Skinfaxi - 01.03.2021, Qupperneq 27

S K I N FA X I 27
Eftir langt og strangt ferli viðurkenndi Íþróttasamband Íslands (ÍSÍ)
hjólaskautaat árið 2018. Í kjölfarið fékk félagið inngöngu í Íþróttabanda-
lag Reykjavíkur (ÍBR) undir nafninu Hjólaskautafélagið. Í dag eru um
60 meðlimir í Hjólaskautafélaginu, deildarliðið Ragnarök og landslið.
Árið 2020 samdi félagið við Reykjavíkurborg um afnot af gömlu verk-
smiðjuhúsnæði Björgunar við Sævarhöfða. Það er nú æfingahúsnæði
félagsins og kallast hinu augljósa nafni Hjólaskautahöllin.
Þurfa að keppa við eigið lið
Júlía segir félagið ungt og enn í mótun. „Við erum reyndar aðeins með
eitt lið í hjólaskautaati hér á Íslandi og þurfum þess vegna að búa til
okkar eigin lið eða bíða eftir því að keppa við erlend. En sífellt eru fleiri
karlar að bætast í hóp þeirra sem æfa hjólaskautaat. Draumurinn er
samt að stofna bæði karlalið og blandað lið innan félagsins,“ segir hún.
„Æfingar eru af tvennu tagi, nýliðaæfingar og liðsæfingar. Á meðan
fólk er að vinna í skauta- og derby-hæfni stundar það nýliðaæfingar en
færist svo upp í liðsæfingar þegar hæfni er til staðar og ef vilji er fyrir
hendi. Hvor hópur æfir tvisvar í viku í tvo tíma í senn,“ heldur hún áfram.
Júlía segir að hjólaskautaat geti vissulega verið dýr íþrótt. Kostnað-
urinn felst í dýrum hjólaskautum og hlífðarbúnaði við hæfi.
„Við viljum að sem flestir geti æft hjá Hjólaskautafélaginu. Til að svo
geti orðið býður félagið meðlimum upp á langtímaleigu á skautum og
búnaði. Það er líka hægt að leigja búnað fyrir stök skipti á opnu gólfi
og diskótekum. Allir þurfa samt að koma með eigin hjálm,“ segir hún.
Júlía segir stuðning ÍBR hafa skipt sköpum við stofnun félagsins.
„Þegar við unnum að því að koma upp húsnæðinu okkar leituðum við
til ÍBR til að athuga hvort það vildi styrkja starfsemina okkar, sem það
gerði. Það var stór þáttur í því að húsið okkar komst á koppinn. Við
erum líka með frábæra styrktaraðila, eins og Lindex og Pepsi Max,“
segir hún.
Júlía segir að þótt félagið sé það eina á Íslandi og aðeins fyrir 18
ára og eldri geti allir sem vilji komið í heimsókn og skautað á opnum
gólfum um helgar. Mánaðarlega eru svo haldin hjólaskautadiskó.
„Allir 18 ára og eldri eru velkomnir á nýliðaæfingu hjá okkur 15.
janúar. Nánari upplýsingar um okkur má finna á www.rollerderby.is
og Roller Derby Iceland á Facebook,“ segir Júlía að lokum.
Texti: Gerða Jóna Ólafsdóttir. Myndir: Hlíðar Berg, Richard Lafortune,
Joe Mac og Eyjólfur Garðarsson.
Fimmtán í liði
Í hjólaskautaati eru tvö fimmtán manna lið sem keppa
í nokkrum tveggja mínútna lotum og kallast hver lota
djamm (e. jam). Í hverju djammi eru fimm skautarar úr
hvoru liði inni á brautinni í einu, djammari og fjórir
varnarmenn.
Hlutverk djammara er að skora stig en hlutverk varnar-
manna er að verjast því að djammari andstæðings komist
framhjá varnarmönnunum. Hann þarf líka að hjálpa sínum
djammara að komast framhjá andstæðingnum.
Í hjólaskautaati er keppt er eftir ströngum reglum og í
Hjólaskautafélaginu er keppt eftir reglusetti Women‘s
Flat Track Derby Association (WFTDA) eins og langflestar
hjólaskautaatsdeildir heims gera, en Hjólaskautafélagið
varð fullgildur meðlimur WFTDA snemma árið 2019.