér núna að langhlaupum
Sem fyrr segir hefur Arnar náð miklum
árangri í mjög fjölbreyttum hlaupa-
vegalengdum en núna ætlar hann að
einbeita sér að lengstu hlaupunum,
hálfmaraþoni og maraþoni. „Ég tek
þátt í maraþonhlaupi í Hamborg í apríl
og verður það fyrsta maraþonhlaup-
ið sem ég hleyp erlendis. Það verður
öðruvísi að hlaupa í
góðu veðri en vindinum hérna heima.
Í þessu hlaupi langar mig til að kom-
ast nálægt ólympíulágmarki,“ segir
Arnar en hann er með augastað á
Ólympíuleikunum 2020.
Arnar hefur verið námsmaður
undanfarin ár en er nú við að útskrifast
með þrjár meistaragráður frá Háskóla
Íslands: Í endurskoðun og reiknings-
skilum, fjármálum fyrirtækja og með
kennsluréttindi. Vinnumarkaðurinn
bíður en Arnar hefur þó verið hálfat-
vinnumaður í hlaupum undanfarin ár,
að minnsta kosti öðru hverju. „Ég hef
verið mjög heppinn með styrktaraðila
sem hafa stutt við bakið á mér. Svo ef
maður nær ólympíulágmarki eru ýmsir
styrkir í boði.“
Þegar Ólympíuleikarnir verða haldnir
2020 verður Arnar 29 ára, aldur sem
gjarnan er hátindur íþróttamanna.
Hann segir hins vegar líklegt að hann
eigi eftir að toppa síðar þar sem hann
byrjaði ekki að æfa hlaup mjög ungur.
Því seinna sem byrjað er að æfa hlaup
því eldri toppa menn.
ARnAR PÉTURSSon:
Fjölhæfi hlauparinn elur
með sér ólympíudraum