Strandapósturinn - 01.06.2013, Qupperneq 66

64
gerðu gælur við hunda ferðamanna og tókst að hæna svo kirfi-
lega til sín fjárhund frá einum bóndanum að hann yfirgaf hús-
bónda sinn og settist að hjá setuliðinu breska. Var hundur sá einn
um það að fara í „ástandið“ í plássinu.
En vera Bretanna varð örlagarík fyrir Borðeyri. Þeir fóru ógæti-
lega með eld og í febrúar 1941 kviknaði í sýslumannshúsinu fyrir
þeirra tilverknað. Í annað sinn á stuttum tíma varð stórbruni á
Borðeyri. Sýslumannshúsið brann til kaldra kola og öðru sinni
missti Kaupfélagið verslunarhús sín. Einnig brann frystihúsið og
tækjabúnaður þess en sláturhúsinu var bjargað með því að rjúfa
kælihús sem tengdi það frystihúsinu. Minnstu munaði að flest hús
staðarins yrðu eldinum að bráð. Segja má að eftir þetta áfall hafi
staðurinn aldrei náð sér. Þótt mikið sé búið að byggja upp síðan,
bæði verslunarhús og sláturhús, hefur frystihúsið aldrei verið
endurreist þó að það hafi oft komið til tals. Kannski hefði einmitt
skipt sköpum fyrir uppbyggingu nýrra atvinnutækifæra á staðnum
ef þar hefði staðið frystihús.
Þegar landsíminn lagði línu til Ísafjarðar árið 1908 var full-
komin fyrsta flokks símstöð sett upp í verslunarhúsunum á Borð-
eyri. Þrem árum síðar var reist vandað tvílyft steinhús yfir sím-
stöðina og stendur það enn, einmitt á sama stað og fyrsta húsið á
Borðeyri, torfbærinn sem Pétur Eggerz reisti. Fyrsti símstöðvar-
stjórinn var Björn Magnússon, einn af fjórum Íslendingunum er
fyrst lærðu símritun. Aðrir sem gegndu embætti símstjóra voru
Ólafur Kvaran, Sigurður Dahlmann og síðast Magnús Richards-
son. Hann var símstjóri frá 1933 til 1952, þar af síðasta starfsárið í
Brú eftir að símstöðin fluttist þangað 22. júní 1951.
Við símstöðina starfaði alltaf nokkuð af fólki. Auk símstjóra var
símritari og nokkrar stúlkur unnu sem talsímaverðir. Í símahús-
inu var einnig alltaf starfandi pósthús. Það má því með réttu segja
að þorpið setti ofan við flutning símstöðvarinnar enda telja sumir
tímann sem hún starfaði þar blómaskeið Borðeyrar. Unga fólkið
sem þar vann setti léttan og skemmtilegan blæ á kauptúnið sem
alltaf hefur verið mjög fámennt.
Eftir að símstöðin flutti inn í Brú fékk gamla landsímahúsið
nýtt hlutverk. Það varð að skólahúsi fyrir hreppinn og í því starf-
aði barnaskólinn frá haustinu 1951 þar til reist var nýtt skólahús,
stórt og myndarlegt. Þangað flutti grunnskólinn 1974. Nýja skóla-