Fréttablaðið - 04.12.2004, Page 70

42 4. desember 2004 LAUGARDAGUR
Ofsalega ánægð
Rödd hennar er rám og að-eins rispuð þar sem húnsitur keik á rúmstokk
glæsihótels í Lyon. Nýlega vökn-
uð eftir konunglegt samkvæmi
þar sem skálað var fram á
morgun eftir vel heppnað verk
við að skreyta þrettán metra
jólatré fyrir utan óperuhúsið í
Lyon rauðslegnu jólaskrauti frá
Ikea. Tréð er árleg vinagjöf
sænsku þjóðarinnar til þeirrar
frönsku. Bíður eftir að segja
'Farvel Frans' og setjast í mjúkt
sæti breiðþotunnar sem flytur
hana heim til Svíþjóðar til eigin-
manns og þriggja barna.
„Ísland verður reyndar alltaf
heima, en nánasti kjarninn er í
Svíþjóð,“ segir Seltirningurinn
Sigga Heimis, einn tíu fastráð-
inna hönnuða Ikea í heiminum
og sú sem á allan heiður af hinni
nýju jólalínu Ikea, sem sótti inn-
blástur frá Íslandi, norðurljós-
unum og Norðurpólnum.
„Jólaskrautið í ár átti að vera
extra norðlægt og þar sem ég
kom frá norðlægasta landinu
var ég valin til að skapa jólalín-
una, alls áttatíu hluti. Þetta var
mikil törn frá febrúar til maí í
fyrra, en ferlega skemmtileg
vinna. Ég bjó í kínversku borg-
inni Shanghæ, ófrísk af mínu
fyrsta barni þegar ég bjó til
engla og sænskar geitur,
ljósakransa og lampa, en vör-
urnar hafa fengið frábærar við-
tökur og Glensa-ljósakransinn
er reyndar uppseldur á Ítalíu og
víðar.“
Ítalíufrík sem lenti í Svíþjóð
Sigga er fædd og uppalin á Sel-
tjarnarnesi. Sem krakki var hún
eins og grár köttur í Myndlistar-
skólanum.
„Þegar ég var sautján fór ég
sem skiptinemi til Bandaríkj-
anna, en hafði áður valið MR
sem menntaskóla. Þurrara ger-
ist það ekki, enda engin mynd-
listarkennsla í skólanum. Í New
Jersey lenti ég á kennara sem
hvatti mig til að fara í hönnun
eða arkitektúr, og mánuði eftir
að ég kláraði stúdentinn var ég
komin til Ítalíu, en hafði tekið
ítölskukúrsa með skólanum. Ég
byrjaði svo í iðnhönnun í Mílanó
um haustið.“
Eftir útskrift sem iðnhönnuð-
ur setti Sigga á fót fyrirtækið
Hugvit og hönnun, sem hún rak
á Íslandi í fimm ár. Á þeim árum
tók hún þátt í sýningu íslenskra
innanhússarkitekta í Bella Cent-
er í Kaupmannahöfn.
„Þá kemur til mín Lars Eng-
man, hönnunarstjóri Ikea, og
spyr hvort ég vilji byrja sem
„freelance“-hönnuður hjá fyrir-
tækinu. Ég gerði við hann samn-
ing, en þar sem ég var laus og
liðug dreif ég mig aftur til Ítalíu
í meistaranám. Eftir útskrift
þar bauð Lars mér fasta stöðu,
sem var ótrúlegt tækifæri, og
ég fluttist til Älmhult, sem er
Ikeabærinn sjálfur. Ég fékk
sjokk þegar ég kom þangað enda
mikið Ítalíufrík, en bærinn
lengst inni í svörtustu Svíþjóð
og allt snýst um Ikea. Eigandi
Ikea er frá Älmhult og þar er öll
þróunarvinna unnin; alls 800
manns á vinnustaðnum.“
Stoltust af jólakransi og ísbirni
Þegar Sigga fluttist til Älmhult
hófst tími endalausra ferðalaga,
en að jafnaði fór Sigga í utan-
landsferðir fyrir Ikea fjórum
sinnum í mánuði.
„Við ferðumst rosalega og
mér fannst það ágætt meðan ég
var ein og frjáls sem fuglinn.
Ikea er með yfir 200 verslanir í
heiminum og því tækifæri til að
skoða ólíka menningarheima.
Framleiðslan er oft tvö ár fram í
tímann svo hægt sé að dreifa
sömu vörum í búðirnar á sama
tíma og þarf að framleiða gífur-
legt magn fyrir hverja búð.
Hverjum einasta hlut þurfum
við að fylgja eftir og fara í verk-
smiðjuna, hvar sem hún er í
heiminum. Það er fljótlegra að
fara á staðinn og vinna með
fólkinu en að senda teikningar;
ekki síst í Kína, þar sem tuttugu
prósent alls Ikea-varnings eru
framleidd.“
Hún segir sérkennilega til-
finningu að sjá eigin hönnun um
alla heimsbyggðina.
„Í gær sá ég þrjár verslanir
sem notuðu jóladótið mitt sem
útstillingar í búðarglugga. Það
er vissulega furðulegt að sjá
sína eigin hönnun slá í gegn og
verða fyrir valinu hjá fólki af
ýmsu þjóðerni.“
Sjálf segist Sigga vera stolt-
ust af eigin Ikea-hönnun í ál-
hillukerfi sem aldrei kom til Ís-
lands, ísbirni fyrir börn að leggja
sig á og nýja jólaljósakransinum.
Fann ástina á plastnámskeiði
Árið 2002 fór Sigga á plastnám-
skeið í Tékklandi. Sessunautur
hennar á námskeiðinu var
sænski verkfræðingurinn David
Sandal.
„Við vorum bara vinir í fyrstu
en fljótlega kviknaði ástin,“ seg-
ir Sigga hamingjusöm. „Á tíma-
bili var hann búinn að þekkja
mig lengur ólétta en ekki, en
dóttir okkar er nýorðin eins árs.
Ég fékk líka tvo fríska stráka í
kaupbæti, sem David átti á lager.
Svíar eru jafnan með sameigin-
legt forræði og drengirnir hjá
okkur aðra hvora viku.“
Þegar litla stúlkan var fimm
mánaða fór Sigga í vinnuferð til
Kína.
„Ég var komin heim aftur eft-
ir fjóra daga, enda með krúttið á
brjósti. Fæðingarorlof Svía er
365 dagar, en ég byrjaði að vinna
aftur þegar hún var níu mánaða.
Fékk illt auga margra fyrir að
vera vond mamma, en trúi sjálf
að hægt sé að blanda saman
vinnu og móðurhlutverki svo
hvorugt verði útundan.“
Hún segir lífið hafa tekið
stakkaskiptum við að verða
þriggja barna móðir.
„Einn daginn sat ég með hana
sex mánaða og bræðurna heima
með fullt hús af vinum, hugs-
andi: „Hvað gerðist?!“ En maður
fær svo mikið í staðinn. Að vera
mamma er það skemmtilegasta,
frábærasta og yndislegasta sem
nokkur kona getur gert. Mig
langaði aldrei í barn né vissi
hvort það yrði mitt hlutskipti, en
Guð, þetta er það besta í heimi.
Nú spái ég ekki lengur í Prada-
skó heldur skoða barnabúðir út í
eitt,“ segir Sigga og hlær dillandi
hlátri.
Andlega rík í vinnunni hjá Ikea
Eftir að David og Sigga felldu
hugi saman eignuðust þau heimili
í Hässleholm, þar sem David ólst
upp og sleit barnsskónum. David
hefur nú tekið við starfi þróunar-
stjóra hjá hinu kunna fyrirtæki
Brio.
„Hässleholm er í hálftíma
lestarfæri við Älmhult og Brio
skammt frá. Við tökum því sömu
lest á morgnana, nema David fer
út einni stöð á undan. Við höfum
unnið að mörgu saman og bætum
hvort annað upp. Saman höfum
við til dæmis unnið að nýjum
skólahúsgögnum fyrir Pennann
og spaghettimæli í Kokku.“
Hún segir Ikea yndislegan
vinnustað, en þó vilji hún ekki
festast of lengi.
„Þrír af okkur tíu hönnuðunum
hafa unnið lengur en 25 ár. Ég vil
ekki lenda í því. Það segir samt
mikið um fyrirtækið að rúmlega
níutíu manns í Älmhult hafa unnið
þar lengur en aldarfjórðung. Starf-
ið býður upp á mikið; auðvelt að
flytja sig til innan fyrirtækisins og
jafnvel til útlanda. Þetta er ómet-
anlegur skóli, enda stærsta heimil-
isvörufyrirtæki í heiminum.“
Sigga segir starfið þó hálfgert
hugsjónastarf.
„Maður verður ekki ríkur af
peningum, en þeim mun ríkari
andlega af minningum og við-
kynningu alls fólksins sem mað-
ur hittir á ferðalögunum um
heiminn. Það eru 24 tímar í sólar-
hringnum. Átta af þeim sef ég.
Aðra átta leik ég mér í vinnunni.
Gæti ekki verið betra og líf mitt
er sem draumur. Ég er ofsalega
ánægð,“ segir hún af staðfestu,
þeirri sömu og hún notar þegar
hún talar um framtíðina með fjöl-
skyldunni heima á Íslandi. ■
Jólaljósin lýsa svo sannarlega upp svartasta skammdegið. Eitt það nýjasta
og mest áberandi í gluggum landsmanna er þykkur ljósahringur eftir
íslenska iðnhönnuðinn Siggu Heimis, en Sigga er einn tíu fastráðinna
hönnuða hjá Ikea í öllum heiminum. Reyndar er allt jólaskraut Ikea í ár
sköpunarverk Siggu, sem sótti innblásturinn heim til jólalandsins Íslands.
Þórdís Lilja Gunnarsdóttir náði í Siggu á hótelherbergi í Lyon.
AF SKÖPUNARKRAFTI SIGGU Í ÞÁGU IKEA OG HEIMILA UM ALLA JÖRÐ Jólavörur Ikea þessi jólin eru allar sprottnar úr ranni Siggu Heimis sem sótti innblásturinn heim til Íslands og norðurljósanna. Ljósakransinn á fyrstu
myndinni hefur slegið rækilega í gegn, er uppseldur í nokkrum löndum og verður aftur til sölu um næstu jól. Á myndunum má sjá fleiri hluti úr jólalínunni en einnig ísbjörn sem Sigga hannaði sem púðamottu fyrir börn og
hillueiningar sem hún segir eitt af stoltunum sínum fyrir Ikea.
EKTA ÁST ÞÓTT HÚN HAFI
KVIKNAÐ ÚT FRÁ PLASTI
Sigga kynntist ástinni sinni á
plastnámskeiði Ikea í Tékklandi,
en sessunautur hennar var
verkfræðingurinn David Sandal.
Saman eiga þau eina dóttur og
hann á tvo fríska stráka.