Morgunblaðið - 28.03.2001, Síða 23

LISTIR
MORGUNBLAÐIÐ MIÐVIKUDAGUR 28. MARS 2001 23
ÞAÐ er ætíð gleðiefni þegar leik-
félög hafa burði og metnað til að sýna
ný verk, hvað þá þegar félagsmenn
ráðast í að skrifa þau sjálfir. Þannig
er nú málum háttað hjá Leikfélagi
Dalvíkur, sem löngum hefur notið
virðingar fyrir metnaðarfullt starf og
góða leiklist. Fjórir félagsmenn
skrifa saman leikrit sem einn þeirra
fylgir síðan alla leið sem leikstjóri en
hinir þrír leika. Að auki setur einn
höfundanna saman hljóðmynd af
stakri fagmennsku. Mannauður
Leikfélags Dalvíkur er svo sannar-
lega í hróplegu ósamræmi við höfða-
tölu staðarins.
Allt sem þér viljið… er að forminu
til sakamálaleikrit af sígildri gerð.
Stórfjölskylda er veðurteppt á heimili
ættmóðurinnar nýlátinnar og í erfða-
skrá hennar eru óvæntar ráðstafanir.
Síðan reynist auðvitað maðkur í
mysu. Að sjálfsögðu verður ekkert
greint hér frá ætterni maðksins né
efnainnihaldi mysunnar. Það eru for-
réttindi áhorfenda að fræðast um
slíkt. Allt sem þér viljið… er
skemmtileg sýning, borin uppi af
kraftmiklum leik og fyndni í texta.
Höfundakvartettinn hefur lagt upp
með flókna fléttu eins og formið
krefst, en það verður að segjast að
þeim tekst hvorki nógu vel að nýta
hana til að byggja upp spennu né að
leiða alla þræði hennar til farsælla
lykta. Verkið er fullt af skemmtileg-
um persónum og uppákomum og höf-
undum lætur vel að skrifa lipur sam-
töl. Með færri persónum og einfaldari
og skýrari grunnsögu sem allar per-
sónurnar tengdust hefði Allt sem þér
viljið… að mínu viti orðið bráðgott og
lifandi verk. Og þó svo höfundar
verksins hafi hér að mínu viti ætlað
sér um of þá er fyllsta ástæða til að
hvetja þá til dáða og frekari skrifa.
Það er ljóst af sýningunni að leik-
stjórinn Arnar Símonarson kann
ágætlega til verka. Ef til vill hefði þó
verið klókt af Dalvíkingum að fá ut-
anaðkomandi leikstjóra að verkinu. Á
stundum hefði ég kosið að betur væri
hnykkt á mikilvægum atriðum og af-
staða persónanna til atburða og
hverrar annarrar væri skýrari.
Kannski hafa þessir hlutir legið ein-
um of ljósir fyrir höfundinum til að
leikstjórinn sæi ástæðu til að leggja
áherslu á.
Það er löngu vitað mál að Dalvík-
ingar eiga leikara góða og þar sem
hefðin og reynslan safnast fyrir hafa
nýliðar eitthvað að byggja á og
þekkja þær kröfur sem gerðar eru. Í
þessari sýningu stíga nokkrir leikar-
anna sín fyrstu spor og standa sig all-
ir með prýði. Hópurinn er agaður
þannig að mannfjöldinn á sviðinu
virkar aldrei óeðlilegur, allt gengur
eins og smurt. Og þegar tækifæri
gefast ná margir leikaranna að
blómstra. Það gustaði til að mynda af
Olgu Guðlaugu Albertsdóttur í hlut-
verki Pálínu, drepfyndin mynd af
kjarnorkukonu. Önnur slík er skör-
ungurinn Sesselja frá Skuld, sem
Dana Jóna Sveinsdóttir gerði kostu-
leg skil. Lárus Heiðar Sveinsson var
hlægilegur útlendur kúarektor og
hinn heimóttarlegi Rafn var snyrti-
lega teiknaður af Júlíusi G. Júlíus-
syni.
Þessar kostulegu persónur, og all-
ar hinar, gefa til kynna þá möguleika
til góðra verka sem höfundahópur
Dalvíkinga er rétt að byrja að miðla
af. Við bíðum því spennt eftir hvar
þau drepa næst niður penna.
Bráðgott og
lífvænlegt verk
LEIKLIST
L e i k f é l a g D a l v í k u r
Höfundar: Arnar Símonarson,
Dana Jóna Sveinsdóttir,
Friðrik Ómar Hjörleifsson og
Sólveig Rögnvaldsdóttir.
Leikstjóri: Arnar Símonarson.
Laugardagur 24. mars 2001.
ALLT SEM ÞÉR VILJIÐ…
Þorgeir Tryggvason
ELÍSABET Þórðardóttir tek-
ur burtfararpróf í píanóleik frá
Nýja tónlistarskólanum á tón-
leikum í Gerðubergi í kvöld,
miðvikudagskvöld, kl. 20.
Elísabet Þórðardóttir er
fædd 3. september 1979. Hún
lærði píanóleik í Tónmennta-
skólanum frá átta ára aldri til
ellefu ára aldurs. Fimmtán ára
hóf hún að nýju píanónám, árið
1994, í Nýja tónlistarskólanum
hjá Ragnari Björnssyni og nam
píanóleik hjá honum næstu 4
árin eða þar til hann lést, 1998.
Þá fór hún til Rögnvalds Sig-
urjónssonar píanóleikara og
hefur hann verið kennari henn-
ar síðan.
Á efnisskránni er verk eftir
J.S. Bach, Partita nr. 1 í B-dúr,
Sonata op. 31 nr. 2 eftir L.v.
Beethoven, tvær arabeskur eft-
ir Cl. Debussy, Nokturna nr. 1
op. 72, Vals í As-dúr op. 42 og
Ballaða í g-moll op. 23 eftir Fr.
Chopin.
Burtfarar-
próf í
píanóleik
SÉRLEGA góð sala hefur verið á
einkasýningum myndlistarmann-
anna Kristins G. Jóhannssonar og
Jónasar Viðars sem nú standa yfir í
Listasafninu á Akureyri.
Á fyrstu tveimur dögum sýning-
anna seldi Kristinn fjórtán verk og
Jónas tólf og eitthvað hefur bæst
við síðan, að sögn Hannesar Sig-
urðssonar, forstöðumanns Lista-
safnsins. „Ég hef aldrei nokkurn
tíma orðið vitni að slíku áður,“
segir Hannes, sem fullyrðir að ekki
hafi í annan tíma selst svo mörg
verk á sýningum Listasafnsins á
Akureyri.
Morgunblaðið/Kristján
Akureyrsku listamennirnir Jónas Viðar og Kristinn G. Jóhannsson.
Líf í listaverkasölu
á Akureyri
FERTUGASTA sýning á leikritinu
Með fulla vasa af grjóti sem sýnt er
jöfnum höndum á Stóra sviði Þjóð-
leikhússins og Smíðaverkstæðinu
verður annaðkvöld, fimmtudags-
kvöld, á Stóra sviðinu kl. 20.
Rótgróið bæjarfélagið verður
fyrir miklum sviptingum þegar
Hollywood-draumasmiðjan gerir
„innrás“ og býður heimamönnum
gull og græna skóga.
Leikarar eru Hilmir Snær
Guðnason og Stefán Karl Stefáns-
son.
Morgunblaðið/Árni Sæberg
Stefán Karl Stefánsson og
Hilmir Snær Guðnason.
Með fulla vasa af
grjóti í 40. sinn
verslunarmiðst. Eiðstorgi,
sími 552 3970.
Stretchbuxur
St. 38–50 - Frábært úrval