Morgunblaðið - 03.11.2007, Blaðsíða 12

12 LAUGARDAGUR 3. NÓVEMBER 2007 MORGUNBLAÐIÐ
FRÉTTIR
Eftir Jóhönnu Maríu Vilhelmsdóttur
jmv@mbl.is
„VIÐ hófum sölu Neyðarkallsins í
fyrra og salan fór fram úr öllum
vonum,“ segir Kristinn Ólafsson,
framkvæmdastjóri Slysavarna-
félagsins Landsbjargar.
Forseti Íslands, Ólafur Ragnar
Grímsson, hleypti átakinu formlega
af stað í gær og seldi fyrsta Neyð-
arkallið í Smáralind. Átakið stendur
fram á sunnudag.
Góð viðbrögð landsmanna
Kristinn segir það hafa komið
björgunarsveitarmönnum ánægju-
lega á óvart hversu vel landsmenn
tóku átakinu í fyrra. Sveitirnar hafi
ekki staðið í söfnunarátaki í langan
tíma en áður fyrr hafi happdrætti og
söfnun hvers konar verið algeng.
Árangurinn í fyrra hafi hins vegar
sýnt að landsmenn séu fullir velvild-
ar í þeirra garð og því ljóst, að
Neyðarkallið verði árviss viðburður.
Ágóði söfnunarinnar rennur beint
til hverrar björgunarsveitar fyrir
sig og verður notaður þar sem þörf
er á hverjum stað. Mætti þar telja
til tækjakaup, námskeiðahald eða
þjálfun hvers konar.
Í fyrra var Neyðarkallið björgun-
arkarl en þar sem fjölmargar konur
sinna störfum innan björgunar-
sveita og slysavarnafélaga þótti við
hæfi að hafa Neyðarkallið að þessu
sinni í formi björgunarkonu.
Félagsskapurinn stór
Að sögn Kristins eru starfandi um
hundrað björgunarsveitir víðs vegar
um landið og eru virkir björgunar-
sveitarmenn um 3.000 talsins. Þeir
eru viðbúnir allan sólarhringinn,
alla daga ársins til að sinna neyð-
arútköllum af ýmsu tagi. Björgun-
arstarfið fer fram á landi og sjó og
eru 14 björgunarskip hringinn í
kringum landið. Í Slysavarnafélag-
inu Landsbjörgu einu starfa um
18.000 manns, svo félagsskapurinn
er mjög stór og virkur. Verkefni
slysavarnafélaganna eru margvís-
leg og koma inn á ýmsa þætti sam-
félagsins, t.a.m. endurskinsmerkj-
anotkun barna, öryggi aldraðra og
svo mætti lengi telja.
Skilningur og þakklæti
Kristinn segir björgunar- og
slysavarnafólk afar þakklátt lands-
mönnum fyrir þann skilning og
stuðning sem starf þess hefur hlotið.
Kristinn segir, að þeir sem lenda í
þeirri aðstöðu að þurfa á þjónustu
björgunarsveitar að halda, séu yf-
irleitt furðu lostnir þegar þeir átti
sig á því að allt starfið er unnið í
sjálfboðavinnu.
„Í allri þeirri efnishyggju sem
ríkir í samfélaginu finnst okkur við
finna fyrir meiri skilningi og þakk-
læti en áður. Sjálfboðaliðinn er
meira metinn í öllu þessu kapp-
hlaupi,“ segir hann að lokum.
Landsmenn geta fundið sölufólk
Neyðarkallsins á flestum fjölsóttum
stöðum landsins um helgina en einn-
ig verður gengið í hús. Neyðarkallið
kostar 1.000 krónur.
Morgunblaðið/G.Rúnar
Neyðarkall Ólafur Ragnar Grímsson forseti Íslands seldi Neyðarkall björgunarsveitanna í Smáralind í gærdag.
Finna fyrir auknu
þakklæti og skilningi
Björgunarsveitir landsins standa fyrir átaki um helgina
Í HNOTSKURN
»Neyðarkallið er lykla-kippa með áfastri björg-
unarkonu.
»3.000 björgunarsveit-armenn um allt land eru
viðbúnir útköllum allan sólar-
hringinn, allt árið um kring.
»Neyðarkallið hefur fengiðgóðar móttökur hjá lands-
mönnum.
»Átakið hófst í gær ogstendur fram á sunnudag.
BLAÐAMANNAFÉLAG Íslands
fagnar 110 ára afmæli sínu um
þessar mundir og af því tilefni
verður sérstök ljósmyndasýning
opnuð í dag, mál-
þing og pall-
borðsumræður
verða um helgina
og afmælisfagn-
aður með útgáfu
bókar eftir hálf-
an mánuð.
Arna Schram,
formaður BÍ,
segir að mark-
miðið með dag-
skránni sé að
skapa umræðu um blaðamennsku,
velta því fyrir sér hvort einhver
hætta steðji að henni, hver staða
hennar sé, hvað megi bæta, hvernig
þróunin sé og hvort ástæða sé til að
hafa áhyggjur af henni. „Umræðan
hlýtur alltaf að vera af hinu góða,
að heyra ólíkar raddir og misjafnar
skoðanir,“ segir hún.
Sýning og málþing í dag
Ljósmyndasýningin „Fréttaljós-
myndir í 110 ár“ verður opnuð á
jarðhæð í norðurenda Kringlunnar
klukkan 13.00 í dag. Þar verður
hún í tvær vikur en síðan í bóka-
safni Háskólans á Akureyri. Þor-
valdur Örn Kristmundsson, fyrr-
verandi formaður
Blaðaljósmyndarafélags Íslands,
valdi myndirnar, sem sumar hverj-
ar hafa aldrei komið fyrir sjónir al-
mennings.
Málþingið „Að skrifa fréttir fyrir
lýðræðið“ verður á Hótel Holti og
hefst klukkan 15.00 í dag. Banda-
ríska fjölmiðlakonan Amy Good-
man, sem heldur úti sjónvarps- og
útvarpsþættinum Democracy Now í
New York, flytur erindi sem og
rússneska fjölmiðlakonan Jelena
Larionova, yfirmaður Barents
Press í Murmansk.
Arna segir að tilvalið hafi þótt að
fá raddir að utan og því hafi verið
leitað til þessara tveggja kvenna
frá ólíkum ríkjum, en þær muni
ræða um stöðu fjölmiðla og blaða-
mennskuna í sínum heimalöndum.
Baráttudagur til varnar blaða-
mennskunni verður víða um heim
5. nóvember. Þá heldur BÍ Pressu-
kvöld á Kornhlöðuloftinu klukkan
20.00 þar sem Jón Ólafsson heim-
spekingur og Birgir Guðmundsson
fjölmiðlafræðingur flytja erindi um
gæði íslenskrar blaðamennsku en
síðan verða pallborðsumræður.
Afmælisfagnaður verður síðan á
Rex 17. nóvember og þá verður
bókin Íslenskir blaðamenn kynnt.
Þar eru meðal annars viðtöl við
handhafa blaðamannaskírteina 1-
10.
Skapa umræðu
um blaðamennsku
Myndasýning, málþing og útgáfa bókar
vegna afmælis Blaðamannafélagsins
Arna Schram
Í HNOTSKURN
» Bókin Íslenskir blaða-menn er viðtalsbók við 10
landsþekkta og reynda blaða-
menn. Í bókinni er sérstakur
ljósmyndakafli með frétta-
ljósmyndum frá undanförnum
110 árum, yfirlit yfir fjöl-
miðlasögu Íslands og stiklur
úr sögu BÍ.
» Blaðamannafélag Íslandsfagnar 110 ára afmæli sínu
um þessar mundir með ýmsum
hætti. Formaður félagsins er
Arna Schram.
FERMINGARBÖRN úr 67 sóknum í
öllum landshlutum ganga í hús á
mánudaginn kemur, 5. nóvember,
og þriðjudaginn 6. nóvember og
safna peningum til Hjálparstarfs
kirkjunnar.
Prestar og starfsfólk kirkjunnar
fræða hátt í 3.200 fermingabörn um
aðstæður í fátækum löndum Afr-
íku, sérstaklega um skort á hreinu
vatni. Um leið fræðast fermingar-
börnin um árangur af verkefnum
Hjálparstarfs kirkjunnar, sem þau
safna til.
Þetta er í níunda skipti sem söfn-
unin er haldin. Í fyrra söfnuðu
fermingarbörn á íslandi sjö millj-
ónum króna.
Ef sú upphæð er umreiknuð mið-
að við kostnað við einn brunn, sem
þjónað getur um eitt þúsund
manns, fengu 47.000 manns aðgang
að hreinu vatni til frambúðar fyrir
þessa upphæð.
Fermingarbörn knýja á dyr
til styrktar hjálparstarfi
RJÚPNAVEIÐI virðist hafa verið
dræm fyrsta daginn í rjúpu. Kennt er
um erfiðri færð og slæmu veðri dag-
ana áður en veiðar hófust. Síðdegis í
gær höfðu 27 veiðimenn skráð veiði-
ferðir og afla fyrsta veiðidagsins í
rafræna veiðidagbók Umhverfis-
stofnunar. Þeir höfðu samtals verið
149 klukkustundir á veiðum og veitt
94 rjúpur. Þá lentu rjúpnaskyttur í
erfiðleikum vegna ófærðar og festu
bíla sína. Björgunarsveitir á Suður-
landi fengu þrjú útköll af þeim sök-
um.
Viðmælendum Morgunblaðsins á
Austurlandi, Norðurlandi og höfuð-
borgarsvæðinu bar saman um að
veiðin hefði verið lítil og erfið skilyrði
til rjúpnaveiða. Margir veiðimenn
komu aftur án afla og aðrir með fáa
fugla.
Víða hafði snjóað mikið og átta-
skipti verið tíð áður en veiðar hófust
og fuglinn því mjög dreifður. „Veðrið
er að bjarga henni,“ sagði einn við-
mælenda. Annar reyndur rjúpna-
veiðimaður sagði að rjúpan dreifði
sér mikið þegar snjór kemur yfir allt.
Í Þingeyjarsýslum var víða erfitt að
komast um á heiðum nema á snjó-
þrúgum. Þegar snjórinn sjatnar og
harðnar verður færið betra. Þar urðu
menn varir við rjúpur í kjarri og mó-
um en ekki á hefðbundnum rjúpna-
stöðum. Á Suður- og Vesturlandi var
sömu sögu að segja. Þar höfðu veiði-
menn sem fréttir fóru af ýmist ekk-
ert fengið eða verið með upp í fimm
rjúpur.
Ófærð setti strik í reikninginn
Nokkuð var um að rjúpnaveiði-
menn lentu í ógöngum vegna ófærð-
arinnar. Björgunarsveitir á Suður-
landi fengu t.d. tvö útköll fyrsta dag
rjúpnaveiða vegna þess að menn
höfðu fest bíla sína, m.a. við Bláfells-
háls. Þá voru björgunarsveitir kall-
aðar út klukkan 2.30 í fyrrinótt til að
leita að feðgum sem skiluðu sér ekki
til byggða. Þeir höfðu farið til rjúpna-
veiða fyrsta daginn við Hlöðufell og
ekki skilað sér heim á tilsettum tíma.
Mennirnir létu vita af sér þegar leit
var hafin. Þeir höfðu fest sig og gátu
ekki látið vita af ferðum sínum.
Dræm veiði fyrsta daginn
Morgunblaðið/Ingó
HÉRAÐSDÓMUR Reykjaness hef-
ur sýknað karlmann af ákæru fyrir
að hafa ekið á 163 km hraða á
Reykjanesbraut á Strandarheiði þar
sem hámarkshraði er 90 km. Taldi
dómurinn að lögreglumenn hefðu
ekki farið eftir verklagsreglum við
hraðamælingu og ekki prófað ratsjá í
lögreglubílnum áður en mælingin
var gerð.
Maðurinn, sem ákærður var, sagð-
ist ekki hafa ekið á yfir 90 km hraða.
Tók hann fram, að í bíl hans væri
mjög sterkt hljóðkerfi, sem sendi út
mikla hátíðni.
Lét hann að því liggja að hátíðnin í
hljóðkerfinu hefði truflað ratsjá lög-
reglubifreiðarinnar.
Þá sagði ökumaðurinn einnig, að
loftflæmisskynjari hefði verið bilað-
ur og útilokað að bíllinn hefði náð
svona miklum hraða.
Í dóminum var lagt fram álit sér-
fræðings í mælibúnaði þar sem kom
fram að þegar tónlist væri spiluð af
afli léki yfirbygging bíla á reiði-
skjálfi. Titringurinn í yfirbyggingu
og rúðum bíls, sem stafaði frá afl-
miklum hljómtækjum, gæti hæglega
valdið skekkju í hraðamælingu lög-
reglunnar með ratsjá.
Möstur Vegagerðarinnar
hafi getað valdið skekkju
Þá taldi sérfræðingurinn einnig,
að tvö mælimöstur Vegagerðarinn-
ar, sem eru þarna við Reykjanes-
brautina, gætu valdið mæliskekkju
við ratsjármælingar.
Dómurinn taldi að ekki hefði verið
nægilega leitt í ljós að farið hefði ver-
ið eftir verklagsreglum um prófun
ratsjárinnar.
Þá þóttu mælingar lögreglumann-
anna ekki útiloka niðurstöður mæl-
ingasérfræðingsins.
Hljómtæki gætu
verið áhrifavaldur
Ökumaður var mældur á 163 km hraða