Saga - 2005, Blaðsíða 160

158
GUÐBRANDUR BENEDIKTSSON
að rík hefð sé fyrir gagnrýni á sagnfræðirit meðal sagnfræðinga og
annarra fræðimanna, svo sem í dagblöðum og sjónvarpi, auk þess
sem markviss umfjöllun um slík verk á sér langa hefð á síðum Sögu.
Þá hafa ýmsir sagnfræðingar til að mynda gefið kvikmyndum
nokkum gaum, eins og sjá má í áðurnefndum liðum — „Sjón og
sögu" og „Sjónrýni". í þessu sambandi má segja að sögusýningar
hafi til skamms tíma verið heldur afskiptar, en vonandi á umfjöllun
um þær eftir að vinna sér sess meðal fræðimanna — vaxa og dafna.
í raun og veru kann að vera erfitt að segja til um hvaða nálgun skuli
viðhöfð er kemur að rýni á sögusýningar og minjasöfn; í ljósi þess
hve slíkar sýningar eru oft margbrotin verk, getur þverfagleg nálg-
un verið æskileg. Þetta á til að mynda við um nýja grunnsýningu
Þjóðminjasafns íslands sem var opnuð 1. september 2004 í húsa-
kynnum safnsins við Suðurgötu, en það hafði verið lokað vegna
gagngerra endurbóta á húsinu allt frá árinu 1998. Það ber þó að
geta þess, að þrátt fyrir að starfsemi safnsins við Suðurgötu hafi
legið niðri, þá nýtti starfsfólkið þennan tíma til þess að huga að
innri þáttum safnastarfsins, svo sem aukinni skráningu muna,
bættri geymsluaðstöðu og undirbúningi hinnar nýju sýningar. Frá
því að sýningin var opnuð hefur fjöldi gesta sótt safnið heim og
sýningin sjálf fengið allnokkra athygli fjölmiðla, fræðimanna —
sem og almennings.
Hin nýja grunnsýning Þjóðminjasafnsins er mikið og metnaðar-
fullt verk. Það má með sanni segja að hún ákvarði nýtt viðmið á
sviði sýninga minjasafna hérlendis, hvað varðar umfang, vinnu-
brögð og kostnað. Það er því vel við hæfi að gera sýningunni ítar-
leg skil á síðum Sögu og var ákveðið að fara þá leið að fá nokkra
fræðimenn til þess að fjalla um sýninguna.4 Eins og lesa má í eftir-
farandi greinum er nálgun þeirra ólík og skoðanir skiptar. Á þenn-
an máta er reynt að varpa ljósi á sýninguna frá mörgum hliðum —
líkt og áður segir — þverfaglega.
4 Sjá auk þess ritfregn um bókina Hlutavelta tímans í þessu hefti (bls. 241-243), en
bókin var gefin út í tengslum við opnun nýju grunnsýningarinnar.