Morgunblaðið - Sunnudagur - 28.04.2013, Blaðsíða 4

4 MORGUNBLAÐIÐ SUNNUDAGUR 28.4. 2013
Loforðin fáum við frá þeim
Á kjördag er jafnan viðkvæmt að vera að toga og
teygja kosningamálin. Og næsta tilgangslaust. Enda hafa
kjósendur haft fjögur ár til að gera upp hug sinn til gjörða
og vanefnda ríkisstjórnarinnar. Þess vegna var ákveðið
að bregða á leik og hlera hagyrðinga landsins um viðhorf
þeirra til stjórnmálanna í aðdraganda kosninga. Eins eru
rifjaðar upp sígildar kosningavísur sem eiga við á öllum
tímum.
Loforðin fáum við frá þeim
sem flest eru glæsileg hjá þeim
öll eru kunn
afspyrnu þunn
og tóm eins og toppstykkið á þeim.
Friðrik Steingrímsson
Einfalt að kjósa..
Sleppum rógi, slíðrum brandinn
sláumst aðeins minna
fallegasti frambjóðandinn
finnst mér ætti að vinna.
Ármann Þorgrímsson
Íhaldsstjórn með þrek og þor
á þjóðráðunum lumar.
En ef þið kjósið vinstra vor
verður ekkert sumar.
Hjálmar Jónsson
Sjálfur vetur setur spor
sín á þessi dægri
Eg held að hvorki verði vor
til vinstri eða hægri.
Hólmfríður Bjartmarsdóttir
(Fía á Sandi)
Afbrýðisemi
Vart mun ég honum gælur gera,
í gump sinn fær hann væna spyrnu;
Laugavegskarlinn virðist vera
veikur fyrir Hönnu Birnu.
Kerlingin á Skólavörðuholtinu
Meira um Hönnu Birnu
Þótt Hanna Birna herpi sig
og heykist lítt á stoltinu,
skal hún aldrei skyggja á mig
á Skólavörðuholtinu.
Kerlingin á Skólavörðuholtinu
Stjórnin hefur höfuð tvö,
hún er völt á stóli.
Þetta ljóð frá A til Ö
orti ég á hjóli.
Jón Ingvar Jónsson
Mikil er Framsóknarmuggan
svo margur villist um skeið, -
inn og út um gluggann
og alltaf sömu leið.
Karlinn á Laugaveginum
Samfylking
Samfylkingin segist best,
sér hún kann að hrósa
jafnvel þó að fólkið flest
forðist hana að kjósa.
Kerlingin á Skólavörðuholtinu
Um Landsdómsmálið
Nú bröltum við brautina hála
og bara einum skal kála;
við sakfellum Geir
hinir sextíu og tveir
ekkert fylgdust með framgangi mála
Friðrik Steingrímsson Þeir sem lofa mestu...
Traust til þeirra tæpast ber
trúi engu í raun og veru
lítið fyrir loforð er
leiðist þau sem svikin eru.
Ármann Þorgrímsson
Guðmundur Steingrímsson
og fleiri efndu til samkeppni
um heiti á stjórnmálaflokki. En
vinna við stefnuskrá var ekki
hafin…
Efnt til keppni, verðlaun veitt,
vandað til að nefn’ann.
Þá er bara eftir eitt
óklárt – það er stefnan.
Hjálmar Freysteinsson
Raunalegt er ráðaleysi
ráðamanna.
Skyldi ekki skást að banna
skuldavanda heimilanna?
Hjálmar Freysteinsson
Mynd af Davíð í glugga á Sauðárkróki....
Hann sem lengi á breiðri braut
barðist hart og valda naut
aldrei höfði öðrum laut
endaði sem gluggaskraut.
Ármann Þorgrímsson
Út í kvöld ég ætla mér
að aka um Reykjavíkina.
– Þessi vísa ekki er
um árans pólitíkina.
Pétur Stefánsson
Sjarmörinn Bjarni Benediktsson
Lit á varir létt skal rjóða
og losa um brjóstahöld
því ég ætla Bjarna að bjóða
á bekkinn minn í kvöld.
Kerlingin á Skólavörðuholtinu
Birtir yfir býlum lands,
burt flýr næturdimma.
Eykst og dafnar utan stans
ástúðin á Simma.
Magnús Ástvaldsson
Nýjum fötum Framsóknar
fylgir glötun smáþjóðar,
enda götin allsstaðar
eins og tötrar örbirgðar.
Jón Karl Helgason
Kveðið undir umræðum
um samgöngumál.
Þótt aki á fund við yndi sitt
ennþá ferðagjarnir
nú gegnum netið gera hitt
glaðir píratarnir.
Kristján Eiríksson
Hve fylgi þeirra vex og vex
vekur nokkra eftirtekt.
Ætla má að cybersex
sumum þyki nýstárlegt.
Björn Ingólfsson
Eitthvað mikið okkur vantar
á því sést
að þar sem eru flestir fantar
er fylgið mest.
Ármann Þorgrímsson
Lát þér ekki fyrir flækjast,
fylgni ríkir.
Ævinlega saman sækjast
sér um líkir.
Sigrún Haraldsdóttir
Lýðræðis við færum fórn
þó finnist sumum dimma.
Verður áfram vinstri stjórn
víst í boði Simma.
Ólafur Stefánsson
Þjóðin sem rembist við rokkinn
rjómalaus gónir á strokkinn,
hýsir lýs
og hokin kýs
yfir sig Framsóknarflokkinn.
Bjarki Karlsson
Mín fjáreign til fjandans er sokkin,
og frúin til útlanda stokkinn.
Ég langþreyttur rís
á lappir og kýs
nú yfir mig Framsóknarflokkinn.
Pétur Stefánsson
Gamla flokkafylgið þvarr.
Fólkið langþreytt valdi Gnarr.
Senn við förum frjáls og prúð
og finnum okkur nýjan trúð.
Hermann Jóhannesson
Af því ég er elskuleg
og öllum mönnum hrósa.
18 flokka ætla ég
endilega að kjósa.
Hólmfríður Bjartmarsdóttir
(Fía á Sandi)
Allt er hérna orðið þreytt,
enda sömu leiðir farnar.
Kunnið þið ekki að yrkja neitt
um annað en fjandans kosningarnar?
Pétur Stefánsson
Sagt og ort um kosningar
*Hingað sæll í sinni kem, syngjum brúðkaupslag.Þið eruð karl og kona, sem kjósið rétt í dag.Séra Hjálmar Jónsson verður með hjónavígslu á kjördag í Dómkirkjunni. ÞjóðmálPÉTUR BLÖNDAL
pebl@mbl.is