Morgunblaðið - 04.12.2002, Blaðsíða 22
LANDIÐ
22 MIÐVIKUDAGUR 4. DESEMBER 2002 MORGUNBLAÐIÐ
HINN 20. nóvember var formlega
tekið í notkun nýtt og endurbyggt
sambýli fyrir fatlaða á Hvamms-
tanga. Er það samstarfsverkefni
Byggðasamlags um málefni fatl-
aðra á Norðurlandi vestra og Húna-
þings vestra.
Með samningi frá 2. júlí 2001 var
lagður grunnur að framkvæmdinni,
sem Framkvæmdasjóður fatlaðra
studdi með fjárframlagi að upphæð
35 milljónir króna. Var það sú fjár-
hæð sem samið var um til að ljúka
verkinu. Húnaþing vestra sá um
framkvæmdina, sem fólst í að
breyta parhúsi í fjórar einstaklings-
íbúðir ásamt viðbyggingu. Í húsinu,
sem er við Grundartún, eru nú
fimm einstaklingsíbúðir ásamt sam-
eiginlegu rými og aðstöðu fyrir
starfsfólk. Byggingarfyrirtækið
Tveir smiðir ehf. á Hvammstanga
var aðalverktaki og réðu þeir sér
undirverktaka úr héraðinu til ein-
stakra verkþátta. Hönnun annaðist
teiknistofan Gláma/Kím.
Formaður byggðaráðs Húna-
þings vestra, Elín R. Líndal, rakti
feril framkvæmdarinnar og fagn-
aði þessum áfanga Húnaþings
vestra í bættri og efldri þjónustu.
Þakkaði hún félagsmálaráðherra
fyrir þátt hans í þessari uppbygg-
ingu.
Páll Pétursson félagsmálaráð-
herra óskaði öllum farsældar með
þessa framkvæmd. Sagði hann sam-
starf um málefni fatlaðra á Norður-
landi vestra hafa tekist vel og mætti
telja uppbyggingu í málaflokknum
á landsbyggðinni mun öflugri en á
höfuðborgarsvæðinu. Fleiri tóku til
máls og fögnuðu verklokum.
Skúli Þórðarson sveitarstjóri tók
við lyklum frá Tveim smiðum ehf.
og afhenti síðan hverjum íbúa sinn
lykil. Var ljóst að mikil eftirvænt-
ing var hjá heimilisfólki að taka við
svo vistlegu húsnæði sem allir við-
staddir fengu að ganga um. Hús-
næðið var svo opið almenningi til
skoðunar fram á kvöldið.
Morgunblaðið/Karl Ásgeir Sigurgeirsson
Þórdís Lárusdóttir tekur við lykli að íbúð sinni úr hendi Skúla Þórðarsonar, sveitarstjóra á Hvammstanga.
Nýtt sambýli fatlaðra tekið í notkun
Hvammstangi
„VELFERÐ í íslenskum land-
búnaði grundvallast á ásýnd
hans og ímynd,“ sagði Guð-
mundur Björgvin Helgason,
ráðuneytisstjóri í landbúnaðar-
ráðuneytinu, meðal annars er
hann setti ráðstefnuna „Fegurri
sveitir“ þar sem gerð var meðal
annars grein fyrir samnefndu
verkefni.
Verkefni þessu var hrint úr
vör af landbúnaðarráðerra og
var í fyrstu hugsað til eins árs
en vegna umfangs þess og til að
ná meiri árangri var verkefn-
istíminn lengdur. Markmið
verkefnisins var að bæta ásýnd
íslenskra sveita og koma í veg
fyrir slysahættu og mengun.
„Það er ekki nóg að hafa hlutina
í lagi heldur verða þeir einnig
að virðast vera í lagi,“ sagði
Guðmundur Björgvin ráðuneyt-
isstjóri.
Í framkvæmdanefnd verkefn-
isins áttu sæti fulltrúar frá land-
búnaðarráðuneyti, umhverfis-
ráðuneyti, Bændasamtökum
Íslands, Sambandi íslenskra
sveitarfélaga og Kvenfélaga-
sambandi Íslands. Stjórnarfor-
maður verkefnisins var Níels
Árni Lund og verkefnisstjóri
var Ragnhildur Sigurðardóttir.
Verkefnið kostaði 11 milljónir
króna.
Níels Árni Lund sagði að
mikill áhugi hefði verið fyrir
verkefninu og að fá fulltrúa þess
í heimsókn en alls fóru fulltrúar
verkefnisins í á annað þúsund
heimsóknir heim á sveitabæi
vítt um landið. „Nefndin hefur
unnið brautryðjendastarf og ég
sé fyrir mér nánara samstarf
allra aðila á þessu sviði,“ sagði
Níels Árni Lund meðal annars
er hann lýsti verkefninu.
Vörslumenn
landsins
„Hver landeigandi þarf að
vera góður vörslumaður lands-
ins sem hann ber ábyrgð á,“
sagði Ragnhildur Sigurðardóttir
verkefnisstjóri. Hún benti á að
nú byggju 8% þjóðarinnar í
sveitum en þessi hluti þjóðar-
innar réði yfir stærstum hluta
landsins. Hún lagði áherslu á að
gæði framleiðslunnar væri það
fjöregg sem bændur yrðu að
gæta vel að og gæði íslenskrar
landbúnaðarframleiðslu væru
vel samkeppnishæf á markaðn-
um og markaðurinn treysti á
þessi gæði.
„Mér finnst að það ættu allir
að gera sér stöðumat um sínar
aðstæður og fara yfir gátlista
um ásýnd og viðhald heimavið,
sorp- og ruslamál, girðingar,
ónýtar vélar, rusl í skurðum og
fleira,“ sagði Ragnhildur er hún
lagði áherslu á þýðingu þess að
bændur héldu vöku sinni
Morgunblaðið/Sig. Jóns.
Frá ráðstefnunni Fegurri sveitir sem haldin var á Hótel Selfoss.
Góður árangur
af verkefninu
Fegurri sveitir
Selfoss
MIKIÐ var um dýrðir í Ýdölum á
árshátíð Hafralækjarskóla í Að-
aldal þegar nemendur 9.–10. bekkj-
ar léku valin atriði út Karde-
mommubænum eftir Thorbjörn
Egner, en hefð er fyrir því við skól-
ann að nemendur sýni leikrit við
þetta tækifæri.
Ræningjarnir, þeir Jesper, Kasp-
er og Jónatan, fóru á kostum en
þeir voru leiknir af Böðvari Jóns-
syni, James Bóasi Faulkner og Sig-
urði Óla Guðmundssyni, en Soffía
frænka, sem var fyrirferðarmikil á
sviðinu, var leikin af Rán Guð-
mundsdóttur. Sigurður Marteins-
son lék Bastían bæjarstjóra sem
stóð í ströngu og pylsugerðarmað-
urinn og bakarinn höfðu í nógu að
snúast.
Leikstjórar vour Hildur Rós
Ragnarsdóttir og Robert Faulkner,
en undirleik annaðist Juliet Faulk-
ner ásamt nokkrum nemendum
skólans.
Að venju voru yngri bekkirnir
einnig með skemmtiatriði, en 5. og
6. bekkingar fóru með annál ár-
anna 1972, 1982 og 1992 og var þar
gripið inn í ýmislegt úr heimahér-
aði ásamt eftirminnilegum atburð-
um á landsvísu. Þá sýndu 4. bekk-
ingar Þóru borgarhjört í leikgerð
fyrri nemenda skólans þeirra Borg-
ars Þórarinssonar og Odds Bjarna
Þorkelssonar, þar sem Borgar
hafði samið tónlistina en Oddur
Bjarni textann.
Í byrjun samkomunnar söng
skólakórinn nokkur lög og Litli-
kórinn kom fram í fyrsta skipti en
það voru nemendur 1.–3. bekkjar
sem sungu þrjú lög og vöktu börnin
mikla athygli.
Hafralækjarskóli, sem stofnaður
var 16. okt. 1972, minnist þrjátíu
ára afmælis síns með ýmsum hætti
á skólaárinu og eitt er það að gefa
út plötu sem hlotið hefur nafnið
„Bergnumin“ og kemur hún út nú í
vikunni og er það kór skólans sem
syngur lögin auk þess sem nokkrir
eldri nemendur syngja og spila
með. Á plötunni eru m.a. tvö lög
eftir einn fyrrverandi nemanda,
Örlyg Benediksson frá Bergs-
stöðum sem nú stundar mast-
ersnám í tónsmíðum í Pétursborg í
Rússlandi, en um útlit plötu-
umslagsins sá Jón Ásgeir í Aðaldal.
Skólinn hefur um árabil boðið
upp á heildstætt og fjölbreytt tón-
listarnám og hefur haft ákveðna
sérstöðu á þessu sviði þar sem tón-
listarskólinn er að innra skipulagi
með samþætt nám með grunnskól-
anum. Þetta hefur byggst á mikilli
vinnu tónlistarkennaranna þeirra
Roberts og Juliets Faulkner sem
kennt hafa við skólann á annan ára-
tug og hafa nemendur mjög mikið
lært á hljóðfæri og jafnvel gefið sig
að tónsmíðum.
Eftir öll skemmtiatriðin var boð-
ið upp á veitingar og gestum gafst
tækifæri á að skoða sýningu í and-
dyri hússins á ýmsum verkum fyrri
nemenda skólans. Þá var og stiginn
dans við undirleik Hljómsveitar Ill-
uga sem spilaði fram yfir miðnætti.
Mikil ánægja var meðal gesta
með árshátíð þessa.
Morgunblaðið/Atli Vigfússon
Rán Guðmundsdóttir hlaut mikið lof fyrir leik sinn á Soffíu frænku.
Laxamýri
Kardemommubærinn
á árshátíð í Aðaldal
SÍÐASTLIÐINN sunnudag hélt Kvenfélag Eyrar-
bakka sinn árlega basar og var aðsóknin mikil að venju.
Þetta kvenfélag er með þeim elstu á landinu, stofnað
1888 og því að störfum á þriðju öldinni.
Frá upphafi hefur félagið reynt eftir megni að að-
stoða þá sem eru hjálpar þurfi. Fyrstu áratugina var
starfið að mestu bundið við aðstoð við sjúka og fátæka í
þorpinu og þeir munu margir sem eiga kvenfélagskon-
unum skuld að gjalda. Hin síðari ár hefur Kvenfélagið
lagt ýmsum málum lið svo um munar. Þess er skemmst
að minnast að félagið færði Barnaskólanum á Eyr-
arbakka og Stokkseyri 200.000 krónur á afmælisdegi
skólans, en oft áður hafa skólanum borist veglegar gjaf-
ir frá þessu félagi.
Þá er ekki minna um vert að félagið hefur marg-
sinnis lagt dvalarheimili aldraðra, Sólvöllum, lið með
stórum gjöfum og kirkjan hefur einnig notið góðs af
starfinu. Sá siður hefur komist á, að kvenfélagið færir
öllum heimilismönnum á Sólvöllum og ýmsum öðrum
öldruðum gjafir um jólin.
Öll störf eru unnin í sjálfboðavinnu og það eru ófá
handtök sem konurnar inna af hendi til þess að afla
þess fjár sem þær svo gefa til ýmiss konar líknar- og
menningarmála. Kvenfélagið sér jafnan um erfidrykkj-
ur og kaffisölu á vissum dögum. Þá halda þær basar
fyrir hver jól, þar sem til sölu eru handunnir munir og
fleira sem unnið er í frístundum. Loks er þess að geta
að einu sinni á ári heldur kvenfélagið bingó þar sem
jafnan er margt góðra muna.
Þetta árlega bingó verður að þessu sinni í dag, mið-
vikudaginn 4. desember, og hefst klukkan 20.
Mörg handtök og
mikill stuðningur
Morgunblaðið/Óskar Magnússon
Eyrarbakki