Bændablaðið - 24.01.2013, Blaðsíða 38

38 Bændablaðið | Fimmtudagur 24. janúar 2013
Pétur Guðmundsson og Ragna
Sigurðardóttir byggðu nýbýlið
Kjarr úr landi Þórustaða árið 1964
og stunduðu þar margháttaða
garðrækt. Helgi Eggertsson og
Helga Ragna Pálsdóttir tóku við
búskap í Kjarri vorið 1981 og hafa
byggt þar upp garðplöntustöð og
hrossaræktarbú.
Býli? Kjarr.
Staðsett í sveit? Í Ölfusi,
Árnessýslu.
Ábúendur? Helgi Eggertsson og
Helga Ragna Pálsdóttir.
Fjölskyldustærð (og gæludýra)?
Börnin eru þrjú; Páll 24 ára, Ragna
20 ára og Eggert 18 ára.
Stærð jarðar? Tæpir 100 hektarar.
Gerð bús? Hrossarækt,
sauðfjárrækt og
garðplöntuframleiðsla.
Fjöldi búfjár og tegundir? Um
60 hross, 20 kindur og ógrynni
trjáplantna og runna.
Hvernig gengur hefðbundinn
vinnudagur fyrir sig á bænum?
Að vetrinum þarf að hirða hross
og sauðfé og sinna tamningum
og þjálfun á 15-20 hrossum auk
ýmissa starfa í gróðrarstöð. Að
sumrinu snýst vinnan aðallega
um framleiðslu og sölu á
garðplöntum en jafnframt þarf að
sinna heyskap, hestamennsku og
stóðhestahaldi.
Skemmtilegustu/leiðinlegustu
bústörfin? Skemmtilegasti tíminn
er þegar gróðurinn vaknar til
lífsins á vorin, hryssurnar kasta og
kindurnar bera. Smalamennska að
hausti er alltaf tilhlökkunarefni en
ekkert toppar þó að þeysa á góðum
hesti út í bjarta sumarnóttina.
Engin bústörf eru leiðinleg en það
tekur á að verja gróðrarstöðina fyrir
norðanáhlaupum á vorin þegar gróður
er að vakna af vetrardvala og þolir
illa næturfrost.
Hvernig sjáið þið búskapinn
fyrir ykkur á jörðinni eftir fimm
ár? Með svipuðu sniði og í dag.
Hvaða skoðun hafið þið á
félagsmálum bænda? Við teljum
félagsmál bænda í ágætum farvegi
en hvort nýorðnar breytingar á
leiðbeiningaþjónustu bænda skila
okkur fram á veginn á eftir að koma
í ljós. Við hvetjum framvarðasveit
landbúnaðarins til að standa
vörð um hag bænda og halda
hollustu og hreinleika íslenskra
landbúnaðarvara enn meira á lofti.
Hvernig mun íslenskum
landbúnaði vegna í fram tíðinni?
Íslenskur landbúnaður á framtíðina
fyrir sér ef vel er að málum staðið.
Landbúnaðurinn er sú atvinnugrein
sem heldur uppi búsetu og atvinnu
í sveitum landsins. Finna þarf
leiðir til að auðvelda ungu fólki
að geta hafið búskap í sveit.
Við getum framleitt úrvalsvörur
við bestu aðstæður, vörur sem
standast samkeppni hvar sem er í
heiminum. Evrópusambandið, nei
takk.
Hvar teljið þið að helstu tæki-
færin séu í útflutningi íslenskra
búvara? T.d. í útflutningi á
hrossum, minkaskinnum, ýmsum
mjólkurafurðum, lambakjöti og
e.t.v. tómötum.
Hvað er alltaf til í ísskápnum?
Smjör, ostur og heimatilbúin rifs-
berjasulta.
Hver er vinsælasti maturinn á
heimilinu? Lambakjöt, kartöflur og
íslenskt grænmeti.
Eftirminnilegasta atvikið við
bústörfin? Þegar Stáli frá Kjarri
hlaut 8,76 í kynbótadómi á lands-
mótinu á Vindheimamelum 2006
– og var þá hæst dæmdi stóðhestur
í heimi.
Á síðasta árið kom út matreiðslu-
bókin Heilsuréttir fjölskyldunnar
eftir Berglindi Sigmarsdóttur, sem
hún skrifaði fyrir þá sem vilja bæta
mataræði og lífsstíl fjölskyldunnar.
Í bókinni eru, auk uppskrifta að
hollum mat, gefin ráð um hvernig
hægt er að draga úr sykurneyslu
barna og ungmenna og hvernig
hægt sé að fá börn og unglinga til
að borða heilsusamlegan mat og
bæta lífsstíl sinn. Hér gefur Berglind
okkur sýnishorn úr bókinni.
Múslístykki með trönuberjum og
pistasíum (eða út á morgunmatinn)
› 135 g tröllahafrar eða glútenlaust
haframjöl
› 75 g spelthveiti eða glútenlaust bökunar-
hveiti („All purpose baking flour“ eða „Plain
white flour blend“)
› 125 g íslenskt smjör
› 2 msk. lífrænt hunang
› 80 g þurrkuð trönuber
› 140 g pistasíuhnetur, gróft saxaðar
› 40 g hrásykur/xylitol
Aðferð:
Blandið saman í skál haframjöli, hveiti,
trönuberjum og pistasíuhnetum. Hitið
ofninn í 180 °C og setjið bökunarpappír
í botninn á eldföstu móti (um 20x30
cm að stærð). Setjið sykur, smjör og
hunang í lítinn pott. Hitið varlega
þannig að smjörið bráðni og sykurinn
leysist upp, hrærið þetta saman. Hellið
úr pottinum yfir í skálina og hrærið
með sleif. Hellið öllu yfir í formið yfir
bökunarpappírinn og þrýstið létt með
skeið og bakið í 20 mínútur eða þar
til gullið. Ef þið viljið nota þetta sem
múslí á skyr, jógúrt eða AB-mjólk,
dreifið þá úr deiginu á plötu þannig
að það sé í litlum klípum til að setja
út á morgunmatinn og bakið þannig,
það þarf aðeins styttri tíma. Fylgist
með því að það verði aðeins gullið.
Geymið í lofttæmdum umbúðum svo
það haldist stökkt.
Hveitilaus súkkulaðihnetukaka
› 300 g möndlur (án hýðis), malaðar í
matvinnsluvél (eða möndlumjöl)
› 190 g valhnetur
› 200 g dökkt súkkulaði, 70% kakóinni-
hald
› 5 egg, aðskilin
› 250 g mjúkt íslenskt smjör
› 1 tsk. vanilludropar
› 200 g xylitol eða hrásykur
Aðferð:
Hitið ofninn í 150 °C. Leggið bökunar-
pappír í ferkantað baksturs form eða
eldfast mót (20x25 cm eða 23x23
cm að stærð). Ég smyr alltaf svolitlu
smjöri aðeins yfir pappírinn. Setjið
möndlur, valhnetur og súkkulaði
í matvinnsluvél og vinnið þar til
fínmalað. Hrærið mjúkt smjörið ásamt
vanillu og hrásykri/xylitoli í hrærivél
þar til létt. Bætið þá einni og einni
eggjarauðu við þar til allar eru komnar
út í. Bætið þá súkkulaðihnetublöndu út
í skálina og hrærið saman. Stífþeytið
eggjahvítur í stórri skál. Takið svo
súkkulaðihnetublönduna og blandið
varlega saman við eggjahvíturnar í að
minnsta kosti þremur hlutum. Best er
að nota bökunarsleikju og taka vel af
súkkulaðihnetublöndunni og blanda
henni varlega saman við með stórum
hringlaga hreyfingum til að halda
loftinu í deiginu. Gerið þetta þar til
öll súkkulaðihnetublandan er komin
saman við eggjahvíturnar. Hellið
deiginu í formið og setjið í miðjan ofn
í 1 klukkustund og 15 mínútur. Leyfið
kökunni að kólna í forminu og setjið
það svo inn í ísskáp í 4 klukkustundir,
eða yfir nótt. /ehg
Líf og lyst
BÆRINN OKKAR
MATARKRÓKURINN
Bætt mataræði og betri lífsstíll
Kjarr
Ragna og Eggert á Stú og Spóa, Stálasonum.
Múslístykkin með trönuberjum og pistasíum er hægt að hafa sem snarl y r
daginn eða útbúa þau í smærri einingum og nota til dæmis sem morgunkorn.