Bændablaðið - 22.03.2018, Blaðsíða 48

48 Bændablaðið | Fimmtudagur 22. mars 2018
Á dögunum var opnað fyrir aðgang
að vefsvæðinu Matís fræðsla eða
https://matis.online. Vefurinn
er ætlaður fyrir fræðsluefni og
vefnámskeið sem Matís ohf. hefur
gefið út. Þar verður ýmislegt í boði,
bæði endurgjaldslaust en einnig
annað efni sem verður að greiða
fyrir. Þar á meðal er námskeið sem
kallast Heimavinnsla afurða.
Fyrsti hluti þess efnis er með
aðaláherslu á úrvinnslu kindakjöts
ásamt ýmsum þáttum sem snúa að
smáframleiðslu matvæla. Í þessum
fyrsta hluta, eru eftirfarandi sjö kaflar:
„Örverur á kjöti og örverum haldið
niðri“, „Leyfismál, gæðahandbók,
innra eftirlit og stofnun fyrirtækja“,
„Slátrun og kjötmat“, „Söltun og
reyking“, „Umbúðamerkingar
matvæla og pökkun“, „Hráverkun
og pylsugerð“ og „Sögun, úrbeining
og marinering“. Hægt verður að
kaupa allt efnið í einu, en einnig
er mögulegt að kaupa hvern kafla
fyrir sig.
Spannar alla þá þætti sem snúa
að heimavinnslunni
Efni námskeiðanna spannar alla þá
þætti sem snúa að heimavinnslunni
og er nauðsynlegt fyrir þá sem
hyggjast fara út í framleiðslu
matvæla en hafa ekki lokið einhvers
konar matvælamenntun. Farið er
ýtarlega í þætti eins og örverufræði:
hvað gera örverur við matvæli,
hvernig best sé að lágmarka tilveru
óæskilegra örvera og hindra vöxt
þeirra sem eru til staðar.
Leyfismál
Í kaflanum um leyfismál og innra
eftirlit er farið yfir þau atriðii
sem opinberir leyfisveitendur/
eftirlitsaðilar gera kröfu um að
sé framfylgt. Umbúðamerkingar
byggjast að miklu leyti á
opinberum kröfum sömuleiðis og
pökkun matvæla getur verið með
mismunandi hætti. Farið er yfir
feril slátrunar og kjötmat kindakjöts
skýrt á skemmtilegan hátt með
myndböndum.
Vinnsluferlar
Í vinnsluköflunum sögun lamba-
kjöts, úrbeining, marinering,
söltun og reyking og hráverkun og
pylsugerð er urmull myndbanda sem
sýna vinnubrögð auk fræðsluefnis
af ýmsum toga. Matvælastarfssemi
er leyfisskyld og þær reglur sem
fara þarf
eftir birtast
okkur í
formi laga og
reglugerða.
M ö rg u m
þykir það
f lókið og
tímafrekt að
leita að hinum
ýmsu reglum sem
eiga við í hvert sinn,
hvort heldur það eru
leyfismálin, kröfur um
næringaryfirlýsingu
eða vottun umbúða
svo eitthvað sé nefnt.
Í námsefninu hefur
þessum upplýsingum
verið safnað saman
á aðgengilegan hátt.
Hverjum kafla lýkur
síðan með nokkrum
spurningum. Krafist er
80% réttrar svörunar og
eru gefnar þrjár tilraunir.
Standist viðkomandi prófið fær hann
sent viðurkenningarskjal þess efnis.
Skjalið má setja í gæðahandbók
fyrirtækisins til staðfestingar á því
að viðkomandi kunni einhver skil á
viðkomandi þætti.
Í samvinnu Matís, LbhÍ og LS
Matís og Landbúnaðarháskóli
Íslands með dyggri aðstoð
Landsamtaka sauðfjárbænda eru
bakhjarlar námskeiðsins. Námsefnið
er unnið úr ýmsum gögnum s.s. úr
fyrri rannsóknum og því náms- og
kynningarefni sem útbúið hefur
verið hjá Matís og forverum þess
og ekki síður úr því efni sem finna
má hjá Matvælastofnun.
Höfundar efnisins, eins og það
birtist hér, eru Óli Þór Hilmarsson
kjötiðnaðarmeistari, Guðjón
Þorkelsson matvælafræðingur,
Þóra Valsdóttir matvælafræðingur
og Júlía Sigurbergsdóttir
viðskiptafræðingur. Ólafur
Rögnvaldsson sá um kvikmyndun
og Þormóður Dagsson vefhönnuður
sá um grafík, uppsetningu og
vefhönnun.
Landssamtök sauðfjárbænda
hafa fengið styrk úr minningasjóð
Halldórs Pálssonar til þess að
niðurgreiða námsgjöld til sinna
félagamanna. Þeir félagsmenn sem
vilja nýta sér þetta geta leitað eftir
frekari upplýsingum með því að
senda tölvupóst á unnsteinn@bondi.
is eða hringja í síma 563 0350.
LESENDABÁS
Helgina 9. til 12 mars fór
fram glæsileg fagkeppni um
Kjötmeistara Íslands og óska ég
Oddi Árnasyni frá Sláturfélagi
Suðurlands innilega til hamingju
með sigurinn.
Einnig óska ég öllum öðrum
sigurvegurum til hamingju með sín
verðlaun. Virkilega glæsileg keppni
og vel að henni staðið.
Keppni eins og þessi endurspeglar
oft það sem er að gerast á markaði og
sást það vel á þeim vörum sem voru
í keppninni núna. Fleiri vörur voru
með sem henta öllu því ferðafólki
sem heimsækir okkur, eins og
t.d. þurrkað kjöt. Voru dómarar
keppninnar ekki í öfundsverðir af
hlutverki sínu. Landbúnaðarráðherra
mætir og afhendir verðlaun og sú
athöfn gaf samkomunni sterkan og
fallegan blæ.
Eitt er það sem angrar mig
En það er eitt sem er að angra mig
og hefur gert lengi. Það er mæting
fulltrúa búgreinasambandanna
(Landssamband kúabænda,
Landssamtök sauðfjárbænda, Félag
kjúklingabænda, Svínaræktarfélag
Íslands og kjötframleiðendur/
hrossaræktendur á þessa
verðlaunaafhendingu. Öllum var
boðið að vera viðstaddir og afhenda
þau verðlaun sem þeir eru að veita
sjálfir. Og hafa alla tíð stutt við
Meistarafélag kjötiðnaðarmanna
í þessari fagkeppni. Eru
kjötiðnaðarmenn þakklátir fyrir það.
En eitthvað hefur gerst. Árið 2016
kom engin frá þeim að afhenda þessi
verðlaun og skýringin sem þáverandi
landbúnaðaráðherra gaf á fjarveru
þeirra var að þeir væru að lesa yfir
nýjan búvörusamning.
Í ár 2018 kom einungis Hörður
Harðarson frá Svínaræktarfélagi
Íslands og þakka ég honum innilega
fyrir komuna og að hafa sýnt málinu
áhuga.
Ég skil þetta ekki
Ég skil þetta ekki alveg,
kjötiðnaðarmenn eru í raun einu
talsmenn búgreinasambandanna
á markaði og þeir einu sem koma
kjötafurðum í verð á markað. Gildir
þá einu hvort afurðir eru að fara í
útflutning, mötuneyti eða í verslun.
Svo virðist sem ekki sé hægt
að gefa sér stund til að taka þátt
og sjá hvað við kjötiðnaðarmenn
erum að gera og hvað margt nýtt
er hægt að gera úr þeirra vöru.
Kjötiðnaðarmenn vinna allan daginn
með það eitt að markmiði að gera
sem besta og arðvænlegasta vöru úr
öllu því kjöti sem þeir framleiða. Það
skiptir ekki máli hver varan er grís,
naut, lamb, hross eða kjúklingur.
Alltaf í vörn
Mér finnst einsog við séum alltaf
í vörn. Við erum alltaf að verja
þá vöru sem við setjum á markað
en á sama tíma njótum við ekki
stuðnings okkar stærstu birgja sem
eru kjötframleiðendur.
Mér finnst þögn fulltrúa
búgreinasambandanna og fjarvera
á hátíð sem þessari vera öskrandi.
Hvað veldur veit ég ekki. Ég er viss
um að þeir myndu fljótt rísa upp
ef íslenskar kjötvinnslur myndu
eingöngu fara að skoða afurðir
erlendra kjötbirgja.
Getum borið höfuðið hátt
Íslenskir kjötiðnaðarmenn og
íslenskir kjötframleiðendur geta
borið höfuðið hátt þegar kemur að
gæðum, bragði og útliti þeirra vara
sem við sendum frá okkur.
Slíkt er ekki síst því að þakka að
hér er gott kjöt á markaði sem hægt
er að gera góða hluti við. Íslenskt
kjöt hefur marga góða kosti og hver
kjötgerð á sinn hátt.
Vatnið okkar er gott og loftgæði
mikil sem hefur mikið með gæði
kjötsins að gera. Að sjálfsögðu má
ekki gleyma því góða fóðri sem við
ræktum hér og hefur marga góða
kosti.
Ætla ég ekki að fara í einhver
meting um hvað sé best og mest.
Það margt mjög vel gert hér og
margar vandaðar vörur á markaði.
Mig langar samt að sjá meiri
samstöðu milli kjötframleiðenda
og kjötiðnaðarmanna.
Hlakka til að hitta kjöt fram-
leiðendur við verðlaunaafhendingu
í fagkeppninni 2020. Sameinaðir
stöndum vér en sundraðir föllum
vér.
Guðráður G. Sigurðsson
kjötiðnaðarmaður.
Fagkeppni Meistarafélags kjötiðnaðarmanna:
Fjarvera búgreinasambandanna
Guðráður G. Sigurðsson.
Aðgangur að vefsvæðinu Matís fræðsla eða https://matis.online:
Ýmislegt í boði eins og „Heimavinnsla afurða”
Á FAGLEGUM NÓTUM LANDBÚNAÐARHÁSKÓLI ÍSLANDSLANDSSAMTÖK SAUÐFJÁRBÆNDA