Bændablaðið - 20.06.2013, Page 12
Bændablaðið | Fimmtudagur 20. júní 201312
Ferðaþjónustufyrirtækið Ögur
Travel, sem hefur aðsetur í
Ögri við Ísafjarðardjúp, er nú
að hefja sitt þriðja rekstrarár.
Halldór Halldórsson, einn af
eigendum fyrirtækisins, segir að
veitingahúsið í Ögri hafi að þessu
sinni verið opnað formlega hinn
15. júní, en í fyrra var það opnað 1.
júlí. Verið sé því að lengja tímabilið
um hálfan mánuð.
Halldór segir að þó að formleg
opnun sé nú um miðjan júní séu þau
í raun á vakt allt árið ef áhugi sé fyrir
því að panta ferðir utan hefðbundins
ferðamannatíma.
„Við tökum þetta í litlum skrefum,
en þetta er þriðja sumarið okkar.
Það gekk mjög vel í fyrra og varð
fjórföldun á tekjum frá árinu áður.
Við vonumst til að geta tvöföldað
tekjurnar í sumar,“ segir Halldór,
sem flestir þekkja ef til vill sem
fyrrverandi bæjarstjóra á Ísafirði
og núverandi formann Sambands
íslenskra sveitarfélaga.
Ögur ehf. er stofnað í mars 2011
af Halldóri og systkinum hans,
Leifi, Hafliða, Hörpu, Guðmundi
og Höllu Maríu. Fyrirtækið býður
upp á leiðsögn í skipulögðum göngu-
og kajakferðum um söguslóðir
Ísafjarðardjúps. Boðið er upp á fimm
fyrir fram mótaðar gönguferðir og
fimm fyrir fram mótaðar kajakferðir.
Auk þess býðst viðskiptavinum að
setja saman sínar eigin ferðir, allt frá
einni klukkustund upp í 14 daga.
Halldór segir að fyrirtækið sé
aðeins að komast inn á kortið hjá
ferðaþjónustuaðilum. Þau séu þó
dálítið hikandi við að gera marga
samninga því þau vilji vera örugg um
að gera allt vel sem þau eru að gera.
„Við verðum þrjú hér á vaktinni
í júní og fimm í júlí. Ef það koma
stórir hópar erum við í samstarfi
við fyrirtækin Borea Adventures og
Sæfara og getum fengið leiðsögumenn
og kajaka frá þeim ef á þarf að halda.
Svo getum við alltaf kallað til einn
eða tvo úr systkinahópnum ef mikið
liggur við, auk þess sem börnin okkar
eru orðin það stór að þau eru farin að
vinna við þetta líka.“ /HKr.
Fréttir
Ég ólst upp á Akureyri til níu
ára aldurs og í minningunni
var 17. júní þar í bæ skemmti-
legur dagur. Ég fékk vindrellu
og íslenskan fána. Það var
iðulega hægt að kría út ís í
Brynju, þegar foreldrar mínir
voru orðnir leiðir á skarkala
hátíðarhaldanna. Ég er viss um
að ég hef verið dressaður upp í
sparifötin, þótt ég muni reyndar
ekkert eftir því. Einhvern tíma
sá ég örugglega fjallkonuna.
Eigum við ekki að giska á að
hún hafi farið með kvæði eftir
Davíð eða Matthías?
Þegar ég flutti í sveitina
var töluvert minna umstang í
kringum 17. júní. Kvenfélagið og
Ungmennafélagið Glóðafeykir
stóðu þó alltaf fyrir einhvers
konar samkomum, kaffisamsæti
eða grilli á íþróttavellinum. Þegar
ég komst á efri unglingsár sat ég
í stjórn ungmennafélagsins og
minnist þess að hafa skipulagt
bændakraftakeppni sem haldin
var á þjóðhátíðardagsskemmtun.
Þar var m.a. giskað á þyngd
hrúta, dráttarvéladekkjum velt
og Trabant-bifreið Agnars
prestsmaddömu ýtt eftir vellinum.
Það var samt á annarri 17. júní
hátíð þegar flugvélin sem dreifði
karamellunum hrapaði niður á
íþróttavöllinn, svona 50 metra frá
prúðbúnum þjóðhátíðargestum.
Sem betur fer komust allir heilir
frá því.
Ég hef upplifað 35 þjóð-
hátíðar daga. Þeir eru
miseftirminnilegir. Margir sem
staddir voru sunnanlands muna
glöggt eftir 17. júní árið 2000,
en þá reið yfir Suðurlandsskjálfti.
Ég svaf hann af mér. Ég man hins
vegar vel eftir 17. júní árið 2011.
Þá var ég staddur á Akureyri
með börnin mín að fylgjast með
Gunna og Felix, bláum af kulda,
reyna að halda uppi stemmingu
á Ráðhústorginu. Samkvæmt
hitamælinum var ísskápshitastig
þann daginn. Það er ekki ofsögum
sagt af góða veðrinu á Akureyri.
Síðasta þjóðhátíðardag,
meðan forsætisráðherra talaði
fjálglega um fullveldið, var ég
að koma börnunum mínum í
skilning um að það væri ekki
við hæfi að fara út með Los
Angeles Lakers-derhúfu við
sparifötin. Ég á í ástar-haturs
sambandi við 17. júní. Mér finnst
það vera algjör skylda mín að
fara með krakkana mína niður í
bæ, kaupa handa þeim gasblöðru
(fyrirlitning mín á gasblöðrum
er reyndar efni í annan pistil),
gefa þeim pyslu og ís og fara með
þau í hoppu kastala. Ég er hvergi
nærri einn um þetta. Raðirnar í
hoppukastalana eru endalausar,
fólk með barnavagna keyrir á
annað fólk og allir eru við það
að springa. Börnin eru æst og
spennt og heimta candyfloss.
Ó, candyfloss, þú óvinur
sparifatnaðar og snyrtimennsku.
En svona er 17. júní. Auðvitað
klæðum við okkur upp og tökum
þátt í hátíðarhöldum. Og það er
gaman, þrátt fyrir allt. Ekki vegna
þess að við séum að hugsa um
fullveldið eða sjálfstæðið eða
söguna. Heldur vegna þess að
við eigum öll okkar 17. júní, með
mismunandi áherslum. Í mínu
tilfelli er þjóðhátíðardagurinn
tækifæri til að klæða mig og
börnin mín upp í sparifötin, fara
út og kaupa ís og vera saman á
röltinu í heilan dag. Skítt með það
þó að við þurfum að bíða í röðinni
eftir hoppukastalanum. Ég vildi
bara óska að Jón Sigurðsson
hefði borið gæfu til að fæðast í
seinnihluta júlímánuðar.
STEKKUR
Hæ, hó, jibbí, jei
Ferðaþjónustufyrirtækið Ögur Travel við Ísafjarðardjúp að hefja sitt þriðja rekstrarár:
Býður upp á göngu- og kajakferðir
um söguslóðir við Djúp
Það er ekki amalegt að róa kajak á spegilsléttu Ísafjarðardjúpi með Snæfjallaströndina fyrir stafni. Myndir / Harpa Hall
Róið á Ögurvíkinni með bæjarhúsin í Ögri í baksýn.
Gestastofa Vatnajökulsþjóðgarðs opnuð á Höfn í Hornafirði
Ný gestastofa Vatnajökuls-
þjóðgarðs í Gömlubúð á Höfn í
Hornafirði var opnuð á dögunum,
á fimm ára afmæli þjóðgarðsins. Í
gestastofunni er upplýsingaþjónusta
fyrir ferðamenn og starfsaðstaða
fyrir starfsmenn þjóðgarðsins
auk glæsilegrar sýningar um
þjóðgarðinn og sögu Gömlubúðar.
Þetta er fjórða gestastofa
Vatnajökulsþjóðgarðs, en áður
er búið að opna Skaftafellsstofu
í Skaftafelli, Gljúfrastofu í
Jökulsárgljúfrum og Snæfellsstofu í
Fljótsdal. Þá er fyrirhugað að opna
gestastofur á Kirkjubæjarklaustri og
í Mývatnssveit, en undirbúningsvinna
er þegar hafin vegna byggingarinnar
á Kirkjubæjarklaustri.
Gestastofan í Gömlubúð á Höfn
er fyrsta gestastofa þjóðgarðsins
í þéttbýli. Gamlabúð er 150 ára
gamalt hús sem á sér merka sögu, en
það hefur m.a. verið flutt af grunni
sínum þrisvar sinnum. Húsið var
upphaflega byggt árið 1864 á Papósi
í Lóni, en síðan flutt til Hafnar í
Hornafirði árið 1897. Flutningur
Gömlubúðar markaði á þeim tíma
upphaf Hafnar sem verslunarstaðar
og húsið gegndi áfram hlutverki
verslunarhúss þar í um 80 ár, til
1977, þegar húsið var flutt að Sílavík.
Byggðasafn Austur-Skaftafellssýslu
var þar síðan til húsa frá 1980 fram
til 2012. Nú hefur Gamlabúð enn
verið flutt, nánast á sinn gamla stað
við Hafnarvík, þar sem hún tekur
við nýju hlutverki. Arkitektastofan
Gláma-Kím sá um hönnun breytinga
hússins og innréttinga en yfirverktaki
við breytingarnar var Þingvað.
Hönnuður sýningarinnar er Þórunn
S. Þorgrímsdóttir.
Markmiðið með byggingu
gestastofa þjóðgarðsins er að miðla
fróðleik og upplýsingum um garðinn
og nágrenni hans. Í gestastofunum er
leitast við að fræða gesti um sérstöðu
viðkomandi svæðis, með það að
leiðarljósi að þeir skynji mikilvægi
verndunar náttúru og menningar til
framtíðar. Gestastofurnar nýtast bæði
heimamönnum sem og ferðamönnum,
auk þess sem þær eru mikilvægar fyrir
skólafólk enda kjörinn vettvangur til
uppfræðslu.
Vatnajökulsþjóðgarður, sem
er stærsti þjóðgarður Evrópu, var
stofnaður árið 2008. Síðan hefur hann
stækkað þrisvar sinnum og þekur nú
um 13.900 ferkílómetra eða nærri 15%
af flatarmáli Íslands. Þjóðgarðurinn
er einstakur fyrir samspil eldvirkni
og jökla sem mótað hefur fjölbreytt
landslag. Þá gefur hann einstakt
tækifæri til að fylgjast með og
rannsaka áhrif loftslagsbreytinga.