Morgunblaðið - 18.07.2020, Blaðsíða 41

ÍÞRÓTTIR 41
MORGUNBLAÐIÐ LAUGARDAGUR 18. JÚLÍ 2020
Erum við að ala upp heilu
hópana af tæknilega góðum fót-
boltamönnum sem hafa alla að-
stöðu til að ná langt en eru
kannski ekki tilbúnir til að
leggja á sig það sem þarf?
Guðjón Þórðarson, nýráð-
inn þjálfari Víkings í Ólafsvík,
velti þessu upp í góðu viðtali
sem birtist á mbl.is á fimmtu-
daginn.
„Leikmenn eru tæknilega
góðir en á móti kemur að hér
áður fyrr var mikið um sterka
og öfluga karaktera sem maður
sér ekki í dag. Við megum þess
vegna ekki glata íslensku ein-
kennunum heldur halda áfram
að byggja ofan á þau,“ sagði
Guðjón við Bjarna Helgason í
umræddu viðtali.
Guðjón kom líka inn á gjör-
breyttar aðstæður og benti á að
nú væri hægt að spila á gervi-
grasi allt árið og leggja upp allt
öðruvísi fótbolta „en á gömlu
gras- og malarvöllunum hérna í
denn,“ eins og hann orðaði það.
Þegar Guðjón gerði KA-
menn að Íslandsmeisturum árið
1989 léku þeir þrjá af fyrstu
fjórum leikjum sínum á Íslands-
mótinu á malarvöllum KA og
Þórs á Akureyri.
Sjálfur var Guðjón af sigur-
sælli kynslóð Skagamanna sem
vann fjölda titla og æfði á vet-
urna og vorin í fjörunni á
Langasandi. Hann þekkir því
tímana tvenna. Þar komu við
sögu margir „öflugir karakter-
ar“ eins og þeir sem Guðjón
lýsir eftir.
Þeir létu óslétta grasvelli eða
möl ekki stöðva sig. Akureyrar-
völlur, sem eitt sinn var sá
sléttasti og besti, þykir lakasti
völlur landsins í dag þegar
meirihluti leikjanna er spilaður
á rennisléttu gervigrasi. Tímarn-
ir eru breyttir, en eru þeir endi-
lega betri að öllu leyti?
BAKVÖRÐUR
Víðir Sigurðsson
vs@mbl.is
Sveit Sundfélags Hafnarfjarðar sló
eigið Íslandsmet í 4x50 metra fjór-
sundi blandaðra sveita í fyrstu grein
Íslandsmótsins í 50 metra laug í
Laugardalslauginni í gær.
Sveit SH synti á 1:48,34 mínútum
en fyrra metið frá árinu 2015 var
1:51,33 mínútur. Sveitina skipuðu
Steingerður Hauksdóttir, Anton
Sveinn McKee, Jóhanna Elín Guð-
mundsdóttir og Dadó Fenrir Jasm-
ínuson. Fyrra metið settu þau Kol-
beinn Hrafnkelsson, Hrafnhildur
Lúthersdóttir, Predrag Milos og
Ingibjörg Kristín Jónsdóttir.
Þau Anton Sveinn, Jóhanna Elín
og Dadó Fenrir fylgdu þessu eftir
með því að vinna sínar greinar í gær.
Anton Sveinn vann auðveldan sig-
ur í 100 metra bringusundi karla á
1:02,20 mínútum og var tæplega
tvær sekúndur frá Íslandsmeti sínu.
Hann var síðan í sigursveit SH í
4x200 m skriðsundi sem vann á
8:03,48 mínútum.
Jóhanna Elín, sem er 19 ára göm-
ul, hafði betur í hörkukeppni við Mie
Nielsen frá Álaborg um sigurinn í 50
metra skriðsundi kvenna. Jóhanna
synti á 26,08 sekúndum en Nielsen á
26,48 sekúndum.
Dado Fenrir háði harðan slag við
Metin Aydin um sigurinn í 50 m
skriðsundi karla og hafði betur á
23,39 sekúndum, 4/100 úr sekúndu á
undan Tyrkjanum.
Þá setti Róbert Ísak Jónsson úr
SH Íslandsmet í 100 m flugsundi í
flokki S14 fatlaðra en hann synti
vegalengdina á 59,09 sekúndum.
Gunnhildur Björg Baldursdóttir
úr Reykjanesbæ sigraði í 200 m flug-
sundi kvenna á 2:29,14 mínútum.
Brynjólfur Óli Karlsson úr
Breiðabliki sigraði í 200 m baksundi
karla á 2:09,93 mínútum.
Viktor Bromer frá Álaborg sigr-
aði í 100 m flugsundi karla á 53,78
sekúndum en Íslandsmeistari varð
Símon Elías Statkevicius úr SH á
58,41 sekúndu.
Mie Nielsen frá Álaborg sigraði í
50 m baksundi kvenna á 28,76 sek-
úndum en Íslandsmeistari varð
Steingerður Hauksdóttir úr SH á
29,46 sekúndum.
Patrik Viggó Vilbergsson úr
Breiðabliki sigraði í 400 m skrið-
sundi karla á 4:04,65 mínútum.
Kristín Helga Hákonardóttir úr
Breiðabliki sigraði í 400 m skrið-
sundi kvenna á 4:35,40 mínútum.
Katja Lilja Andriysdóttir úr SH
sigraði í 200 m bringusundi kvenna á
2:56,04 mínútum.
Sveit Breiðabliks sigraði í 4x200
metra skriðsundi kvenna á 9:01,00
mínútum. vs@mbl.is
Íslandsmet féll
í fyrstu grein
 Anton sigurvegari í þremur greinum
Morgunblaði/Arnþór Birkisson
Laugardalslaug Stund milli stríða hjá Antoni Sveini McKee í gær en hann
varð þrefaldur Íslandsmeistari, þar af tvisvar í boðsundsgreinum.
Margt af besta og efnilegasta frjáls-
íþróttafólki landsins tekur þátt í
meistaramótinu fyrir 22 ára og
yngri sem fram fer í Kaplakrika í
dag og á morgun. Tvær spretthörð-
ustu stúlkur landsins, Guðbjörg
Jóna Bjarnadóttir og Tiana Ósk
Whitworth, eru á meðal keppenda,
sem og besti hástökkvari landsins,
hinn kornungi Kristján Viggó Sig-
finnsson. Þá verða kastararnir
Elísabet Rut Rúnarsdóttir, Erna
Sóley Gunnarsdóttir og Valdimar
Hjalti Erlendsson öll með á mótinu
en tímasetningar má sjá á fri.is.
Mörg af þeim
bestu í Krikanum
Ljósmynd/ÍSÍ
Fljótar Tiana Ósk og Guðbjörg Jóna
keppa á meistaramótinu.
Guðmundur Ágúst Kristjánsson er
dottinn út úr toppbaráttunni á
Euram Bank-mótinu á Evrópu-
mótaröð karla í golfi sem lýkur í
Austurríki í dag. Guðmundur lék á
sex höggum yfir pari í gær og
datt úr áttunda sæti niður í 54.
sæti fyrir lokahringinn. Haraldur
Franklín Magnús fór hins vegar
upp fyrir Guðmund og í 36. sætið
eftir að hafa leikið á pari. Robin
Sciot-Siegrist frá Frakklandi lék
hringinn á 61 höggi í gær og er
með þriggja högga forystu á
mótinu, sextán höggum undir pari.
Haraldur fór upp
fyrir Guðmund
Ljósmynd/seth@golf.is
Par Haraldur Franklín Magnús
styrkti stöðu sína í gær.
KNATTSPYRNA
Úrvalsdeild karla, Pepsi Max-deildin:
Extra-völlur: Fjölnir – FH .................... L16
Greifavöllur: KA – Grótta ...................... L16
Würth-völlur: Fylkir – KR................ S17.30
Víkingsvöllur: Víkingur R. – ÍA........ S19.15
Kópavogsvöllur: Breiðablik – Valur...... S20
1. deild karla, Lengjudeildin:
Þórsvöllur: Þór – ÍBV ............................ L14
Fjarðab.höll: Leiknir F. – Vestri .......... L14
Domusnovav.: Leiknir R. – Magni........ L16
2. deild karla:
Framvöllur: Kórdrengir – Völsungur .. L16
3. deild karla:
Vilhjálmsv.: Höttur/Huginn – Elliði L11.15
Samsung-völlur: KFG – Einherji.......... L13
Þorlákshöfn: Ægir – Tindastóll............. L16
Sindravellir: Sindri – KV ....................... L16
Úrvalsdeild kvenna, Pepsi Max-deildin:
Jáverksvöllur: Selfoss – Þór/KA ........... S16
2. deild kvenna:
Bessastaðavöllur: Álftanes – HK.......... L14
Vilhjálmsvöllur: FHL – Hamar ....... L14.15
Hertz-völlur: ÍR – Hamrarnir............... L16
Sindravellir: Sindri – Fram.................... S14
SUND
Íslandsmótið í sundi í 50 m laug heldur
áfram í Laugardalslaug í dag og keppt er
frá 16 til 19.15. Mótinu lýkur á morgun þar
sem keppt er á sama tíma.
FRJÁLSÍÞRÓTTIR
Meistaramót Íslands fyrir 15-22 ára er
haldið í Kaplakrika um helgina. Keppt er í
dag frá kl. 9 til 18 og á morgun frá kl. 10 til
16. Margt af besta frjálsíþróttafólki lands-
ins er með á mótinu.
GOLF
Hvaleyrarbikarinn er leikinn á Hvaleyrar-
velli í Hafnarfirði í dag og á morgun en
keppni í gær var aflýst vegna veðurs. Mótið
var því stytt og eru leiknar 18 holur hjá
körlum og konum í dag og 18 á morgun.
UM HELGINA!
Víðir Sigurðsson
vs@mbl.is
Staða Þróttar úr Reykjavík á botni
1. deildar karla í fótbolta, Lengju-
deildarinnar, er orðin afar slæm eft-
ir sjötta ósigurinn í jafnmörgum
leikjum í gærkvöld. Þróttarar sitja
þar eftir stigalausir þegar tæpur
þriðjungur er búinn af mótinu.
Keflvíkingar skutust á topp deild-
arinnar, þar sem þeir eru jafnir
Eyjamönnum og Frömurum að stig-
um, með því að gjörsigra Þróttara,
4:0, á þeirra eigin heimavelli í Laug-
ardalnum þar sem úrslitin voru ráð-
in eftir aðeins 26 mínútur. Þá höfðu
ástralski framherjinn Josep Gibbs
og Adam Ægir Pálsson skorað tvö
mörk hvor og þar með var dag-
skránni lokið.
Þróttur hefur aðeins skorað eitt
mark í þessum fyrstu sex leikjum
sínum en það er greinilegt að liðið
saknar Dions Acoffs sem kom til liðs
við Þrótt á ný fyrir tímabilið en hef-
ur ekkert spilað enn vegna meiðsla.
 Guðjón Þórðarson fylgdist með
hinum nýju lærisveinum sínum í
Víkingi í Ólafsvík tapa á heimavelli,
1:3, fyrir Aftureldingu en hann tekur
nú formlega við liðinu. Jason Daði
Svanþórsson og Kristján Atli Mar-
teinsson skoruðu fyrir Mosfellinga í
fyrri hálfleik. Víkingar minnkuðu
muninn í uppbótartíma leiksins með
marki frá Emir Dokara en Valgeir
Árni Svansson svaraði strax og inn-
siglaði sigur Aftureldingar.
Afturelding er nú komin í fimmta
sæti deildarinnar eftir þrjá sigra í
röð þar sem liðið hefur skorað þrett-
án mörk gegn einu. Víkingar töpuðu
hinsvegar í fjórða sinn í sex fyrstu
leikjunum.
 Grindavík og Fram skildu jöfn,
1:1. Magnús Þórðarson kom Fram
yfir seint í fyrri hálfleik en Gunnar
Þorsteinsson fyrirliði Grindvíkinga
jafnaði snemma í síðari hálfleik. Há-
vaðarok setti mikinn svip á leikinn,
rétt eins og á aðra leiki gærkvölds-
ins, en viðmælandi blaðsins sem var
á leiknum á Grindavíkurvelli taldi að
hann hefði aldrei átt að fara fram við
þessar aðstæður.
 Sjöttu umferðinni lýkur í dag
þar sem Þór tekur á móti Eyja-
mönnum á Akureyri, Leiknir frá Fá-
skrúðsfirði tekur á móti Vestra í
nýliðaslag fyrir austan og Leiknir úr
Reykjavík fær botnlið Magna í
heimsókn en Magnamenn sitja með
Þrótturum stigalausir á botninum.
Sex töp og eitt
mark Þróttar
 Keflvíkingar skutust á toppinn
Morgunblaðið/Arnþór Birkisson
Laugardalur Anton Freyr Hauks varnarmaður Keflvíkinga og Esaú Rojo
framherji Þróttar eigast við í leik liðanna í gærkvöld.