Morgunblaðið - 06.04.2006, Blaðsíða 47

MORGUNBLAÐIÐ FIMMTUDAGUR 6. APRÍL 2006 47
MENNING
VIÐ FYRSTU sýn virðist mál-
verkasýning Lilju Kristjánsdóttur í
Galleríi Fold vera mjög hefðbundin,
rétt eins og listakonan hefði ákveðið
að ganga inn í aldagamla hefð og
mála portrettmyndir í raunsæisleg-
um, dökkum og drungalegum stíl
fyrri tíma. En fljótt kemur í ljós að
ekki er allt sem sýnist, hér er ýmsu
snúið á hvolf og ýmist gert grín að
eða velt upp spurningum um málefni
samtímans, allt undir merkjum hefð-
bundinnar málaralistar. Málverk
Lilju eru af frásagnarlegum toga,
hvert verk segir einhvers konar
sögu eða gefur hana í skyn. Nokkur
meginþemu má greina á sýningunni,
íslensk portrettmyndahefð og
sveitalíf eru í fyrirrúmi en sam-
tímalegri viðfangsefni á borð við nýj-
ustu tækni, útlitsdýrkun samtímans,
stafræna myndvinnslu og spurn-
ingar um fjölföldun listaverka, fyr-
irmynd og eftirmynd. Lúmskur og
lágstemmdur húmor ríkir í mynd
eins og „Viltu að hann fari eða veri?“
þar sem titill myndar segir hálfa
söguna, hér gengur vel saman húm-
or, myndefni og vinnuaðferð. Sama
má segja um Sveitalúða I og II og
fleiri verk þar sem íslenskt sveitalíf
er í forgrunni.
Ekki fer þó hjá því að málverk
Lilju veki spurningar og þar sem
ádeilan beinist að ákveðnum mál-
efnum á borð við t.a.m. útlitsdýrkun
ríkir ekki eins afgerandi samræmi
milli myndefnis og stílbragða. Ekki
er augljóst hvers vegna listakonan
velur að prýða persónur sínar einatt
mjög svipáþekku andliti, en þó má
gera ráð fyrir því að hér sé ekki lögð
áhersla á einstaklingseinkenni held-
ur ímynd einhvers óskilgreinds al-
múga.
Stílbrögð Lilju eru sérstök að því
marki að þau kalla fram afar misvís-
andi tengingar, allt frá Gunnellu til
Odd Nerdrum, svo erfitt er að meta í
hvora áttina listakonan ætlar sér.
Þetta kemur þó ekki í veg fyrir að
myndverk á borð við fyrir-mynd og
eftir-mynd og Pirrandi error tengja
óvænt saman lág- og hámenningu og
kalla fram hugleiðingar sem tengj-
ast jafnt samtímanum sem málara-
hefð fyrri tíma, vekja spurningar um
það hvaða augum samtíminn líti for-
tíðina og meistaraverk hennar. Ekki
síst vakna spurningar um það hvern-
ig lífi málverk lifi í dag þegar hið
fræga „Musée imaginaire“ sem
André Malraux skrifaði um á sínum
tíma og átti þá við hið ímyndaða
listasafn sem skapaðist með marg-
földun og dreifingu listaverka með
hjálp prent- og ljósmyndatækni er
nú orðið þúsundfalt á við það sem
það var og heimslistin löngu að-
gengileg á tölvuskjám allra sem
slíka gripi eiga.
Morgunblaðið/Ásdís
Eitt verka Lilju Kristjánsdóttur.
Sveitarómans milli
gæsalappa
MYNDLIST
Gallerí Fold
Lilja Kristjánsdóttir. Til 8. apríl. Gallerí
Fold er opið daglega 10–18, lau. 11–17
og sunnud. 14–17.
COPY/PASTE
Málverk
Ragna Sigurðardóttir
ANNETTE Lassen heldur fyrirlestur á vegum
Stofnunar Vigdísar Finnbogadóttur fimmtudaginn 6.
apríl kl. 12.05 í stofu 102 í Lögbergi. Í þessum fyr-
irlestri kynnir Annette Lassen nokkrar af mikilvæg-
ustu niðurstöðum doktorsrannsóknar sinnar sem
kallast „Óðinn á kristnu bókfelli: textasöguleg
stúdía“. Þar rannsakar hún hinn heiðna guð Óðin
eins og hann birtist í margvíslegum textum; kon-
ungasögum, samtímasögum, riddarasögum, fortíð-
arsögum og íslenskum dýrlingasögum. Í ljós kemur
að myndin sem birtist af Óðni er háð bókmennta-
greininni og hugmyndafræðinni sem birtist í þeim.
Sérstaklega kemur í ljós að kristin hugmyndafræði
textanna skiptir höfuðmáli í því hvernig guðinn birt-
ist. Óðinn er þannig ýmist sýndur sem guð, mann-
eskja eða djöfull.
Fyrirlesturinn verður fluttur á íslensku og er öll-
um opinn.
Óðinn á kristnu bókfelli
HÁDEGISTÓNLEIKARÖÐ Hafn-
arborgar, menningar- og listastofn-
unar Hafnarfjarðar, hefur verið
starfrækt frá því í ágúst 2003 þar
sem boðið er upp á tónleika í hádeg-
inu einu sinni í mánuði. Nú er komið
að hinum unga tenór Braga Berg-
þórssyni að hefja upp raust sína í
Hafnarborg sem hann mun gera við
píanóundirleik Antoníu Hevesí
klukkan 12:00 í dag. Antonía er auk
þess listrænn stjórnandi tónleika-
raðarinnar og velur hún þá lista-
menn sem fram koma á tónleik-
unum. Braga kynntist hún þegar
þau voru að vinna að óperunni Grett-
ir eftir Þorkel Sigurbjörnsson sem
sýnd var í Kanada í janúar síðast-
liðnum.
Samkrull af aríum
Hádegistónleikarnir bera yf-
irskriftina „Dein ist mein ganzes
Herz“ en á efnisskránni eru aríur
eftir Donizetti, Mozart, Verdi og
Lehár. „Þetta er eitthvað svona
samkrull af aríum sem ég hef verið
að skoða í skólanum,“ segir Bragi en
hann er á fyrsta ári í óperudeild
Guildhall School of Music and
Drama í London og lætur vel af
náminu. „Við vorum að setja upp
senur í sýningu sem samanstendur
af senum úr hinum og þessum óp-
erum. Þetta er búið að vera mjög
gaman og það er mikið að gera. Gott
prógramm á manni, ekkert hangs,“
segir Bragi og hlær. „Þetta er
tveggja ára nám og þá verð ég orð-
inn fullgerður óperudrengur. Þá
tekur við hinn stóri heimurinn en ég
veit ekki hvað gerist þá.“
Er mikið að gera fyrir óp-
erusöngvara á Íslandi? „Það fer eftir
árstíðum líka en ekki bara eftir því
hvernig söngvari þú ert. Það er
kannski meira að gera í skemmti-
bransanum en óperunni beint.“
Bragi segir að það sé ábyggilega
meira af íslenskum óperusöngvurum
en margir halda. „Það er mikið af
góðum söngvurum sem búa erlendis
og fáir hafa heyrt af hér heima,“ seg-
ir Bragi og bætir við að tilhneigingin
sé eðlilega sú að íslenskir söngvarar
sækja mikið út fyrir landsteinana
þar sem er meira við að hafast.
Sungið í móðurkviði
Bragi er kominn af miklu söng-
fólki en foreldrar hans eru söngv-
ararnir Bergþór Pálsson og Sólrún
Bragadóttir. „Ætli ég hafi ekki
ómeðvitað ákveðið að verða söngvari
í maganum á móður minni. Ég vildi
aftur á móti ekki viðurkenna það
fyrr en um tvítugt þegar ég kom út
úr skápnum sem óperusöngvari. Ég
hef starfað í kórum allt mitt líf og
hlustað á mömmu og pabba og gert
grín að þeim en ég byrjaði ekki að
læra söng fyrr en um tvítugt. Ég var
í Hamrahlíðarkórnum í fjölmörg ár
og ég var líka í barnakór Óperunnar
þegar ég var lítill og svo var ég alltaf
mikið viðriðinn Óperuna því að pabbi
var þar mikið.“
„Þetta verða eiginlega mínir
fyrstu tónleikar þannig séð, þ.e.a.s
sem eru ekki beinlínis nemenda-
tónleikar þótt ég sé að vísu ennþá
nemandi,“ segir Bragi og bætir við
að hann hlakki mikið til.
Tónleikarnir standa yfir í um hálfa
klukkustund og eru sérstaklega
hugsaðir sem tækifæri fyrir fólk sem
starfar í miðbæ Hafnarfjarðar til að
njóta góðrar tónlistar í hádegishléi.
Tónleikarnir eru í boði Hafn-
arborgar, enginn aðgangseyrir, og
öllum opnir á meðan húsrúm leyfir.
Tónlist | Tenórinn Bragi Bergþórsson á hádegistónleikum
Ástríðufullar aríur
í Hafnarborg
Eftir Þormóð Dagsson
thorri@mbl.is
Morgunblaðið/Ásdís
Bragi Bergþórsson tenór ásamt Antoníu Hevesí píanóleikara.
HEILBRIGÐIS- OG TRYGGINGAMÁLARÁÐUNEYTIÐ
ALÞJÓÐAHEILBRIGÐISDAGURINN 7. APRÍL
Alþjóðaheilbrigðisdagurinn verður að venju haldinn 7. apríl nk. í aðildar-
ríkjum Alþjóðaheilbrigðismálastofnunarinnar (WHO). Einkunnarorð dagsins
í ár eru Samstarf í þágu heilbrigðis (Working together for Health).
Í tilefni dagsins verður morgunverðarfundur á Grand Hóteli, Sigtúni 38,
föstudaginn 7. apríl kl. 8:15 til 10:00.
Dagskrá:
08:15-08:30 Morgunkaffi.
Dagskráin hefst kl. 08:30.
08:30-08:40 Ávarp.
Siv Friðleifsdóttir, heilbrigðis- og tryggingamálaráð-
herra.
08:40-08:55 Mannauður og heilsa.
Sigurður Guðmundsson, landlæknir.
08:55-09:10 Heilbrigðisstarfsfólk á Íslandi -
staða og spár um þróun mannafla.
Sólveig Jóhannsdóttir, hagfræðingur.
Harpa Guðnadóttir, hagfræðingur.
09:10-09:25 Aðgerðir Alþjóðaheilbrigðismálastofnunarinnar til að
ráða bót á mönnunarvanda heilbrigðisþjónustu víða
um heim.
Vilborg Ingólfsdóttir, skrifstofustjóri.
09:25-09:40 Þróunaraðstoð Íslands á sviði heilbrigðismála.
Geir Gunnlaugsson, læknir.
09:40-10:00 Umræður og fyrirspurnir.
Fundarstjóri: Ingimar Einarsson, skrifstofustjóri.
Fjölmennum - allir velkomnir.