Morgunblaðið - 15.04.2003, Blaðsíða 18

ERLENT
18 ÞRIÐJUDAGUR 15. APRÍL 2003 MORGUNBLAÐIÐ

        




    
   ! "#!$#!


  





 
      !" ##$ %$$  &'(')*+,+-.,+/,
 '0,-  * ,1-- 1 -2+-&3 444/,+/,5,&"6&
SJÖ manns hafa látist til viðbótar í
Hong Kong af völdum HABL, heil-
kennis alvarlegrar og bráðrar
lungnabólgu, og 40 ný tilvik hafa
greinst, að sögn AFP-fréttastofunn-
ar. Vísindamenn vonast til að finna
bóluefni gegn HABL á næstu vikum.
Læknir við Michael Smith-stofn-
unina í Vancouver segir vísindamenn
hafa fundið erfðamengi veirunnar
sem talin er valda HABL og því sé
skammt þangað til bóluefni verði
þróað. Erfðamengið hefur verið birt
á sérstakri vefsíðu
(www.bcgsc.bc.ca) á Netinu svo að
vísindamenn víðs vegar um heiminn
geti aðstoðað í baráttunni gegn út-
breiðslu HABL. Alls hafa 132 látist
af völdum veikinnar og rúmlega
3.200 veikst. Kanada er það land ut-
an Asíu sem hefur orðið verst úti af
völdum HABL. Þrettán Kanada-
menn hafa látist af HABL og 283
veikst.
Baráttan gegn HABL-lungnabólgunni
Erfðamengi veirunnar greint
MÁNUÐI eftir þingkosningarnar í
Finnlandi hafa leiðtogar þriggja
stjórnmálaflokka, Miðflokksins,
Jafnaðarmannaflokksins og
Sænska þjóðarflokksins, náð sam-
komulagi um myndun meirihluta-
stjórnar, að sögn AFP-fréttastof-
unnar. Anneli Jäättenmäki, leiðtogi
Miðflokksins, verður forsætisráð-
herra, fyrst finnskra kvenna til að
gegna því embætti.
Finnland verður nú eina landið í
Evrópu þar sem bæði forseti og for-
sætisráðherra eru konur.
Miðflokkurinn hefur verið í
stjórnarandstöðu í átta ár, hann
hlaut 55 þingsæti af 200 í kosning-
unum 16. mars sl. og er stærstur á
þingi. Jafnaðarmannaflokkur
Paavos Lipponens, fráfarandi for-
sætisráðherra, fékk 53 þingsæti.
Sænski þjóðarflokkurinn er nú með
átta sæti og átti ráðherra í fráfar-
andi samsteypustjórn Lipponens.
Flokkurinn samþykkti að verða
þriðja aflið í nýrri stjórn og tryggja
henni þar með meirihluta á þingi.
Ráðherrar verða 18 og fær hvor
flokkur um sig, Miðflokkur og Jafn-
aðarmannaflokkur, átta ráðherra-
stóla en Sænski þjóðarflokkurinn
tvo.
Ný stjórn í
Finnlandi
Reuters
Anneli Jäättenmäki, hinn nýi for-
sætisráðherra Finnlands.
AFTÖKU þriggja manna, sem
reyndu að ræna kúbanskri ferju,
hefur verið mótmælt harðlega víða
um lönd en þær og ofsóknir Kúbu-
stjórnar gegn andófsmönnum
þykja sýna, að fullkominni hörku
verður beitt gegn þeim, sem voga
sér að ögra Fidel Castro forseta
og kommúnistaflokknum.
Í yfirlýsingu frá Kúbustjórn
sagði, að mennirnir þrír hefðu
„fengið réttláta meðferð fyrir
dómstólunum“ en þeir voru síðan
skotnir síðastliðinn föstudag. Aðrir
fjórir voru dæmdir í lífstíðarfang-
elsi, einn í 30 ára fangelsi og þrjár
konur fengu tveggja til fimm ára
fangelsi. Í ríkisráðinu, sem Castro
veitir forstöðu, var fólkinu neitað
um að áfrýja dómunum.
Fólkið rændi ferjunni 2. apríl sl.
en hún varð olíulaus áður en hún
var komin hálfa leið til Flórída og
var þá dregin aftur til Kúbu.
Aftökurnar komu á hæla mjög
harðra dóma yfir 75 andófsmönn-
um en þeir voru dæmdir í sex til
28 ára fangelsi fyrir að ógna ör-
yggi ríkisins. Stóðu réttarhöldin
yfir þeim aðeins í nokkrar klukku-
stundir.
Þessir dómar og aftökurnar í
síðustu viku hafa verið fordæmd
harðlega á Vesturlöndum og meðal
annars hefur verið efnt til mót-
mæla á Spáni þar sem þess hefur
verið krafist, að Fidel Castro verði
skipað á bekk með Saddam Huss-
ein og ETA, hryðjuverkasamtök-
um baskneskra aðskilnaðarsinna.
Óttast
framtíðina
Portúgalski rithöfundurinn og
Nóbelsverðlaunahafinn Jose Sara-
mago, gamall vinur og stuðnings-
maður Castros, segir í grein, sem
birtist í gær í spænska blaðinu El
Pais, að aftaka mannanna þriggja
hefði verið algjörlega óafsakanleg.
„Kúbustjórn hefur ekki afrekað
neitt með dauða þessara manna.
Hún hefur hins vegar eyðilagt von-
ir mínar, svikið drauma mína og
vináttu,“ segir Saramago, sem er
kommúnisti, en hann byrjaði grein
sína og endaði með þessum orðum:
„Nú er mælirinn fullur.“
Aftökurnar voru eitt aðalmálið í
öllum spænsku fjölmiðlunum og í
leiðara El Pais sagði:
„Eftir alræðisvald í 43 ár og í
skjóli Íraksstríðsins hefur Fidel
Castro hrint af stað mestu of-
sóknum í landinu í áratugi. Það
sýnir hve mjög hann óttast um
framtíð sinnar steinrunnu stjórn-
ar og hve lítils hann metur álit
umheimsins.“
Aftökum á Kúbu
harðlega mótmælt
„Nú er mælirinn fullur,“ segir Kúbuvinurinn og
Nóbelsverðlaunahafinn Jose Saramago
AP
Aftökum og dómum yfir andófsmönnum á Kúbu mótmælt í Madrid á Spáni.
Á spjaldinu stendur: „Á Kúbu er það glæpur að hugsa og tala.“
Havana, Madríd. AP, AFP.
ÞRJÁTÍU og þrír Evrópumenn,
sem hurfu í Saharaeyðimörkinni
fyrir nokkrum vikum, eru líklega
ekki lengur í Alsír. Er það haft eft-
ir foringja í alsírska hernum, sem
leitað hefur mannanna, en talið er
að mönnunum hafi verið rænt.
Ekkert er þó vitað um mannræn-
ingjana eða hugsanlegar kröfur
þeirra.
„Ég tel að þeir séu enn á lífi en
ekki lengur í Alsír,“ sagði foring-
inn, sem hefur aðsetur í Ouargla,
um 800 km fyrir sunnan Algeirs-
borg. Mennirnir, 12 Austurríkis-
menn, 15 Þjóðverjar, fjórir Sviss-
lendingar, Hollendingur og Svíi,
hurfu fyrir nokkrum vikum og þeir
fyrstu um miðjan febrúar. Hafa yf-
irvöld í Alsír staðið fyrir mikilli leit
að þeim á svæði, sem er alls um
tvær milljónir ferkílómetra.
Ferðafólkið var í sex hópum án
innfæddra leiðsögumanna og
spurðist síðast til þess á svæðinu
milli Ouargla, Djanet og Taman-
rasset, um 1.900 km suður af Al-
geirsborg. Hafa leitarmenn farið
vítt og breitt um svæðið á jeppum
og úlföldum og svipast um eftir
fólkinu úr þyrlum búnum nætur-
sjónaukum en án árangurs. Telur
foringinn útilokað, að það hafi villst
vegna þess, að Bandaríkjamenn
lokuðu fyrir GPS-kerfið vegna
Íraksstríðsins, og bendir á, að það
hafi verið með gervihnattasíma.
Al-Qaeda að verki?
Alsírska blaðið El Watan segir,
að á þessu svæði hafi áður verið ísl-
amski stríðsherrann Mokhtar Bel-
mokhtar en nokkuð sé síðan hann
hörfaði með lið sitt til Nígers og
Malís. Vegna þess telur blaðið ekki
óhugsandi, að liðsmenn al-Qaeda,
hryðjuverkasamtaka Osama bin
Ladens, hafi rænt mönnunum auk
þess sem smyglarar, þar á meðal
eiturlyfjasmyglarar, fari oft um
þetta svæði.
Hvarf fólksins vekur mikla furðu
og alsírsk yfirvöld fullyrða, að hirð-
ingjar á þessum slóðum hafi hvorki
orðið varir við það né hugsanlega
ræningja þess. Enn er þó vonast
til, að það sé á lífi og hafa Þjóð-
verjar og Austurríkismenn sent
sérþjálfaða menn til að taka þátt í
leitinni. Tímaritið Der Spiegel seg-
ir, að þýska stjórnin telji, að
„ókunn hryðjuverkasamtök“ hafi
rænt fólkinu.
Hvarf 33 Evrópumanna í Sahara-eyðimörkinni
Hugsanlega fangar
hryðjuverkasamtaka
Tamanrasset. AFP.
VAXANDI spenna er í samskiptum
stjórnvalda í Kólombíu og Venesúela
en stjórnarherinn í síðarnefnda ríkinu
er sakaður um að styðja vinstri-
sinnaða skæruliða í Kólombíu með
beinum hætti.
Koma þessar ásakanir fram í yfir-
lýsingu frá AUC, Sameinuðum sjálfs-
varnarsveitum Kólombíu, en þær
hafa lengi barist gegn FARC eða Kól-
ombíska byltingarhernum. Í yfirlýs-
ingunni segir, að flugherinn í Venes-
úela hafi tekið þátt í árás FARC á
stöðvar AUC í Catatumbo-héraði í
mars og apríl. Hafi liðsmenn FARC
þá komið frá bækistöðvum í Venes-
úela þar sem þeir haldi til í skjóli þjóð-
varðliðsins í Venesúela.
Íbúar í La Gabarra-héraði styðja
einnig þessar ásakanir og segja, að
21. mars sl. hafi venesúelskar orr-
ustuflugvélar og þyrlur látið að sér
kveða í átökum þar.
Carolina Barco, utanríkisráðherra
Kólombíu, hefur tekið þetta mál upp
við kollega sinn í Venesúela, Roy
Chaderton, og það verður einnig rætt
á fundi forsetanna, Hugo Chavez, for-
seta Venesúlea, og Alvaro Uribe, for-
seta Kólombíu, 23. þessa mánaðar.
Hafa samskipti landanna farið hríð-
versnandi síðan vinstrimaðurinn
Chavez komst til valda í Venesúela.
Spenna milli Venesúela og Kólombíu
Chavez sagður
styðja skæruliða
Reuters
Hugo Chavez , forseti Venesúela,
syngur þjóðsönginn á útifundi.
Bogota. AFP.