Bændablaðið - 10.03.2022, Blaðsíða 30
Bændablaðið | Fimmtudagur 10. mars 202230
Ferðalangar hafa í miklum mæli
sótt höfuðstað Norðurlands,
Akureyri, heim nú í vetur.
Skíðatíð stendur sem hæst og
leggja margir land undir fót til
að fara á skíðasvæðin hér og
hvar um norðanvert landið. Ný
lyfta er í Hlíðarfjalli og einnig
á Sauðárkróki, sem dregur
skíðafólk að, og þá sé búið að
byggja skíðasvæði á Siglufirði upp
að nýju eftir snjóflóð.
„Fólk sem kemur norður í
skíðaferðir sækir gjarnan fleiri en eitt
svæði heim, það fer á milli og prófar
fleiri skíðasvæði í nágrenninu,“
segir Arnheiður Jóhannsdóttir,
framkvæmdastjóri Markaðsstofu
Norðurlands. Sprenging hefur
orðið í gönguskíðaiðkun og hótel á
svæðinu hafi boðið upp á námskeið
og ferðir í þeirri grein. Einnig hafi
fjallaskíðamennska sótt mjög í sig
veðrið og kjöraðstæður til að stunda
þá grein séu við Eyjafjörð.
Arnheiður segir að komandi
sumar líti vel út og mannaráðningar
fyrir ferðatíðina byrji ágætlega. „Það
er mikill ferðahugur í erlendum
ferðamönnum og margir bóka lengri
ferðir en áður. Við gerum ráð fyrir
að sumarið verði blanda af erlendum
og innlendum ferðamönnum og ef
ekki kemur upp eitthvað óvænt
tengt heimsfaraldri sjáum við ekki
annað en að sumarið verði gott og
ferðalangar á faraldsfæti fram á
haust,“ segir hún. Arnheiður fagnar
því að nú hefur öllum takmörkunum
sem fylgdu heimsfaraldri kórónu-
veirunnar verið aflétt.
Reynt á þolgæði og útsjónarsemi
„Undanfarin tvö ár hafa verið ferða-
þjónustunni gríðarlega erfið og það
hefur mikið reynt á þolgæði og
útsjónarsemi rekstraraðila. Óvissan
hefur verið algjör og um tíma
þurrkuðust markaðir út. En það má
segja að Norðurland hafi komið
einna best út úr þessum heimsfaraldri
sem hefur gert okkur lífið leitt þessi
ár. Það er mikil uppbygging fram
undan og óvissa enn fyrir hendi,
margar brekkur sem eftir er að klífa,
en mér finnst staðan vera nokkuð
góð t.d. varðandi sumarið og eins
mun margt breytast til betri vegar
gangi áform nýs flugfélags, Niceair,
á Akureyri eftir,“ segir hún.
Arnheiður segir að ferðaþjónustan
á Norðurlandi hafi komið betur
út en í öðrum landshlutum, tekist
hafi að aðlaga reksturinn breyttum
forsendum og ná inn sterkum
innanlandsmarkaði, „sem segja
má að hafi haldið fyrirtækjunum
gangandi í gegnum þessi ár“,
segir hún. Þar af leiðandi eru flest
fyrirtæki á norðanverðu landinu
enn til staðar þó sum séu í breyttu
formi frá því sem áður var. „Innlendi
markaðurinn hefur verið mjög
sterkur fyrir norðan undanfarin ár,
Akureyri, Húsavík, Siglufjörður
og Mývatnssveit hafa mikið
aðdráttarafl og margir voru á ferli á
þessum slóðum og héldu greininni
gangandi.“ Arnheiður segir þó að
mörg fyrirtæki hafi lent í kröppum
dansi yfir kórónuveirutímann
og skorið allt niður hjá sér. „Við
höfum því miður misst gott fólk út
úr greininni og mikla þekkingu.“
Þörf fyrir mikinn stuðning
Ljóst er að sögn Arnheiðar að
greinin þurfi á miklum stuðningi
að halda varðandi þá uppbyggingu
sem fram undan er í ferðaþjónustu
en stærsti vandinn sem við blasir
er lítil eiginfjárstaða, mikil söfnun
skammtímaskulda og ósjálfbær
skuldsetning margra félaga. Mikil
skuldasöfnun hafi átt sér stað á
tímabili heimsfaraldursins og
morgunljóst að mörg félög ráði
ekki við þá stöðu. Hún sé þó
misjöfn eftir því í hvaða greinum
fyrirtækin starfi, bílaleigur komi
einna best út, hópferðafyrirtæki
og þeir veitingastaðir sem höfðu
erlenda ferðamenn sem helsta
markhóp koma verst út. „Þetta hefur
verið upp og ofan á milli fyrirtækja
og greina í ferðaþjónustunni, við
höfum til að mynda heyrt af því
að veitingastaðir sem gera út á
innlenda ferðamenn hafi átt sín bestu
ár á meðan heimsfaraldurinn stóð
yfir. Það skiptast á skin og skúrir,“
segir hún.
Hefja fjárhagslega
endurskipulagningu í haust
Markaðsstofa Norðurlands hélt
í liðinni viku fundi ásamt KPMG
um framtíð ferðaþjónustunnar á
Norðurlandi þar sem farið var yfir
stöðuna og tækifæri framtíðar. Þeir
voru haldnir á Akureyri og Varmahlíð.
KPMG hefur gert greiningu á
fjárhagslegri getu ferðaþjónustunnar
til að mæta líklegri fjölgun erlendra
ferðamanna til landsins á næstu
misserum og einnig er í skýrslunni að
finna greiningu á getu greinarinnar til
að ráða fram úr þeim fjárhagsvanda
sem heimsfaraldurinn leiddi af sér.
Eins er fjallað um hvaða úrræði gætu
helst gagnast til að vinna sig út úr
þeirri stöðu sem greinin er í.
Arnheiður segir að þegar háannatíð
sumarsins í ferðaþjónustunni lýkur
þegar líður á haustið muni félög í
ferðaþjónustu hefja fjárhagslega
endurskipulagningu sína. „Það er
alveg á tæru að fyrirtækin munu
varla ná að klóra sig alein og sjálf
út úr þessum vanda. Við vonum
að stjórnvöld muni standa vel með
ferðaþjónustunni áfram líkt og áður
og aðstoða fyrirtækin í gegnum
skuldavandann og styðja þau við
nýsköpunar- og þróunarverkefni sem
fram undan eru til að flýta endurreisn
greinarinnar.“ /MÞÞ
LÍF&STARF
Arnheiður Jóhannsdóttir, framkvæmdastjóri Markaðsstofu Norðurlands:
Undanfarin ár erfið og fyrirtækin
klóra sig ekki sjálf út úr vandanum
– Sterkur innanlandsmarkaður hélt fyrirtækjum á Norðurlandi uppi
Ferðaþjónustan á Norðurlandi kom betur út eftir kórónufaraldurinn en í öðrum landshlutum, vel tókst til með að
aðlaga reksturinn breyttum forsendum og ná inn sterkum innanlandsmarkaði. Myndir / Markaðsstofa Norðurlands
Arnheiður Jóhannsdóttir, fram
kvæmda stjóri Markaðsstofu Norður
lands.
Markaðsstofa Norðurlands og Austurbrú:
Fá 40 milljónir til að
markaðssetja flugvelli
– Beint millilandaflug til að dreifa ferðamönnum
Lilja Alfreðsdóttir menningar-
og viðskiptaráðherra undirritaði
samning við Markaðsstofu
Norður lands og Austurbrú um
mark aðs setningu Norðurlands
og Austurlands í tengslum við
flug vellina á Akureyri og Egils-
stöðum og aukið millilanda flug
þar. Markaðsstofan fær 20 millj-
ónir til að sinna þessu verk efni
á Norðurlandi á þessu ári og
Austurbrú fær sömu upphæð fyrir
Austurland.
Markaðsstofan hefur undanfarin
ár haldið utan um flugklasaverkefnið
Air 66N, sem hefur reynst mjög
vel. Breska ferðaskrifstofan Super
Break stóð fyrir beinum ferðum
frá Bretlandi til Akureyrar tvö ár í
röð og hollenska ferðaskrifstofan
Voigt Travel var byrjuð á slíkum
ferðum frá Amsterdam fyrir Covid
heimsfaraldurinn og hefur haldið
þeim áfram á þessu ári. Þá var nýlega
tilkynnt um stofnun flugfélagsins
Niceair á Akureyri, sem mun styðja
enn frekar við markaðssetningu á
Norðurlandi og Akureyrarflugvelli
sem valmöguleika í millilandaflugi
til og frá Íslandi.
Vilja auka dreifingu
ferðamanna um landið
„Við viljum stuðla að aukinni
dreifingu ferðamanna um land allt,“
segir Lilja Dögg ferðamálaráðherra
í tilkynningu frá ráðuneytinu. Bein
millilandaflug séu skilvirk tæki til
þess. Norður- og Austurland hafi upp
á margt að bjóða fyrir ferðalanga,
gæði gisti- og veitingastaða séu
mikil, innviðir hafi eflst verulega
og afþreying aukist til muna.
„Við viljum skapa hagfelld
skilyrði fyrir eflingu ferðaþjónustu
um allt land og á sama tíma stuðla
að fleiri möguleikum í samgöngum
til útlanda fyrir íbúa svæðanna. Í því
felast ákveðin lífsgæði,“ segir Lilja
Dögg.
Fagnaðarefni að finna
stuðninginn
„Það er mikið fagnaðarefni að
ráðherra skuli styðja vel við
bakið á okkur í markaðssetningu
á Norður- og Austurlandi sem
áfangastöðum fyrir beint flug. Nú
stefnir í það að flugvöllurinn á
Akureyri verði tilbúinn fyrir aukna
umferð og þurfum við að geta fylgt
því eftir af krafti. Ferðaþjónustan
og sveitarfélögin fyrir norðan hafa
lagt mikla vinnu í að ná árangri í
þessu en það er nauðsynlegt að
stjórnvöld standi með okkur af
fullum þunga og sýni þannig viljann
til að opna nýjar gáttir til landsins og
ná árangri á alþjóðlegum markaði,“
segir Arnheiður Jóhannsdóttir,
fram kvæmda stjóri Markaðsstofu
Norður lands. /MÞÞ
Arnheiður Jóhannsdóttir, framkvæmdastjóri Markaðsstofu Norðurlands, Lilja
Alfreðsdóttir menningar og viðskiptaráðherra og Jóna Árný Þórðardóttir,
framkvæmdastjóri Austurbrúar, undirrita samninginn. Markaðsstofan
og Austurbrú fá 20 milljónir hvort félag til að vinna að markaðssetningu
flugvallanna á Akureyri og Egilsstöðum. Samningurinn var undirritaður í
flugturninum á Egilsstaðaflugvelli. Mynd / Aðsend