Bændablaðið - 28.11.2013, Side 40
40 Bændablaðið | Fimmtudagur 28. nóvember 2013
Fundaröð Bændasamtaka Íslands um landið lokið:
Vinnuvernd, nýliðun og fjármögnun
í landbúnaði til umræðu
Fulltrúar Bændasamtaka Íslands
hafa verið á ferð og flugi um landið
undanfarna daga, en samtökin
hafa efnt til funda um land allt
undanfarna daga og vikur. Vel
hefur verið mætt og bændur í
öllum landsfjórðungum hafa
gripið tækifærið til skrafs og
ráðagerða með forystumönnum
Bændasamtakanna. Ýmis mál
hafa verið rædd á fundunum,
m.a. vinnuverndarmál, nýliðun
í landbúnaði, fjármögnun í
landbúnaði og um streitu og
starfsgleði í landbúnaði svo
eitthvað sé nefnt. Þá hefur verið
fjallað um það sem efst er á baugi
hjá samtökunum.
Þrír frummælendur voru á fundi
BÍ sem haldinn var á Akureyri í
liðinni viku. Sindri Sigurgeirsson,
formaður Bændasamtakanna, fór
yfir þau málefni sem hæst ber um
þessar mundir í starfsemi þeirra,
Guðmundur Hallgrímsson á
Hvanneyri fór yfir vinnuverndar-
og öryggsmál og þá fjallaði Helgi
Haukur Hauksson bóndi um nýliðun
í landbúnaði.
Búnaðarmálagjaldið ekki
framtíðartekjustofn
Meðal þess sem Sindri kom inn á í
máli sínu voru þær breytingar sem
orðið hafa á starfsemi samtakanna
undanfarið, sem og þær breytingar
sem fram undan væru. Meðal
þess sem horfa þyrfti til væri
fjármögnun samtakanna; ljóst væri
að búnaðarmálagjaldið væri ekki
framtíðartekjustofn. Þá lægi fyrir að
endurskipleggja þyrfti allt félagskerfi
bænda. Formaðurinn fór einnig í
ræðu sinni yfir búvöruframleiðslu
liðinna mánaða, m.a. að framleiðsla
og neysla á mjólkurvörum hefði
aukist undanfarna mánuði. Þá nefndi
hann að nýliðinn októbermánuður
hefði verið sérlega góður í kjötinu,
einn sá besti í manna minnum.
Nýsjálenskur ráðgjafi stýrir vinnu
við áhættumat
Sindri nefndi einnig álit sem ESA
sendi frá sér á dögunum þess efnis
að bann í íslenskum matvæla-
lögum og lögum um varnir gegn
dýrasjúkdómum, við innflutningi á
hráu ófrosnu kjöti, væri í andstöðu
við gildandi Evrópulöggjöf. Álit
ESA kom í kjölfarið á kvörtun sem
SVÞ sendi til stofnunarinnar eftir að
frumvarp hafði verið samþykkt sem
lög frá Alþingi.
Sindri sagði að málið yrði að öllum
líkindum sent til EFTA-dómstólsins,
en BÍ hefur ráðið nýsjálenskan
ráðgjafa sem m.a. mun stýra vinnu
við áhættumat. Hann kom einnig inn
á málefni landbúnaðarháskólanna
og sagði ljóst að mikill áhugi væri
fyrir því hjá menntamálaráðherra
að sameina Landbúnaðarháskóla
Íslands á Hvanneyri Háskóla Íslands
og væri það til skoðunar. Nefndi
hann að Bændasamtökin óttuðust að
skólastarfið myndi þynnast út yrði
yfirstjórn þess færð í Vatnsmýrina
og þá væri óvissa einnig ríkjandi
varðandi Háskólann á Hólum. Eins
hefðu menn áhyggjur af starfsnáminu
sem í boði væri, en það væri í raun á
framhaldsskólastigi.
Að bændur verði færir um að
annast sjálfir innra eftirlit á búum
sínum
Guðmundur Hallgrímsson,
starfsmaður Búnaðarsamtaka
Vestur lands á Hvanneyri, fór yfir
öryggismál, starfsumhverfi bænda og
heilsuvernd. Hann vinnur að verkefni
sem miðar að því að byggja upp
eftirlitskerfi fyrir bændur til afnota
heima á býlum sínum með það að
markmiði að tryggja öryggi þeirra
og annarra sem þar starfa. Einnig
að bæta umhverfi og líðan bæði
heimilisfólks og búfjár, sem og að
draga úr tíðni slysa við búrekstur.
Loks nefndi hann að markmiðið
væri einnig að gera búið aðlaðandi
og eftirsóknarvert. Bændur ættu með
slíku kerfi að vera færir um að annast
sjálfir innra eftirlit á búum sínum.
Mikilvægt að fara yfir
öryggismálin
Að setja upp eftirlitskerfi heima
á býlunum felur meðal annars
í sér að fara þarf yfir öryggi og
aðbúnað, meðal annars allra tækja
sem notuð er í rekstrinum. Fara
þarf yfir rafmagnsmálin og huga að
ljósabúnaði og eldvörnum í útihúsum
og hafa greiða útgönguleið fyrir gripi
úr húsunum ef upp kemur eldur. Þá
þarf að huga að því að veður er
válynd hér á landi og gott að hafa
tiltæka áætlun um viðbrögð þegar
þau koma upp. Eiturefni og ýmis
sterk efni önnur eru gjarnan geymd
heima á býlum og búa þarf um þau
með viðeigandi hætti. Innifalið í
eftirlitskerfinu væri að skoða einnig
heildarásýnd býlisins, s.s. býlið sjálft,
girðingar og lausa muni umhverfis
það eins og bílhræ, ónýtar heyrúllur
eða annað slíkt.
/MÞÞJóhannes á Espihóli og Sigurgeir á Sigtúnum skrafa saman á fundi BÍ á Hótel KEA á Akureyri á dögunum.
Nafnar bera saman bækur sínar, Sigurgeir Sindri Sigurgeirsson, formaður Bændasamtaka Íslands, og Sigurgeir Hreinsson, framkvæmdastjóri
Búnaðarsambands Eyjafjarðar.
Hákon Bjarki á Svertingsstöðum, Ingveldur Ása Konráðsdóttir frá
Böðvarshólum í V- Hún., Arnór Erlingsson á Þverá, Margrét Melsteð Fagrabæ
og fjærst Anna Bára Bergvinsdóttir og Sveinn Sigtryggsson Áshóli. Aftan
við þau eru Þórður í Hvammi, Viðar á Brakanda og Gunnhildur á Steindyrum.
Haraldur og Vaka á Dagverðareyri spjalla við Gunnhildi á Steindyrum, sem
ætlar án efa að segja þeim eitthvað viskulegt.