Náttúrufræðingurinn - 1934, Page 15

NÁTTÚRUFR.
125
Nýjar lesbækur.
Síðastliðið vor skipaði kennslumálaráðherra nefnd nianna til
að taka saman og gefa út nýtt lesbókakerfi fyrir íslenzka barna-
skóla. Var nefndin skipuð eftir ósk skólaráðs barnaskólanna. í
henni eiga sæti: Aðalsteinn Sigmundsson, kennari í Rvík, Bjarni
M. Jónsson, kennari í Hafnarfirði, Freysteinn Gunnarsson, kenn-
araskólastjóri, Guðjón Guðjónsson, skólastjóri í Hafnarfirði, og
Hallgrímur Jónasson, kennari við Kennaraskólann.
Nefndin vinnur nú að söfnun efnis í lesbækurnar. Verður
gefinn út lesbókastofn fyrir börn á 8—14 ára aldri, eitt eða tvö
bindi fyrir hvern aldursflokk; efnið margvíslegt barnalesefni, bók.
menntalegt og fræðilegt. En auk þess ætlar nefndin að gefa út all-
mörg smá leshefti um ýmiskonar fræðiefni. Verður hvert hefti um
tvær arkir að stærð, og um aðeins eitt afmarkað efni, með mynd-
um til skýringar eftir þörfum. Verður t. d. eitt hefti um þorsk-
inn, annað um steinolíu og bensín, um vatnið, um jarðelda, út-
varpið, símann, landbúnað íslendinga, skógrækt, fjörefnin, sam-
göngur, bindindishreyfinguna o. s. frv. Hugsað er til, að gefa út
eitt hefti á mánuði, meðan skólar starfa, eða jafnvel meira fyrstu
árin. Fyrst verður lögð áherzla á að gefa út hefti um þau efni, sem
tilfinnanlegast skortir fræðirit um, handa íslenzkum börnum, en
það eru einkum „teknisk“ efni og ýmislegt, er snertir atvinnu og
daglegt líf landsmanna. Fyrsta heftið er þegar tilbúið til prent-
unar. Það er um síldina og er eftir Árna Friðriksson magister.
Nokkur hefti eru í undirbúningi. Verður vandað mjög til leshefta
þessara, bæði um val efnis og höfunda, og um frágang allan.
Leshefti þessi eru ekki ætluð til þess, að læra á þeim lestur
eða æfa lestrarleikni barna, heldur til að svala fróðleikslöngun
þeirra og forvitni og veita þeim efni til rannsókna og starfa í
skólunum. Þau eru tæki handa starfsskólum nútímans og fram-
tíðarinnar, — skólunum, sem leitast við að veita hæfileikum nem-
endanna vöxt, þroska og tamningu með áreynslu og starfi.
A. S.