Frjáls verslun - 01.11.2006, Qupperneq 64

64 F R J Á L S V E R S L U N • 1 1 . T B L . 2 0 0 6
ÁRAMÓTAVIÐTÖL
DR. JUR. HERDÍS ÞORGEIRSDÓTTIR
PRÓFESSOR VIÐ LAGADEILDINA Á BIFRÖST
Þátttakan sló öll
aðsóknarmet
Eins og kunnugt er hafa verið nokkrar hræringar í háskólasam-
félaginu á Bifröst undanfarna mánuði sem lyktaði með því að nýr
rektor hefur verið skipaður sem vonir eru bundnar við. Að mínu
mati stendur Tengslanet III-ráðstefnan síðastliðið vor upp úr hvað
varðar jákvæða ásýnd í starfi skólans á árinu. Ég hef staðið fyrir
þessari ráðstefnu undanfarin þrjú ár en markmið hennar er að
efla völd kvenna í samfélaginu með því að koma saman og ræða
ýmsar hliðar jafnréttismála og álykta út frá þeim. Þátttakan sló öll
aðsóknarmet.
Í því samkeppnisumhverfi sem íslenskir háskólar starfa tel ég
brýnt að Bifröst nái að efla akademíska ásýnd með markverðu
framlagi á sviði fræða og rannsókna. Þá sé ég ýmis tækifæri í
auknu alþjóðlegu samstarfi. Háskólar starfa í nokkuð erfiðu sam-
keppnisumhverfi. Því er mikilvægt fyrir minni skólana að leggja
áherslu á sérstöðu sína og ágæti.
Það sem setur mark sitt á árið eru alvarleg veikindi nánustu
vinkonu minnar nú í lok árs en þau eru áminning um fallvaltleika
tilverunnar. Ég er auðvitað ánægð með það að á árinu hafa komið
út eftir mig nokkrar greinar og rit á alþjóðavettvangi og ég hef
talað á ráðstefnum víða erlendis en það eru samtöl við vini og
gleðistundir með krökkunum mínum sem standa upp úr.
GUÐNÝ ARNA SVEINSDÓTTIR
FRAMKVÆMDASTJÓRI FJÁRMÁLASVIÐS
KAUPÞINGS
Samþætting, sundmót
og skuldabréf
Árið hjá okkur í Kaupþingi var annasamt. Við lentum í mótbyr
í upphafi árs en þrátt fyrir það er þetta metár hjá okkur hvað
afkomu varðar. Við notuðum árið vel að mínu mati. Samþætting
starfseminnar í þeim tíu löndum sem við störfum í var meginvið-
fangsefnið. Ef tiltaka á einhver sérstök atriði, þá myndi ég fyrst
nefna skuldabréfaútboð bankans í Bandaríkjunum. Við sóttum 3
milljarða Bandaríkjadala til þarlendra fagfjárfesta sem er stærsta
skuldabréfaútboð okkar til þessa. Og svo ný afstaðið hlutafjár-
útboð þar sem við seldum hlutafé til erlendra fagfjárfesta fyrir 56
milljarða.
Næsta ár leggst vel í mig. Kaupþing hefur sýnt sterkan innri
vöxt á árinu og við væntum þess að bankinn haldi áfram að vaxa
og dafna. Erfiðleikarnir sem upp komu hjá íslensku bönkunum í
upphafi ársins eru nú að baki og ég tel að allir bankarnir komi
sterkari út úr þeim mótbyr. Fjármálageirinn er orðinn gríðarlega
mikilvægur fyrir þjóðarbúið og mikilvægt að áframhaldandi vöxtur
og þróun ríki hjá bönkunum og er ekkert sem bendir til annars en
að svo verði.
Smáatriði daglegs fjölskyldulífs koma mér sífellt gleðilega á
óvart. Að fylgjast með dóttur minni vinna sigra á sundmótum,
sjá dæturnar ná árangri í náminu og lífinu sjálfu eða að uppgötva
heiminn með augum 2ja ára snáða eru ómetanleg augnablik.
Guðný Arna Sveinsdóttir. „Samþætting starfseminnar í þeim tíu
löndum sem við störfum í var meginviðfangsefnið.“
Herdís Þorgeirsdóttir. „Að mínu mati stendur Tengslanet III-ráð-
stefnan síðastliðið vor upp úr hvað varðar jákvæða ásýnd í starfi
skólans á árinu.“