Fréttatíminn - 20.12.2013, Blaðsíða 36

Sáttagjafir góðra jólavina
Jólin eru hátíð ljóss og friðar. Samhugur svífur yfir snjósköflunum og vart fæst betra tækifæri til þess að fyrirgefa
fjandvinum sínum, lánardrottnum eða skuldunautum en í aðdraganda jóla. Með fagnaðarerindið í huga ættum við öll
að rétta fram sáttahönd, faðma þá sem við höfum staðið í skaki við, gefa þeim eitthvað fallegt til marks um hugar-
farsbreytinguna og halda svo hönd í hönd á vit nýs árs og nýrra ævintýra. Fréttatíminn dregur hér fram nokkur pör
sem tekist hafa hart á, á árinu sem er að líða, og kemur með tillögur að jólagjöfum fyrirgefningar og sátta.
Helgi Seljan
Páll Magnússon
Kastljósskempunni Helga Seljan og Páli
Magnússyni, fyrrverandi útvarpsstjóra, lenti
harkalega saman eftir starfsmannafund um
uppsagnir á RÚV. Páll jós Helga skömmum og
svívirðingum. Kallaði hann óþverra og skíthæl
en Helgi svaraði að Páll væri barnalegur.
Hvorugur þeirra er geðlaus en sem betur fer
eru þeir jafn fljótir niður og þeir eru að rjúka
upp. Páll baðst afsökunar samdægurs og Helgi
hefur lýst því yfir að hann beri hlýjan hug til
Páls og muni sakna hans úr Efstaleitinu. Í ljósi
þess að allt er fallið í ljúfa löð væri þó ef til vill
ráð fyrir Pál að gefa Helga, vini sínum, nám-
skeið í mannasiðum hjá prúðmenninu
Bergþóri Pálssyni. Helgi gæti síðan fært Páli
risastóra LEGO-sjónvarpsstöð sem hann
getur dundað sér við að byggja og stjórna á
meðan hann ræktar barnið innra með sér.
Adolf Ingi
Kristín H. Hálfdánardóttir
Eftir að íþróttafréttamanninum Adolf Inga
Erlingssyni var sagt upp störfum á RÚV
kom á daginn að Kristín H. Hálfdánardóttir,
íþróttastjóri RÚV, hafi verið vond við hann og
lagt í einelti, að sögn Adolfs. Adolf Ingi gæti
fært Kristínu bókina Ekki meir – Bók um
eineltismál, eftir Kolbrúnu Baldursdóttur
sálfræðing og kannski bókaflokkinn Íslensk
knattspyrna en hermt er að Kristín sé betur
að sér í bókhaldi en íþróttum. Kristín gæti
endurgoldið hlýhuginn með bókinni Hann
var kallaður þetta sem fjallar um dreng
sem sigrast á gríðarlegu mótlæti. Hún ætti
einnig að láta konfektkassa og ársmiða á
leiki í Pepsí-deildinni fylgja þar sem hún átti
sinn þátt í að svipta Dolla þeim fríðindum að
komast frítt inn á leiki.
Bubbi og Helgi Pírati hafa tekist á um höf-
undarrétt og niðurhal hugverka, löglegt
og ólöglegt. Óhætt er að segja að útilokað
sé að þeir muni ná saman í þessu máli.
Þeir geta samt alveg verið vinir og hugað
hlýtt hvor til annars um jólin. Helgi ætti
eiginlega að splæsa í Netflix-aðgang og
Apple TV handa Bubba og reyna þannig
að lokka hann inn í öld Píratanna með því
að leyfa honum að upplifa hversu gaman
er að horfa á niðurhal. Bubbi gæti svo
gefið Helga heildarsafn tónlistar sinnar
á geisladiskum svo Helgi sé ekki að standa
í því að dánlóda tónlistinni og hafa þannig
lifibrauðið af tónlistarmanninum. Bubbi
tekur þó vissulega áhættu með þessu
þar sem Pírata væri alveg treystandi
til þess að „rippa“ alla diskana og dæla
innihaldinu á torrentsíðu.
Fyrrum vopnasystkinunum Birgittu Jónsdóttur,
þingmanni Pírata, og Julian Assange, stofnanda
WikiLeaks, laust harkalega saman undir lok
ársins og rifust eins og hundur og köttur fyrir
allra augum á Twitter. Deilan snerist að mestu
um þátt Birgittu í kvikmyndinni The Fifth
Estate sem segir, að mati Assagne, brenglaða
sköpunarsögu WikiLeaks. Það er rakið fyrir
Birgittu að gefa Julian áritað eintak af DVD-
diski með The Fifth Estate svo hann geti
kynnt sér málið betur. Þá mætti láta notaða
fartölvu fylgja með þar sem Julian virðist hafa
týnt sinni í Alþingishúsinu. Julian á óhægt um
vik og getur illa staðið í hlaupum eftir sniðugum
jólagjöfum þar sem hann heldur til í sendiráði
Hondúras. Hann er þó mikið á netinu og gæti
í það minnsta pantað sjóræningjabúning
handa Birgittu og látið senda henni til Íslands.
36 jólin Helgin 20.-22. desember 2013