Morgunblaðið - 13.12.2018, Síða 76

76 MENNING
MORGUNBLAÐIÐ FIMMTUDAGUR 13. DESEMBER 2018
Í inngangsorðum sínum í bókinni
þar sem farið er yfir það sem var
efst á baugi á árinu 2018 skrifar
Víðir meðal annars um karlalandslið
Íslands:
Heimir Hallgrímsson ákvað að
hætta störfum sem þjálfari lands-
liðsins eftir HM í Rússlandi, eftir
einstaklega gifturíkan feril með lið-
ið. Svíinn Erik Hamrén tók við og
fékk hina nýju Þjóðadeild UEFA
beint í andlitið. Fjóra leiki gegn
tveimur af bestu landsliðum heims,
auk vináttuleiks við sjálfa heims-
meistarana. Ég efa að nokkur lands-
liðsþjálfari hafi fengið brattari byrj-
un. Ekki bættu úr skák gríðarleg
forföll margra
okkar bestu
manna á haust-
mánuðum og
Hamrén hefur
fyrir vikið aldrei
stillt upp sterk-
asta liði Íslands
þegar und-
ankeppni EM fer
af stað síðar í vet-
ur. Hann verður ekki dæmdur af
verkum sínum strax.
Eftir leikina erfiðu í Þjóðadeild-
inni og fall íslenska liðsins þaðan
hljótum við samt að velta vöngum
yfir því hvernig framhaldið verði.
Fámennið gerir að verkum að Ís-
land er háðara því en flest önnur
landslið að geta ávallt stillt upp nán-
ast sínu sterkasta liði. Svo er „gull-
kynslóðin“ smám saman að komast
á aldur, enda þótt kjarni liðsins eigi
ekki að þurfa að taka róttækum
breytingum á næstu misserum.
Margir lykilmannanna eru enn bara
28-30 ára gamlir og eiga talsvert eft-
ir. Vörnin getur orðið spurning-
armerki en þar eru þrír þeirra sem
mest hafa spilað á aldrinum 32-36
ára.
Aðalatriðið er að þeir yngri kom-
ist að hlið hinna reyndari, spili með
þeim og geti smám saman tekið við
kyndlinum og vaxandi hlutverkum.
Það eru dálítil vonbrigði að ekki
skuli fleiri leikmenn fæddir árin
1992 til 1996 en raun ber vitni vera
búnir að gera sig gildandi í landslið-
inu. Hinsvegar er spennandi að
horfa til þeirra stráka sem eru
fæddir á árunum 1997 til 1999 og
hafa gert góða hluti með yngri
landsliðunum, sem og á fyrstu miss-
erum atvinnumennskunnar, eins og
t.d. Albert Guðmundsson og Skaga-
maðurinn kornungi Arnór Sigurðs-
son sem sló í gegn í haust, bæði í
Meistaradeild Evrópu og rússnesku
úrvalsdeildinni. Þá eru margir
spennandi leikmenn á leiðinni í
yngri landsliðunum og bæði U19 ára
og U17 ára landsliðin náðu góðum
árangri seinni hluta ársins.
Virkilega sterkir karakterar
Í bókinni er ennfremur viðtal við
Heimi Hallgrímsson sem fer vel yfir
það sem gerðist á HM í Rússlandi
og hann er síðan spurður:
Eftir velgengni undanfarinna ára,
hvað þarf að gera til þess að Ísland
eigi áfram möguleika á að komast í
lokakeppni stórmóta?
„Þessi strákar sem eru núna í
landsliðinu eru í fyrsta lagi góðir
fótboltamenn en ég legg gríðarlega
áherslu á að þeir eru virkilega
sterkir karakterar. Þú verður að
hjálpa til við að skapa karakter. Er-
um við að gera það í þjálfun og
kennslu á Íslandi? Í dag er auðvelt
að fá bestu æfingarnar hjá bestu
þjálfurum hjá bestu liðunum. Það er
auðvelt að gera það sama og allir
hinir. Tæknin í dag leyfir okkur að
skoða það besta hjá öllum og eðli-
lega fara allir þjálfarar sömu leiðina.
En ef við ætlum að gera það sama
og Spánverjar, Hollendingar og
Englendingar verðum við aldrei
annað en léleg eftirlíking af þeim.
Þessvegna verðum við að vera með
skýra sýn á hvaða eiginleikar eigi að
prýða íslenskan landsliðsmann.
Hvert á að vera hans einkenni? Við
þurfum að þjálfa það strax frá
grunni. Ef það er karakter, þá þurf-
um við að leggja meiri áherslu á að
þjálfa hann upp. Hvert er okkar ein-
kenni? Við ætlum að vera góðir í því.
Við getum ekki verið bestir á öllum
sviðum. Tölfræðin segir okkur að
við séum ekki með bestu send-
ingamenn í heiminum. Okkar send-
ingahlutfall er slakara en hjá flest-
um. Við látum það ekki fara í
taugarnar á okkur, við spilum ekki
þannig fótbolta að sú tölfræði komi í
bakið á okkur.
Við vitum að við erum ekki með
bestu einstaklingana í heimi. Við er-
um með afar fáa sem spila í Meist-
aradeildinni, á meðan þjóðir eins og
Króatía og Argentína eru kannski
með tíu leikmenn í byrjunarliðum
sem spila í undanúrslitum og úrslit-
um í þeirri keppni. Bestu leikmenn-
irnir eru í bestu liðunum en við er-
um með mjög fáa leikmenn sem
spila í hæsta gæðaflokki. Við verð-
um þess vegna að vera betri í ein-
hverju öðru, og leggja okkar metnað
í að vera með góða liðsheild. Þar
sem við erum ekki með bestu ein-
staklingana getum við ekki spilað
maður gegn manni út um allt. Yf-
irleitt eru einstaklingarnir í liði and-
stæðinganna betri. Það er kannski
kjánalegt af þjálfara að segja þetta
en þannig er bara staðan.“
Ungir leikmenn banka
hressilega á dyrnar
Hallbera Guðný Gísladóttir, ein af
reyndustu landsliðskonum Íslands,
er í viðtali um frammistöðu kvenna-
landsliðsins og segir þar meðal ann-
ars þegar horft er fram á veginn:
„Núna verða einhverjar breyt-
ingar með nýjum þjálfara og það
verða viðbrigði að fara á æfingar hjá
nýju teymi eftir að hafa aðeins verið
með tvo þjálfara allan landsliðsfer-
ilinn, Frey og Sigurð Ragnar. En
það verður spennandi að sjá hvernig
Jón Þór og Jeffs gera þetta, það er
gott að hrista upp í hlutunum þegar
maður er orðinn of vanafastur. Það
eru margir ungir leikmenn að banka
hressilega á dyrnar hjá landsliðinu,
Agla María Albertsdóttir, Alex-
andra Jóhannsdóttir og Hlín Eiríks-
dóttir eru allar kornungar ennþá og
eru framtíðarleikmenn og það eru
margar fleiri á leiðinni. Maður hefur
helst áhyggjur af markmannsstöð-
unni, allir markverðir landsliðsins
eru á svipuðum aldri og eins og er
virðist langt bil í þá næstu.
Það mun síðan eflaust gera okkar
yngri leikmönnum gott að komast út
í atvinnumennsku, þó það henti ekki
endilega öllum. Mín reynsla var sú
að það gerði mig að miklu betri leik-
manni. Kröfurnar verða meiri, þú
spilar með leikmönnum sem sætta
sig ekki við meðalmennsku og þú
þarft stundum að vera með breitt
bak. Ég held að ég hafi þroskast
talsvert sem leikmaður og mann-
eskja á því að fara út og að því leyti
ætti það að vera hagur landsliðsins
að sem flestir af leikmönnum þess
kynnist því að spila erlendis.
Endalaus vonbrigði
Berglind Björg Þorvaldsdóttir,
Íslands- og bikarmeistari með
Breiðabliki og markadrottning
Pepsi-deildar kvenna, segir m.a. frá
erfiðleikum sem hún gekk í gegnum
á fyrstu mánuðum ársins 2018
vegna deilna við ítalska félagið Ve-
rona, þar sem hún lék framan af
vetrinum:
„Frá áramótum og fram í mars
voru þetta endalaus vonbrigði. Um-
boðsmaðurinn var alltaf að fara að
græja hlutina en eftir að Freyr
landsliðsþjálfari hafði sagt mér að
hann gæti ekki valið mig í landsliðið
fyrir Algarve-mótið þar sem ég væri
hvergi að æfa höfðum við samband
við Kristin Björgúlfsson hjá Leik-
mannasamtökum Íslands. Hann
leysti málið með einum tölvupósti,
samtökin á Ítalíu lokuðu málinu á
einum degi og ég gat byrjað að æfa.
Berglind sagði að þessi erfiða
reynsla hefði þegar upp var staðið
reynst lán í óláni og komið sér til
góða.
„Þar sem ég mátti ekki æfa með
félagsliði fór ég í Toppþjálfun hjá
Guðjóni Erni Ingólfssyni og hann
tók mig í gegn, auk þess sem ég æfði
sjálf ein með bolta í Fífunni. Líklega
hjálpaði það mér mikið að hugsa um
fleira en fótboltann sjálfan. Ég var í
styrktarþjálfun með áherslu á kraft
og snerpu, tók mataræðið í gegn og
las mikið um andlega heilsu. Und-
irbúningstímabilið á Íslandi er svo
langt að maður getur alveg fengið
nóg svo það getur greinilega verið
gott að brjóta það upp. Það er eig-
inlega fyndið að þurfa að lenda í
áfalli til að finna út hvað maður gæti
gert betur. Eftir á að hyggja er ég
þakklát fyrir að hafa lent íþessum
vandræðum því það skilaði sér þeg-
ar upp var staðið.“
Viðbrigðin ekki eins
mikil og ég óttaðist
Birkir Már Sævarsson var í þeirri
einstöku stöðu að leika með lands-
liðinu á HM í Rússlandi og spila
jafnframt með Val eftir níu ár í at-
vinnumennsku, þar sem hann varð
Íslandsmeistari. Hér er gripið niður
í viðtal við hann:
Voru mikil viðbrigði að spila í ís-
lensku deildinni eftir að hafa verið í
Svíþjóð og Noregi um árabil?
„Hvað Valsmenn varðar og gæðin
á æfingum var munurinn nánast
enginn. Valsliðið var það gott, með
marga fyrrverandi atvinnumenn,
hraða og gæði á æfingum að það var
alveg á pari við það sem ég hafði
vanist. Hvað deildina varðar þá eru
bestu liðin á Íslandi svipuð og miðl-
ungslið í efstu deildum í Skandinav-
íu en það er meiri munur á botnlið-
unum hér og þar. Þrjú bestu liðin á
Íslandi ættu ekki að þurfa að lenda í
fallbaráttu í Svíþjóð eða Noregi og
viðbrigðin voru því ekki eins mikil
og ég óttaðist fyrst.
Frá því ég lék síðast á Íslandi árið
2008 er deildin orðin betri og fleiri
lið en áður orðin virkilega góð.
Botnliðin eru líka skipulagðari og
betri og erfiðara að spila við þau,
sérstaklega á útivöllum. Valsliðið
2018 er betra en meistaraliðið 2007,
með meiri gæði í heildina og stærri
hóp þar sem fleiri leikmenn gátu
komið inn án þess að veikja liðið.
Íslensk knattspyrna 2018
Íslensk knattspyrna 2018 rekur allt það helsta sem bar á góma í knattspyrnuheiminum árið 2018, sagt frá sigrum og ósigrum,
Íslandsmeisturum og HM-förum. Víðir Sigurðsson íþróttafréttamaður tekur bókina saman og Tindur gefur hana út.
Morgunblaðið//Skapti Hallgrímsson
1:1 Fyrsti leikur Íslands í lokakeppni heimsmeistaramótsins í knattspyrnu var gegn Argentínu og varð sögulegur.
Hannes Þór Halldórsson var frábær í leiknum og ver hér víti frá Leo Messi.