Skessuhorn - 30.05.2018, Blaðsíða 18

MIÐVIKUDAGUR 30. MAÍ 201818
„Velkomin í nýja klúbbhúsið,“ seg-
ir Jóhannes Ármannsson, fram-
kvæmdastjóri Golfklúbbs Borgar-
ness, þegar blaðamaður gengur inn
á Hótel Hamar í Borgarnesi. Jó-
hannes er þar ásamt Sigurði Ólafs-
syni hótelstjóra til að fræða Skessu-
horn um breytingar á rekstri klúbbs-
ins og hótelsins. Þannig er mál með
vexti að Golfklúbbur Borgarness og
Icelandair Hótel Hamar hafa samið
um að hótelið annist rekstur klúbb-
húss GB, það er að segja veitingasölu
og móttöku kylfinga. Þeir segja hug-
myndina að þessu samstarfi hafa ver-
ið að gerjast um nokkurt skeið. „Við
áttum samtal um þetta fyrir nokkru
síðan og eftir það fór hugmyndin að
gerjast. Flestir gestir hótelsins eru
útlendingar og stór hluti kemur sem
hluti af hóp,“ segir Jóhannes. „Þeir
taka daginn nær alltaf snemma, fá sér
morgunverð, fara síðan út og skoða
sig um og koma aftur á hótelið um
kvöldmat. Þá fá þeir sér að borða og
slaka á áður en þeir fara í háttinn.
Síðan fara þeir aftur út eftir morg-
unmat daginn eftir,“ segir Sigurður.
„Það þýðir að frá því eftir morgun-
verðinn og fram á kvöld er rólegur
tími á hótelinu,“ segir hann, „sem er
einmitt sami tíminn og mest umferð
er um golfvöllinn,“ bætir Jóhann-
es við.
Með því að hótelið annist veit-
ingasölu golfklúbbsins segja þeir að
náist fram mikið hagræði, bæði fyr-
ir hótelið og klúbbinn, auk þess sem
miklir möguleikar opnist til fram-
tíðar. „Með þessu náum við að sam-
nýta eldhúsið, móttökuna og fleira
í þjónustu við kylfingana. Það gerir
okkur til dæmis kleift að ráða fólk
sem hefur verið í hlutastörfum í full
störf yfir háannatímann,“ segir Sig-
urður. „Jafnframt er mun líklegra að
kylfingar staldri við, njóti matar og
drykkjar og slaki á eftir golfhring ef
aðstaðan er góð,“ segir Jóhannes.
Draumaáfangastaður
kylfinga
Um 35 þúsund manns sækja Ham-
arssvæðið heim á hverju ári að sögn
Jóhannesar og Sigurðar, hvort sem
er til að gista á hótelinu, spila golf
eða hvort tveggja. Þeir segja alltaf
hafa verið gott samstarf milli hótels-
ins og golfklúbbsins. „Okkur fannst
því rökrétt að taka það skref að sam-
einast um veitingasölu og rekstur
klúbbhússins. Það verður báðum til
góðs og gerir okkur kleift að vaxa
til framtíðar. Við horfum til þess að
þetta verði til að fjölga gestum sem
hingað koma enn frekar og jafn-
vel að þeir dvelji lengur á svæðinu,“
segja þeir og horfa meðal annars til
sérstakar golfferða. „Hótel Hamar
verður fyrsta og eina golfhótel lands-
ins. Nú þegar koma margir kylfingar
og gista á hótelinu. Við sjáum fyrir
okkur að í framtíðinni gæti hér orðið
golf resort, draumaáfangastaður fyrir
kylfinga hvaðan að sem er úr heim-
inum þar sem þjónustan verður eins
og hún gerist best,“ segir Jóhannes
og Sigurður tekur undir það. „Okkar
ætlun er að vera með háklassa þjón-
ustu fyrir alla golfiðkendur,“ segir
Sigurður. „Gæðin verða slík að ann-
að eins þekkist ekki á landinu, ég
leyfi mér bara að fullyrða það,“ bætir
Jóhannes við.
Núverandi klúbbhús verður aflagt
sem slíkt, en Jóhannes segir að það
nýtist að hluta sem skrifstofur og í
tengslum við barna- og unglingastarf
klúbbsins. Enn fremur segir hann að
eldri borgurum verði boðið að nýta
sér húsnæðið í sínu golftengda starfi.
Þá mun starfsfólk Hótels Hamars
áfram hafa gistiaðstöðu í húsinu eins
og undanfarin ár. „Gamla klúbbhús-
ið, í gamla Hamarsbænum, er barn
síns tíma og fullnægir engan veg-
inn þeim kröfum sem gerðar eru til
klúbbhúsa í dag. Ég er hins vegar
ekki í vafa um að þetta fyrirkomulag
verði lyftistöng fyrir starf klúbbsins
til framtíðar. Þessir hópar fá þá að-
stöðu sem stangast ekki á við dagleg-
an rekstur hótelsins og nægt rými til
að athafna sig,“ segir Jóhannes.
Langtímamarkmið að
halda Íslandsmótið
Fyrir utan að bylta daglegum rekstri
klúbbsins og skapa tækifæri til að
laða að fleiri kylfinga segir Jóhann-
es að breytingarnar opni nýjar víddir
í starfi klúbbsins hvað varðar móta-
hald. Hann segir eitt af langtíma-
markmiðum klúbbsins að Íslands-
mótið í golfi verði spilað í Borgar-
nesi. „Ég leyni því ekki að við horfum
til þess að fá að halda Íslandsmótið á
Hamarsvelli. Hvort og hvenær það
verður að veruleika veit ég ekki, en
það væri gaman að geta haldið það á
50 ára afmæli klúbbsins árið 2023,“
segir hann. „Til þess að fá að halda
mót af þeirri stærðargráðu þarf öll
aðstaða að vera til staðar, bæði fyr-
ir kylfinga og áhorfendur. Með þess-
ari breytingu er það mín skoðun að
GB sé komið í fremstu röð á lands-
vísu hvað það varðar. Keppendur
gætu jafnvel gist við keppnisvöll-
inn á glæsilegu hóteli. Stemning-
in á slíku móti yrði einstök að mínu
mati,“ segir Jóhannes en tekur fram
að þá þyrfti einnig að breyta vellin-
um. „Til að fá Íslandsmótið þurfum
við að gera ýmsar breytingar á Ham-
arsvelli. En þetta er langtímamark-
mið klúbbsins og við vinnum að því í
litlum skrefum,“ bætir hann við.
„Getum orðið
einn flottasti klúbbur
landsins“
Breytingarnar á vellinum vegna
samstarfs golfklúbbsins og hótelsins
voru á lokametrunum þegar Skessu-
horn var á ferðinni á dögunum. Jó-
hannes vann ásamt hópi félaga í
golfklúbbnum að frágangi á teigum
og við að bera áburð á flatirnar. „Í
framtíðinni verður þetta þannig að
kylfingar koma og skrá sig inn í mót-
tökunni á hótelinu. Þaðan fara þeir
niðurfyrir húsið og að fyrsta teig,
sem er þar sem níunda brautin var
áður. Gamla áttunda brautin, sem
liggur meðfram hótelinu, verður 18.
braut,“ segir Jóhannes. „Af 18. braut
verður gengið upp tröppur og inn í
glæsilegan matsal hótelsins. Breyting
matsalarins er hönnuð með kylfinga
í huga. Þar verður glerveggur með
frábæru útsýni yfir völlinn, Hafn-
arfjall og Borgarfjörðinn. Útsýni er
yfir lokaholuna, en flötin er alveg
uppi við hótelið. „Breytingarnar á
vellinum eru hannaðar í samvinnu
við Edwin Roald golfvallahönnuð.
Þær eru hugsaðar þannig að hægt
verði með einföldum hætti að snúa
vellinum til fyrra horfs, ef ákvörðun
um það verður tekin síðar,“ bætir Jó-
hannes við.
Völlurinn og klúbbhúsið var sem
fyrr segir opnað síðastliðinn föstu-
dag. Veitingasalurinn hefur sömu-
leiðis verið opnaður samhliða vinnu
við breytingar. Þeir félagar segja
markmiðið að breytingunum á hót-
elinu verði að fullu lokið fyrir miðjan
júní. Jóhannes segir framkvæmdirnar
allar hafa gengið eins og best verður
á kosið og kveðst afar þakklátur fyrir
þann stuðning sem klúbbnum hefur
verið sýndur. „Við gætum ekki gert
þetta nema fyrir frábæran stuðning
einstaklinga og fyrirtækja í nágrenn-
inu. Má þar nefna Davíð Ólafsson á
Hvítárvöllum, ómetanlegan stuðn-
ings Borgarverks við þessar fram-
kvæmdir, Ásgeir Bolla Kristjáns-
son og Sigurð Ólafsson á Hamri og
marga fleiri,“ segir Jóhannes. „Það
er ekki síst öllum þeim sem hafa
stutt við okkur að þakka að við sjáum
fram á að geta með tíð og tíma orð-
ið einn flottasti golfklúbbur landsins
og Hamarssvæðið allt flottasti golfá-
fangastaður á Íslandi.“
kgk
„Fyrsta og eina golfhótelið á Íslandi“
GB og Hótel Hamar sameinast um rekstur klúbbhúss
Jóhannes Ármannsson, framkvæmdastjóri Golfklúbbs Borgarness og Sigurður Ólafsson, hótelstjóri á Hamri.
Icelandair Hótel Hamar í Borgarnesi. Hér mun rísa viðbyggingin við hótelið sem hýsa mun veitingasalinn fyrir kylfinga.
Þar verður glerveggur með útsýni yfir Hamarsvöll, Hafnarfjall og Borgarfjörðinn.
Barna- og unglingastarfið sem og starf eldri borgara fær aðstöðu í gamla klúbb-
húsinu í Hamarsbænum. Jóhannes er ekki í vafa um að það verði lyftistöng fyrir
starfið.
Þórhallur Teitsson og Ásmundur Þór Guðmundsson höfðu í nógu að snúast við
breytingar á vellinum.
Þegar blaðamann bar að garði var unnið að frágangi á nýjum fyrsta teig beint
fyrir neðan hótelið.