Bændablaðið - 06.10.2022, Blaðsíða 10

10 Bændablaðið | Fimmtudagur 6. október 2022
FRÉTTIR
Hálsaskógur við Djúpavog:
Eyðilegging blasti við eftir hvassviðri
Hálsaskógur, skógarreitur í eigu
Skógræktarfélags Djúpavogs,
er illa útleikinn eftir hvassviðrið
sem gekk yfir landið á dögunum.
Lauslega áætlað telur Kristján
Ingimarsson, íbúi á Djúpavogi, að
á bilinu 300–500 tré hafi laskast
eða eyðilagst.
Mikil vinna er fram undan við
hreinsunarstarf, en hann segir félagið
ekki hafa bolmagn, hvorki mannskap
né fjármuni, til að standa straum af því.
Skógræktarfélag Djúpavogs var
stofnað árið 1952 og hófst handa á því
ári við gróðursetningu í Hálsaskógi.
Sum trén eru jafngömul félaginu, orðin
ansi há, um 20 metrar þau elstu og
tóku á sig mikinn vind. Haldið var
upp á tímamótin í sögu félagsins um
miðjan september og segir Kristján
eyðileggingu skógarins ekki góða
afmælisgjöf. „Þessi stormur sem
yfir okkur reið má segja að hafi lagt
skógræktarsvæðið okkar á hliðina,“
segir hann.
Meiri vindur en skógurinn þoldi
Hálsaskógur er í um tveggja kílómetra
fjarlægð frá Djúpavogi, stendur undir
hálsunum við Hamarsfjörð, sem er
þekkt svæði fyrir mikið hvassvirði
um tíðina.
„Það er oft mjög mikill vindur
á þessum slóðum, við erum því
vön, en þetta var aðeins of mikið.
Það voru á tímabili um 40 metrar
á sekúndu og veðrið stóð yfir í allt
að einn og hálfan sólarhring, það
er meira en skógurinn þoldi,“ segir
Kristján og bætir við að yfirleitt sé
norðvestanátt ríkjandi en nú hafi áttin
verið meira vestanstæð og farið beint
á skógarreitinn. „Þetta var gríðarlegt
álag, mikill stormur sem stóð lengi,“
segir hann.
Kristján segir að jafnt og þétt hafi
verið gróðursett í Hálsaskóg um árin
og hann orðin nokkuð þéttur. Íbúar
nota skógarreitinn mikið, þar hafa
verið gerðir göngustígar og sett
upp borð og bekkir, útilistaverk og
leiktæki. „Þessi reitur hefur mikið
tilfinningalegt gildi fyrir okkur hér
um slóðir, þetta er friðsæll sælureitur
sem er okkur íbúum kær.“
Kristján fékk fregnir af skemmdum
strax eftir að óveðri slotaði og fór
þegar að líta á verksummerki. „Það
blöstu við mér miklar skemmdir, tré
höfðu kubbast í sundur, önnur slitnað
upp með rótum og ég sá að eitt stórt
grenitré hafði rifnað upp, tekið flugið
yfir girðingu um skógræktina yfir
þjóðveginn og hafnað handan hans.
Þannig að greinilega hefur mikið
gengið á,“ segir hann.
Ráðum ekki við þetta ein
Gróðursetning í Hálsaskóg hefur
öll farið fram í sjálfboðavinnu.
Félagið er fámennt og hefur ekki úr
miklu fé að spila. „Við blasir mikið
hreinsunarstarf, nú þarf að bretta upp
ermar og hefjast handa, en það er
alveg ljóst að utanaðkomandi aðstoð
þarf að koma til. Félagið ræður engan
veginn við þetta eitt og sér, ekki er
nægur mannskapur í þetta verkefni og
eins þarf að fá stórvirkar vinnuvélar
til að þetta gangi upp og ég sé ekki
núna hvernig verður hægt að ráða við
það,“ segir Kristján. /MÞÞ
Kristján Ingimarsson á Djúpavogi.
Skógurinn er ekki svipur hjá sjón, en gróft áætlað eru á milli 300 til 500 tré
löskuð eða ónýt í Hálsaskógi. „Þetta var ekki góð afmælisgjöf,“ segir Kristján
en Skógræktarfélag Djúpavogs fagnaði 70 ára afmæli sínu fyrr á árinu.
Myndir / Aðsendar
Miklar skemmdir blöstu við þegar komið var í Hálsaskóg eftir að óveðri slotaði.
Útflutningur hrossa:
Heiðursverðlaunastóðhestur fluttur til Þýskalands
Heiðursverðlaunastóðhesturinn
Eldur frá Torfunesi hefur verið
fluttur til Þýskalands en hann hefur
átt afar góðu gengi að fagna sem
afkvæmahestur hér á landi.
Eldur er undan Mætti frá
Torfunesi og Eldingu frá Torfunesi
og sló fyrst í gegn þegar hann varð
hæstur í flokki 4 vetra stóðhesta á
Landsmóti hestamanna 2011. Hann
á nú 248 afkvæmi og hafa 51 þeirra
hlotið kynbótadóm. Í dómsorðum
heiðursverðlauna segir að Eldur gefi
sterklega byggð hross með trausta og
yfirvegaða lund, hross sem eru prúð
í fasi og mjúkgeng reiðhross með
góðan höfuðburð. Eldur fór utan þann
4. október sl. samkvæmt WorldFeng,
upprunaættbók íslenska hestsins.
Danir sanka að sér
hátt dæmdum stóðhestum
Alls hefur 1.571 hross verið útflutt
það sem af er ári. Útflutningur er
minni í fyrra sem reyndist metár. Þó
hefur glæðst nokkuð í haust og er
talið að sumarhitinn í Evrópu hafi
orðið til þess að hrossaeigendur biðu
með flutning.
Einnig er rætt um að markaðurinn
ytra sé nokkuð mettaður eftir
gríðarlega sölu og flutning í fyrra.
Af þeim 1.571 hrossi sem flutt
hafa verið út á árinu eru 703 hryssur,
232 stóðhestar og 636 geldingar.
Hrossin hafa verið flutt til sextán
landa, langflest til Þýskalands, eða
704 hross. Þá fóru 203 hross til
Svíþjóðar, 181 til Danmerkur, 108 til
Sviss, 93 til Bandaríkjanna og 82 til
Austurríkis. Eitt hross fór til Írlands,
fimm til Belgíu, níu til Bretlands, 14
til Ungverjalands og 16 til Færeyja.
Alls hafa 87 af útfluttu hrossunum
hlotið fyrstu verðlaun í kynbótadómi.
Þeir þrír hæstdæmdu fóru allir til
Danmerkur. Hæst dæmdur er Viðar
frá Skör sem sló í gegn á Landsmóti
hestamanna í sumar en hann er
með 9,04 í aðaleinkunn. Viðar er
nú í eigu Flemming Fast og Gitte
Fast Lambertsen en þau eiga m.a.
glæsihestinn Kveik frá Stangarlæk.
Stóðhesturinn Sólon frá Þúfum
fór einnig til Danmerkur en hann er
með 8,90 í aðaleinkunn kynbótadóms
og keppti m.a. í A-úrslitum A-flokks
á síðastliðnu Landsmóti. Brimnir
frá Efri-Fitjum er einnig fluttur til
Danmerkur, en hann er með 8,75 í
aðaleinkunn.
Fleiri stólpagæðingar
Fleiri hæfileikasprengjur hafa yfirgefið
Frón á árinu. Þar á meðal Magni frá
Stuðlum (aðaleinkunn 8,56) sem
fór til Þýskalands, Þristur frá Tungu
(aðaleinkunn 8,54) sem einnig fór til
Þýskalands, Hávaði frá Haukholtum
(aðaleinkunn 8,52) og Blikar frá Fossi
(aðaleinkunn 8,51) fóru til Svíþjóðar og
Gígur frá Ketilsstöðum (aðaleinkunn
8,86 án skeiðs) fór til Bandaríkjanna.
Hæst dæmdu útfluttu hryssurnar
eru Hreyfing frá Skipaskaga með 8,45
í aðaleinkunn, Frigg frá Torfunesi með
8,32 í aðaleinkunn og Ljósmynd frá
Stekkholti með 8,31 í aðaleinkunn.
/ghp
Aðstandendur Elds frá Torfunesi tóku við heiðursverðlaunum á Landsmóti hestamanna í sumar. Anna Fjóla
Gísladóttir, einn ræktandi hans og eigandi, stendur hér við gæðinginn sem Sigurbjörn Bárðarson situr. Mynd /ghp