Teningur - 01.05.1990, Side 49

SKÁLDSKAPUR / 47
HAFMEYJARBLÚS
sjáðu borgin þín er böðuð
í bláu ljósi sólar sem forðum skein
í þessum framandi fjörum
finnurðu ekkert sem þú þekkir
engan kunnuglegan stein
og þú eigrar fyrir utan
nei þú átt barasta hvergi framar heima
þér berast raddir svo breyttar
að þú berð ekki kennsl á þær
þig gæti verið að dreyma
og þessi annarlegu andlit
það er ekkert sem minnir þig á neitt
sem þú þekktir fyrr
þetta gætu verið geimverur
til góðs eða ills
þú hefðir betur verið á botninum þínum kyrr
og ég ber enga ábyrgð á örlögum þínum
það þýðir ekkert að vera að horfa svona á mig
því þetta var hundraðprósent þín hugmynd
og hafmeyja litla það snerist allt bara fyrst og fremst um sjálfa þig
en ég ætla ekki að segja þér til syndanna
sjáðu til ég var aldrei eins og hinir
þetta liggur hvorteðer í augum uppi
og svo erum við bara engir sérstakir vinir
eftilvill kemstu á endanum
á einhvern griðastað þarsem þú getur þóst eiga heima
heldurðu að það bíði einhver eftir þér?
nei það eru allir góðu heilli löngu búnir að gleyma
KEFLAVÍKURKAJABLÚS
þú arkar um óþekkt stræti
aldrei gat þig grunað að til væru þvílík hús
og í höfði þér fer hann að hljóma
svo hátt og skerandi þessi útlendingsblús
ég man hve þú varst mjúk
það var magnolíuangan og kertaljós
og þú gekkst innum dyrnar og gafst mér
einhverja grunsamlega jurt sem þú kallaðir rós
það var meinlæti það var munaður
þetta málóða ofbeldi og líf á löglausum hraða
þú varst teygð og þú varst tvístruð
en ég var trúður með hnútasvipu og ég lét hana vaða
þegar ég hélt þér forðum í fanginu mínu
þá fannst mér alltaf einsog ég væri að hrapa
en nú skulda ég ekki neinum
neitt og ég hef engu framar að tapa
ef ég tóri frammað kaffi
þá er það kraftaverk og ég má þakka pent fyrir mig
en ef ekkert sést þá til mín eða heyrist
þá er það bara náttúrulögmálið að sanna sig
það var hvergi pláss
nema í króknum útivið dyr
svo ég fékk allan súginn í bakið
ég hefði frosið í hel hefði ég verið þarna kyrr
þeir segja að innsiglingin grynnist
brátt muni ekkert skip geta siglt hér framar inn
þeir þegja um það hvað því veldur
en það vita það allir
það eru auðvitað líkin af kajanum
sem hækka svona upp hafsbotninn
ertu á leiðinni á kajann félagi?
ég kann langtum þrifalegri aðferð og fljótvirkari þó
bittu þig fastan við akkerið
og svo er barasta að láta sig gossa útí sjó