Íslenzk fyndni - 01.10.1976, Síða 54

Reykfjörð lagar ljóðin ýkt,
ljúfan til að styggja.
Ekki er vert að yrkja um slíkt.
Oft má satt kyrrt liggja.
115.
KRISTJÁN SMIÐUR og Sumarliði á Fossi komu í
búð á Bíldudal. Afgreiðslumaðurinn lofaði að gefa
þeim þeirra brennivínsflösku, er ort gæti betri vísu
um mann nokkurn er Jón hét og þótti kvensamur
mjög.
Kristján byrjaði:
Jón fær skjól í kvennakrans,
klæðasól að spanna.
Þá eru jólin heilög hans,
ef hittir í bóli svanna.
Sumarliði vann keppnina, en vísa hans er þannig:
Jón í hnipur vífin við
vekur lipur gaman.
Annan svip fær andlitið
augun kiprast saman.
116.
HARALDUR FRÁ KAMBI orti á góðglaðri stund:
Yfir kaldan eyðisand
einn um nótt ég sveima mikið.
Nú er horfið Norðurland.
Nú er ég kominn yfir strikið.
52