Bændablaðið - 24.01.2013, Blaðsíða 12

12 Bændablaðið | Fimmtudagur 24. janúar 2013
Fréttir
Jötunn Vélar:
Opna útibú á Akureyri
Stjórn Jötuns Véla hefur ákveðið
að opna útibú á Akureyri í mars
næstkomandi og er opnunin liður
í að efla þjónustu og færa nær
viðskiptavinum Jötuns Véla á
norðurlandi.
Útibússtjóri á Akureyri verður
Hrafn Hrafnsson en fljótlega mun
verða auglýst eftir tveimur starfs-
mönnum til viðbótar auk þess sem
verið er að leita að hentugu húsnæði
undir starfsemina.
Í útibúinu mun verða starfrækt
verslun með breiðu úrvali varahluta
og rekstrarvara undir svipuðum
formerkjum og er í verslun Jötuns
Véla á Selfossi. Viðgerðarþjónusta
mun áfram verða í höndum
Brimborgar á Akureyri.
Jötunn Vélar er innflutnings-
fyrirtæki véla og tækja fyrir
landbúnað og græn svæði, stofnað
árið 2004, og eru höfuðstöðvar þess
á Selfossi. Meðal helstu vörumerkja
Jötuns Véla eru: Massey Ferguson
og Valtra dráttarvélar, Pöttinger og
McHale-heyvinnutæki og Schäffer
Lader liðléttingar. Starfsmenn
Jötuns Véla verða 25 eftir þessar
breytingar.
Horft til framtíðar í landnotkun
og sjálfbærri landýtingu
Starfshópur um beitarstjórnun
og sjálfbæra landnýtingu skilaði
umhverfis- og auðlindaráðherra
og atvinnuvega- og nýsköpunar-
ráðherra tillögum sínum í fyrri
viku. Tillögurnar eru sjö talsins og
er í þeim fjallað um ýmis atriði til að
vinna að markmiðum um sjálfbæra
búfjárbeit, svo og skipulag hennar
og annarrar landnýtingar.
Umhverfis- og auðlindaráðherra,
Svandís Svavarsdóttir, skipaði
starfshópinn í samráði við Steingrím
J. Sigfússon atvinnuvega- og
nýsköpunarráðherra í september á
síðasta ári. Hópnum var annars vegar
ætlað að fara yfir stjórn búfjárbeitar í
landinu með tilliti til gróðurverndar
og sjálfbærrar landnýtingar.
Hins vegar átti starfshópurinn að
vinna tillögur til ráðherranna með
það að markmiði að efla stjórn
búfjárbeitar með tilliti til gróður- og
jarðvegsverndar, ágangs búfjár og
sjálfbærrar landnýtingar.
Út úr starfinu kom að hópurinn
gerði sjö tillögur. Í fyrsta lagi er
lagt til að komið verði á símatskerfi
til vöktunar á ástandi gróður- og
jarðvegsauðlinda. Í öðru lagi er lagt
til að gæðastýring í sauðfjárrækt
verði efld sem stjórntæki við
sjálfbæra landnýtingu. Í þriðja lagi
er lagt til að sjálfbærniviðmið fyrir
búfjárbeit verði skoðuð, í fjórða lagi
að skipulag og framkvæmdir við
girðingar á vegum hins opinbera
verði samræmd, í fimmta lagi
að unnið verði svæðisbundið að
beitarstjórnun og í sjötta lagi að
löggjöf er varðar beitarstýringu
verði samræmd og uppfærð eftir
þörfum. Loks er lagt til að unnar
verði tillögur að rammaáætlun um
skipulag landnotkunar og sjálfbæra
landnýtingu. Starfshópurinn leggur
til að vinna við tillögurnar hefjist
sem fyrst.
Starfshópurinn leggur áherslu
á að horft sé til framtíðar þegar
fjallað er um málefni landnotkunar
og sjálfbærrar landýtingar. Land og
gróður er takmörkuð auðlind sem
miklu skiptir að sé vel skipulögð og
skynsamlega nýtt með sjálfbærni að
leiðarljósi. Landnotkun hefur þróast
og breyst mikið undanfarin ár eins
og öll skipulagsleg umgjörð hennar.
Samstarfshópur um beitarstjórnun ásamt umhver s- og auðlindaráðherra
og atvinnuvega- og nýsköpunarráðherra.
Ýtir undir svæðisbundna matvælaframleiðslu
Sigurður Eyþórsson, fram-
kvæmda stjóri Landssamtaka
sauðfjár bænda, situr í starfshópi
á vegum atvinnuvega- og
nýsköpunar ráðuneytisins um
vernd vöruheita með uppruna-
eða staðarvísun. Hópurinn var
skipaður í kjölfar ráðstefnu sem
haldin var að frumkvæði samtaka
mjólkur- og kjötvinnslufyrirtækja
í september síðastliðnum. Þar
verður litið til lagalegra og alþjóð-
legra viðhorfa þegar íslenskar
vörur fá landfræðilega tilvísun.
Helstu skilyrði fyrir því að vara
geti fengið slíka merkingu er að hún
hafi landfræðileg tengsl, þar sem heiti
hennar þarf að fela í sér tilvísun til
ákveðins staðar eða svæðis ,en varan
þarf þó ekki að bera heiti staðarins
eða svæðisins. Einnig verður varan
að hafa ákveðna eiginleika og
bera viss gæði sem greina hana frá
öðrum vörum sömu tegundar. Heiti
vörunnar má ekki vera orðið almennt
lýsandi tegundarheiti án tillits til þess
hvar hún er framleidd.
Sérstaða matvæla
„Þetta kemur út frá eftirspurn fólks
sem vill vita meira um matinn sem
það neytir og er hugsað til að skýra
það betur út fyrir neytandanum.
Framleiðendur geta með þessu
móti sýnt fram á sérstöðu sína og
framleiðsluaðferðir á ákveðnum
stað og þeir fá staðfestingu á að
varan sé klárlega öðruvísi en önnur
sambærileg vara. Hluti af reglum
í gæðastefnu Evrópusambandsins
í landbúnaði fellur undir vernd
landfræðilegra merkinga. Þær skiptast
niður í þrenns konar merkingar,
sem eru vernd upprunatáknunar,
vernd landfræðilegrar tilvísunar og
trygging hefðbundinnar sérstöðu. Út
frá þessum reglum og merkingum
hafa Norðmenn unnið til að innleiða
verndun landfræðilegra merkinga þar
í landi,“ segir Sigurður.
Styrkir íslenska framleiðslu
Árið 2002 var komið á sérstakri
löggjöf í Noregi um vernd
landfræði legra merkinga á öðrum
landbúnaðarvörum en vínum og
sterkum drykkjum. Undir það falla
vöruheiti með vernd upprunavísunar,
staðar tilvísunar og hefðartryggingu
eins og í ESB-kerfinu. Markmiðið með
merkingakerfinu í Noregi er að stuðla
að fjölbreytni og verðmætasköpun og
að ýta undir stað- og svæðisbundna
matvælaframleiðslu.
„Það er mjög skynsamlegt að
taka upp svona kerfi hér á landi
og nefndin er sammála um að svo
eigi að gera en okkar hlutverk er
að koma með tillögur um hvernig
eigi að standa að þessu. Við horfum
til kerfis sem notað er í Noregi og
höfum kynnt okkur löggjöfina þar.
Þetta er tiltölulega ungt fyrirbæri í
Noregi en þó hafa 19 vörutegundir
öðlast þessa vernd og er fróðlegt að
sjá þær vörur sem hafa náð þessu
en þar má nefna baðstofureykt kjöt,
íshafsbleikju, spægipylsu, villisauði
og lífræna þykkmjólk sem dæmi.
Næsta skref hjá okkur er að smíða
tillögur sem við skilum til ráðherra
fyrri partinn á þessu ári,“ útskýrir
Sigurður og segir jafnframt;
„Með því að koma á slíku
opinberu kerfi sem menn geta
treyst er hægt að styrkja framleiðslu
í sessi. Einnig er hugsanlegt að
gerður verði gagnkvæmnisamningur
við Evrópusambandið varðandi
merkingar á íslenskum vörum
sem fluttar eru út þangað og eins á
evrópskum vörum sem fluttar eru
hingað inn.“ /ehg
Hér má sjá dæmi um merkjaker sem Norðmenn styðjast við, annars vegar
Beskyttede betegnelser sem sannar sérstakan uppruna, tengsl við landsvæði
eða sérstakar matarhefðir. Nyt Norge merkir að um norsk matvæli ræði.
Hreppsnefnd Ásahrepps hefur
samþykkt aðkomu sveitarfélagsins
að embætti skipulags- og
byggingarfulltrúa uppsveita
Árnessýslu og Flóahrepps (BSB)
og tók samningur þess efnis gildi
nú um áramótin.
Það þýðir að BSB mun yfirtaka
öll mál er varða skipulags- og
byggingarmál Ásahrepps frá
þeim tíma með þeim réttindum og
skyldum er að því lýtur gagnvart
skipulags- og mannvirkjalögum.
Ásahreppur greiðir vegna aðildar
hinn 1. febrúar 2013 eingreiðslu
kr. 3.800.000 til embættisins ásamt
greiðslu til Verkfræðiskrifstofu
Suðurlands vegna skráningar í
Granna. Skipulagsfulltrúi frá 1.
janúar 2013 í Ásahreppi verður Pétur
Ingi Haraldsson og byggingarfulltrúi
Helgi Kjartansson, með aðsetur á
skrifstofu embættisins á Laugarvatni.
/MHH
Ásahreppur, uppsveitir Árnessýslu og Flóahreppur:
Sameinast um skipulags- og
byggingafulltrúaembætti
Baldvin Ari Guðlaugsson
var valin knapi ársins hjá
Hestamannafélaginu Létti á
Akureyri.
Hann er öllum hestamönnum
kunnur enda hefur hann verið í
fremstu röð knapa í áraraðir.
Baldvin hefur verið valinn knapi
ársins hjá Létti undanfarin ár enda
ötull og árangursríkur keppnismaður,
segir í tilkynningu frá félaginu.
Árið 2012 keppti Baldvin á
flestum mótum Léttis, sem og öðrum
mótum með mjög góðum árangri.
Meðal annars vann Baldvin stiga-
keppnina í KEA-mótaröðinni, hann
bar sigur úr býtum í tölti og fjórgangi
og var í öðru sæti í fimmgangi á
vormóti Léttis. Baldvin er fjölhæfur
knapi og frábær keppnismaður, segir
enn fremur. /MÞÞ
Baldvin Ari knapi ársins hjá Létti
Baldvin Ari á Öngli frá Efri-Rauðalæk.