Strandapósturinn - 01.06.1974, Page 13

Hermundur — þar — hokins synir
heima á Melum áttu bú.
Vænir þóttu og hraustir hlynir
höfðu á Þór og Óðni trú.
Þreknir voru þessir sveinar
Þröstur hétu og Grenjuður.
Vaskir æfðu vopna greinar
vöktu tíðum stála-kur.
Festu bú í fjalla skjóli
fræknir menn á norður strönd.
Vættir lands á veldis-stóli
vináttunnar treystu bönd.
Hraustar beittu hetjur sverði
handsöl festu grið og tryggð.
Strandafjöllin stolt á verði
stóðu um sína ungu byggð.
Traustum fæti á Ströndum stóðu
stofnar fyrsta landnemans.
Þessum fornu görpum góðu
gæfudísir bundu krans.
Hitar ennþá hjarta-strengi
höfgur bjarmi af fornri glóð.
Þeirra minning lifir lengi
letri skráð hjá sagna þjóð.
Kakali og Kolbeinn ungi
kapp um völdin þreyttu fast,
sá var mestur sóknar þungi
siglt um úfið bylgju kast.
Sjóorustu harða háðu
Húnaflóa miðum á.
Engir gesta — griða báðu
gengið hart að málum þá.
11