Morgunblaðið - 24.11.2012, Síða 12

É
g er alin upp af miklum
matarsnillingi, Steinunni
Guðlaugsdóttur mömmu
minni, og tók náttúrlega
eitt og annað með mér
þegar ég flutti að heiman,“ segir
Oddný Magnadóttir matgæðingur
og verslunarkona.
„Mamma var langt á undan sinni
samtíð þegar kom að matargerð.
Hún notaði aldrei unnar mat- eða
kjötvörur og bakaði öll brauð og
bakkelsi. Hún gerði mikið af alls
konar fiskréttum og heilsuréttum og
á meðan flestar húsmæður voru enn
að sjóða ýsu og steikja kjötbollur fór
mamma á námskeið í gerbakstri og
lærði að elda grillmat, fisk-, bauna-
og grænmetisrétti. Ég verð reyndar
að viðurkenna að bauna- og græn-
metisréttatímabilið var erfiður tími
hjá okkur systkinunum og pabba.
Sjálf byrjaði ég eiginlega ekki að
elda fyrir alvöru fyrr en ég var kom-
in hátt á þrítugsaldurinn. Ég hef
mjög gaman af því að dunda mér í
eldhúsinu og lít á það sem slökun
eftir langan vinnudag. Maðurinn
minn er veiðimaður þannig að hrá-
efnið er alltaf til staðar, bæði lax og
silungur, og svo villibráð en við borð-
um töluvert af henni.“
Afmæli á jólum
Oddný segir að sér þykir gaman
að Mér finnst mjög gaman að prófa
eitthvað nýtt í matargerði ,þó að það
slái kannski ekki alltaf í gegn.
„Ég nýt þess líka að elda ofan í
mig eina og þá útbý ég helst Mið-
jarðarhafsmat, léttan og ferskan.
Annars er ég ósköp venjulegur kjöt-
súpukokkur; engir stælar, bara
ástríða fyrir mat og bragði sem rek-
ur mig áfram og svo finnst mér svo
gott að borða.“
Aðspurð segist Oddný vera mikið
jólabarn. „Mér finnst jólin, og þá að-
allega aðventan, vera himneskur
tími. Undanfari jólanna er eiginlega
skemmtilegasti tími ársins. Svo á ég
afmæli um jólin og geri alltaf tölu-
vert mikið úr því.“
Bláberjavín með biscotti
Oddný kst halda í hefðir í jólaund-
irbúningnum. „Við Unnur vinkona
mín tökum alltaf einn dag í upphafi
aðventu og gerum hreindýrapaté og
kjúklingalifrarpaté með vill-
isveppum og púrtvíni og alls konar
chutney og sultur. Bökum sörur og
biscotti og dundum okkur heilan dag
í eldhúsinu við kertaljós og tónlist.
Ég geri alltaf konfekt en baka yf-
irleitt ekki mjög mikið, fólkið mitt er
ekki mikið smákökufólk. Það eru að-
allega sörurnar og biscotti sem við
borðum alla aðventuna. Svo hef ég
gaman af því að búa til líkjöra og
geri bæði aðalbláberjavín og lim-
oncello; ég legg í bláberjavín að
hausti og limoncello minnst átta vik-
um fyrir jól,“ segir Oddný og heldur
áfram
„Við Lísa vinkona mín fengum eitt
sinn þá flugu í höfuðið að við yrðum
að læra að búa til alvörukonfekt fyr-
ir jólin og fórum á námskeið hjá kon-
fektmeistara, sem ég man ekki hver
var enda yfir tuttugu ár síðan. Þarna
eyddum við heilu kvöldi í að setja
saman alls konar vínlegna ávexti og
fylla döðlur og hjúpa með eð-
alsúkkulaði, hnoða dýrindis súkku-
laðitrufflur og velta upp úr kakói.
Svo fór ég heim með afraksturinn,
handviss um að ég myndi slá í gegn
hjá fjölskyldunni, en það rættist
ekki. Ég gerði aldrei aftur þannig
konfekt.“
Rjúpur og bækur
Móðir Oddnýar er húsmæðra-
skólagengin og var þar aðstoð-
arkennari og kennsluaðferðir skól-
ans voru í hávegum hafðar.
„Mamma gerði konfekt fyrir jólin,
mjög einfalt, sem við borðuðum mik-
ið af og spenningurinn fyrir konfekt-
gerðinni var alltaf jafnmikill þegar
ég var yngri. Nokkrum árum eftir
mislukkað lúxuskonfektgerðaræv-
intýrið ákvað ég að prófa að gera
konfektið frá mömmu, sem hún
lærði að búa til í Húsmæðraskól-
anum árið 1963. Það er konfektið
sem ég geri enn þann dag í dag og
fjölskyldunni þykir alltaf jafngott.“
Oddný er fljót til svars þegar hún
er spurð hvað sé það besta við jólin.
„Kyrrðin sem færist yfir heimilið
þegar kirkjuklukkurnar hringja inn
jólin klukkan sex á aðfangadag. Þá
fyllist ég himneskum friði. Sam-
veran með foreldrum og systkinum.
Öll börnin mín, tengda- og barna-
börn. Bækurnar, náttfötin, konfekt-
ið, rjúpurnar og hláturinn. Afmælið
mitt og allir dásamlegu vinir mínir
sem halda upp á daginn minn með
mér.“
Marsipankonfekt
konfektmarsipan
(ég nota Odense)
þurrkaðar gráfíkjur, mjúkar og
góðar
steinlausar döðlur, góðar
þurrkuð trönuber
rúsínur
heslihnetur, malaðar
líkjör, ef vill
núggat, ef vill (mömmu finnst
það voðalega gott)
hjúpsúkkulaði af bestu gerð
Hægt er að útbúa alls kyns kon-
fektmola, eftir smekk. Til dæmis
gráfíkjumola, þá sker ég endana af
gráfíkjum, set þær í matvinnsluvél
og hakka þær í spað. Þá bæti ég
marsipani út í og vinn það saman við
fíkjurnar, skef síðan innan úr vélinni
og hnoða allt saman á borði. Eða
döðlumola, þá set ég döðlur í mat-
vinnsluvél og hakka þær vel og
hræri þeim síðan saman við marsip-
anið með sömu aðferð. Í ár ætla ég
að gera konfekt með þurrkuðum
trönuberjum en þau fara afar vel
með marsipani og súkkulaði.
Það má setja hvað sem er saman
við marsipanið og um að gera að
leika sér svolítið. Það má leggja rús-
ínur í romm eða einhvern annan góð-
an líkjör og blanda þeim saman við
marsipanið, ásamt við möluðum
heslihnetum eða öðrum hnetum.
Þegar búið er að móta litlar kúlur
eru þær settar í ísskáp og kældar,
þær mega alveg bíða til næsta dags,
passið bara að setja matarfilmu yfir
þannig að marsipanið þorni ekki og
harðni. Súkkulaðið verður að vera
gott, það skiptir öllu máli, og í ár
ætla ég að nota ítalska súkkulaðið
frá Frú Laugu. Hér eru eiginlega
engin hlutföll og í rauninni er hægt
að spila þetta af fingrum fram.
Súkkulaðið er brætt í vatnsbaði, kúl-
urnar hjúpaðar og skreyttar ef vill
og kældar. Síðan raða ég konfektinu
í smákökubox, set smjörpappír á
milli laga og þá geymist það í ísskáp
allan desember.
beggo@mbl.is
Himneskt í hálfa öld
Oddný Magnadóttir
matgæðingur ákvað
fyrir mörgum árum að
halda sig við gamla
góða jólakonfektið úr
Húsmæðraskólanum.
Sælgæti Hægt er að útbúa alls kyns konfektmola, eftir smekk, til dæmis er upplagt að nota trönuber.
’Hér eru eiginlega engin
hlutföll og í rauninni er
hægt að spila þetta af
fingrum fram.
Morgunblaðið/Árni Sæberg
Jólagleði Oddný Magnadóttir segist fyllast himneskum friði þegar kirkjuklukkurnar hringja inn heilög jólin klukkan sex á aðfangadagskvöld.
12 Jólablað Morgunblaðsins
www.hjahrafnhildi.is • Sími 581 2141
Jólagjöfin
hennar