Tímarit Máls og menningar - 01.03.1994, Síða 22

— Já, að hluta til. Ég reyni að endurskapa óttann við vopnin og hugsanlegt
ofbeldi sem þessir menn voru fulltrúar fyrir. Mamma og pabbi áttu sumar-
bústað í Kópavogi. Þaðan er minningin sem er uppistaðan í sögunni.
— í hvaða skóla gekkstu?
— Ég gekk í Austurbæjarskólann og var svo í Kvennaskólanum. Ég á
verulega hlýjar minningar frá báðum þessum skólum. Eftir landspróf fór ég
í Menntaskólann í Reykjavík. Ekki fannst mér það sérlega skemmtilegt
tímabil. í skólanum voru ýmsar klíkur — og ég var ekki í neinni þeirra! Þetta
var á tímum „hinna ungu sjenía“ í skólanum. Heldur lítið fór fyrir stelpum
í félagslífi skólans. Þær voru líka færri en strákarnir og kannski óhæfar vegna
þess að þær voru ekki sjení, samkvæmt skilgreiningu. Annars leit maður ekki
svo á í þá daga, að menntaskólanámið ætti að vera skemmtilegt eða nem-
endur virkir í mótun þess yfirleitt. Þetta var eins og hver önnur vinna, puð
sem veitti umbun seinna, ef guð lofaði. Eftir stúdentspróf var ég svo eitt ár í
Háskólanum og lærði frönsku, ensku og forspjallsvísindi. Að þeim vetri
loknum ákvað ég að fara til náms á Spáni.
— Af hverju valdirðu Spán?
— Ég hafði farið þangað í ferðalag, veturinn 1957, og skildi hvorki upp
né niður í einu eða neinu. Það kveikti hjá mér forvitni og áhuga að fá þannig
forsmekk af menningu og máli sem voru mér lokuð bók, og mig langaði
aftur þangað. Það hafði líka runnið upp fyrir íslenskum stjórnvöldum, eins
og stjórnvöldum annars staðar í Evrópu eftir stríð, að til þess að byggja upp
farsælt þjóðfélag þyrfti vel menntað fólk. Þess vegna buðust námslán á sjötta
áratugnum og við gátum farið hvert á land sem var. Heimurinn opnaðist og
ungum námsmönnum var ekki beint til ákveðinna landa, heldur þótti það
ágætt að fólk færi sem víðast til að sækja mismunandi þekkingu heim. Það
skipti líka máli í mínu tilfelli að Spánn var ódýrt land, Frakkland og Þýska-
land voru til að mynda dýr námslönd.
Ég ætlaði upphaflega að vera eitt ár á Spáni og sjá svo til. Ég var í spænsku
fýrir útlendinga fyrsta árið, effir það langaði mig til að innritast í rómönsk
mál og bókmenntir, en þá þurfti ég að stunda nám með heimamönnum og
ég var ekki viss um að ég réði við það. Svo gekk þetta allt saman og ég stundaði
nám í Barcelona í fímm ár og lauk licentiatprófi 1965.
Spánn undir stjórn Franco
— Þetta var þriðji og síðasti áratugur Franco-tímabilsins á Spáni. Hvernig
var að stunda háskólanám í einræðisríki? Tókstu þátt í pólitískri starfsemi,
Álfrún?
— Að hluta til.
12
TMM 1994:1