Strandapósturinn - 01.06.2006, Qupperneq 144

Torfi Guðbrandsson:
Myndir af
mótekju
Ég var nýlega að skoða gamlar ljósmyndir mér til dundurs.
Í rás tímans hef ég eignast allmikið myndasafn af ýmsu tagi.
Fyrstu myndavélina keypti ég árið 1941. Það var ódýr kassavél af
einföldustu gerð. Því miður tók ég ekki mikið af myndum með
þeirri vél, þar sem að filmur voru þá tiltölulega dýrar. Einkum
sé ég eftir að hafa ekki tekið myndir úr atvinnulífinu meðan
tækifæri gafst á fyrri hluta tuttugustu aldar, t.d. af uppdrætti
báta með gangspili, og ekki síður af heybandslestinni sem kom
framan af engjum um langan og erfiðan veg, berandi þunga
vota bandsbagga heim á tún. Ég friða sjálfan mig með því að rifja
upp þá staðreynd að allir voru að vinna og ekki kom til greina
að hlaupa frá gangspilinu til myndatöku og auka þannig strit
mannanna við spilvinduna. Og sama mátti segja um hestana.
Þótt gaman hefði verið að eiga mynd af síðustu heybandslestinni
var mér nær að hjálpa móður minni og yngri systkinum við að
hleypa niður af hestunum en að standa í stappi við myndatökur
meðan sveitt áburðarhrossin biðu eftir að losna við níðþunga
baggana. En það tjóar lítið að velta vöngum yfir slíku eftir að
þessir aldagömlu atvinnuhættir eru aflagðir. Og hver veit nema
eitthvað merkilegt kunni að leynast í myndabunkanum ef vel
142