Saga - 1975, Side 68

62
SIGURÐUR RAGNARSSON
raunir með nýjar framleiðsluaðferðir á þessu sviði að
komast á lokastig í Bandaríkjunum og Þýzkalandi. Til-
koma þessara nýju aðferða olli því að öll viðhorf breytt-
ust mjög að stríðslokum. Þær voru ekki eins orkufrekar
og eldri aðferðirnar og dró þetta úr eftirsókn erlendra aðila
í aðstöðu í þeim löndum sem fyrst og fremst gátu boðið
upp á ódýra orku, en voru kannski að öðru leyti lak-
lega í stakkinn búin til að verða vettvangur stóriðju.
Talsmaður Framsóknarflokksins við umræðurnar um
frumvarp Bjarna frá Vogi í neðri deild var Sveinn Ólafs-
son í Firði, þingmaður Sunn-Mýlinga. Sveinn í Firði var
sammála fiutningsmanni um að í fossaflinu gæti verið
um „álitlega auðsuppsprettu að ræða“. Hann lýsti sig
einnig fylgjandi því fyrirkomulagi að samfélagsheildin
ætti að hafa öll umráð vatnsaflsins í sínum höndum. Hins
vegar lét hann í Ijós efasemdir um að þessi leið væri fær
eins og allt væri í pottinn búið. Einkum óx honum í aug-
um, hve fjárfrekar allar framkvæmdir á þessu sviði hlytu
að verða. Sveinn benti einnig á, að Islendingum myndi
veitast torvelt að ráðast í virkjanir og byggingu orku-
vera af eigin rammleik, því að landið hefði ekki á að
skipa sérfróðum brautryðjendum sem staðið gætu fyrir
framkvæmdum.
Frumvarp Bjarna frá Vogi kvað á um heimild til allt
að 20 milljón króna lántöku. Bjarni var þeirrar skoðunar,
að ekki myndu nein sérstök tormerki vera á því að afla
svo mikils lánsfjár. Hér væri um að ræða arðbær fyrir-
tæki og einnig væri á það að líta, að erlend félög og ein-
staklingar gætu orðið hluttakendur í rekstri slíkra fyrir-
tækja „án annarra réttinda en þess hagnaðar er (þeim)
bæri að tiltölu við hlutafé ...“. Taldi hann einsýnt, að sú
stefna, sem frumvarpið markaði, væri vel framkvæman-
leg. Um þetta atriði var Bjarni algerlega á öndverðum
meiði við málsvara Heimastjórnarflokksins. Þeir töldu
stefnu þá, er frumvarpið gerði ráð fyrir, ekki mundu verða
framkvæmanlega í fyrirsjáanlegri framtíð. Þessa skoðun